Read Northern Rengma Naga 2 SAMUEL 9 Bible Online

2 SAMUEL 9 - Northern Rengma Naga bible

2 SAMUEL 9

¹ Ghanan kesü wi David na keü, “Ciwi Saul theghi pahan na hangbenla nu? Keujüla hangben lethu hi Jonathan ghena ma nantizenchi mvu benle.”

²Ciwi Saul theghi magha kesü ma nyan Ziba na ben, nu nyu na ma David wi walo ma kiza. Kadimiwa na ma keü, “No Ziba kwe?” Ma luneng, “Hi nmaghawa le, kediwa.”

³ Kadimiwa na ma wi keü, “Ciwi Saul theghi pahan na hangben nu hi Anyiza wi khishi ketheng ti hi ma nantizen chiya kemehai na ben kwe?” Ziba na luneng, “Ciwi Jonathan tsa kesü khilila benle. Ma accü nmehai le.”

⁴Kadimiwa na keü, “Ma khiewa ben nu?” Ziba na luneng, “Lodebar wi Ammiel tsa Makhir jjen wi benle.”

⁵Tsalina kadimiwa na wa ma ssigholo kesa nyu kesunchi.

⁶Saul tsa Jonathan tsawa Mefibosheth na gho cukeya wi ma nyuwakü wina David tuwi ayyi wi nkhwendu. David na khi, “Mefibosheth,” nu ma luneng, “Hi nmaghawa le, kediwa.”

⁷David na luneng, “No nmessi lalo. Hi nba Jonathan ghena no nantizen chiden. Hi nbaqhai Saul yyi tsüdila pi no cü neng shaden, nu no keshüthangla hi miz wi dsajjüya mehai le.”

⁸Mefibosheth na kheneng kukedu nu khi, “Kediwa, mangsale no hi affü keshü kesü ti kesawa ha tuwi mehai ntsawa saben nu?”

⁹Tsaseng wi kadimiwa na Saul maghawa cichi nu khi, “Hi npvüwa Saul nu ma theghi keben tsüdi pi ma tsawa Mefibosheth cüben.

¹⁰No, ntsathu, nmaghathu ya npvüwa Saul theghi ghena ayyi tsü cah nu wwi sengho mathu kedsakejjü sa thsülo. Isala Mefibosheth na keshüthangla hi miz wi dsajjüben.” (Ziba na atsathu taghamanga nu amaghathu ngwe na ben.)

¹¹Ziba na luneng, “Njenkeben Kadimiwa, no kekhi ti hi tsüdila saben.” Tsalina Mefibosheth na kadimiwa tsa kesü ti sa nu kadimiwa miz wi dsajjü wa.

¹²Mefibosheth na atsa ghanyi kesü ma nyan Mika ben. Ziba theghi anyi tsüdila Mefibosheth maghathu sa wa.

¹³Tsalina Mefibosheth ma ccü ghapeli qho nkemehaiwa na Jerusalem wi hang nu keshüthangla kadimiwa miz wi dsajjü wa.