Read Northern Rengma Naga 2 SAMUEL 8 Bible Online

2 SAMUEL 8 - Northern Rengma Naga bible

2 SAMUEL 8

¹Matsü pahan seng wi Kadimiwa David na Filistinthu ssikaghashen neng nu mathu chaya, nu mathu ayyi miwi khang keben tsüpi asakhen sa thsüa.

²Ma tsaseng wi Moab nyithu la chaya. Ma atssüzüthu pi ayyi wi nkhwenthsü nu mathu meshu kecheng cheng wi keni pi shü thsüa. Tsalina Moab nyithu na David maghathu sa wa nu khajanathu pi ma cü.

³Tsaseng wi ma Siriya nyi Zoba wi kadimiwa Rehob tsa Hadadezer chaya, Hadadezer na Eufrat Ghaku na meiwa ayyi kesü tsü yanengyale wa keten.

⁴David na ma goru kessinyi meza tagha nu tagü nu süpahithu hazar ngwe ghanya. Ma gorugari meza ghena goruthu pi thengya nu kepa wi tsüdi ccü pashüa.

⁵Damaska wi Siriya nyithu na süpahizi kesun pi kadimiwa Hadadezer kiqa kethsü wi David na tsü ssikaghashen nu anyi hazar ngwe nu keni pathia.

⁶Tsaseng wi ma mathu yyi wi süpahizi kemnanpenthu saya, nu mathu na ma maghathu sa nu khajanathu pi ma cü. Apvüwa na apen tsüdi wi la David sapi khangya thsü.

⁷David na Hadadezer kedithu na pvü keten suna tsonhithu khuya nu tsüthu pvü nu Jerusalem wi gho.

⁸Ma Hadadezer na kekhangsen keben Betab nu Berothai nyunuti keni wi la lezza ji ntsawa khuya.

⁹David na Hadadezer süpahizi tsüdila chayadhale kesa Hamath wi kadimiwa Toi na zaya.

¹⁰Tsalina ma ma tsa Joram kesun pi Kadimiwa David na kheni kejon tughula Toi ssisa kesawa Hadadezer miwi khangya kesalina ma wi lachaye nu shalom sa thsü. Joram na David ghena aju suna, rükatssü, nu lezza pi kesathu khuya.

¹¹Kadimiwa David na tsüthu pi kekinyi wi senle kesalina ma mizzatenti kepathu miwi khangya nu khuya kesathu suna nu rükatssü tsü gweghe pi —

¹²Edom, Moab, Ammon, Filistia, nu Amalek — nu ma Hadadezer wi shukeya tsanqai pahan wwala satemetha.

¹³David na Amcü Yyiketijü wi Edom nyi hazar tagha nu tazen pathi nu kheneng kegho wi ma nyankemechan jipfüya.

¹⁴Ma Edom yyi maben wi süpahizi kemnanpen sa, nu ciwi anyithu na ma maghathu sa wa. Apvüwa na David sapi apen tsüdi wi la khangya thsüa.

¹⁵David na Israel maben wi kekhangsen nu ma keshüthangla ma nyithu miwi kemeshon nu ketsatan wi senben kesa chüti sa.

¹⁶Zeruiya tsa Joab na süpahizi benchüwa sa; Ahilud tsa Jehoshafat na zhükethengthu kenonccawa sa;

¹⁷Ahitub tsa Zadok nu Abiathar tsa Ahimelek manyi na keqhaikedithu sa; Seraiya na jühkaghatenpen wi kezhüwa sa;

¹⁸Jehoiada tsa Benaiya na David ghikehiethu kenonccawa nu David tsathu na keqhaikedithu sa.