Read Northern Rengma Naga 1 KADIMITHU 11 Bible Online

1 KADIMITHU 11 - Northern Rengma Naga bible

1 KADIMITHU 11

¹Solomon na asang nzathu kejonla nen. Ma wubvü Ejipt kadimiwa nga miwi ma Hitti nzathu nu Moab, Ammon, Edom, nu Sidon nzathu la yaya.

²Apvüwa na Israel nyithu na anyi hathu ha ssinu nkeyali lalo, kepaghenanye mathu na Israel nyithu sapi mathu cenpvüthu jühkeya nyi sa wa thsüaben na khi lela ma tsüthu tsü yaya.

³Solomon na ma wubvü kadingathu meza tagü yaya, nu meshibvüthu la meza kecheng na ben. Mathu na ma sapi Anyiza wina khapeghe bvü thsüa,

⁴nu ma keqhai tsüwi mathu na ma yala asang cenpvüthu kinyi wa thsüa. Ma ma ba David ti Apvüwa ma Nyiza wi ma leben tsentsa nsala.

⁵Ma Sidon cenpvü nzawa Astart, nu Ammon cenpvü nankiqananwa Molek tsü kinyi.

⁶Ma sami pi Apvüwa shun nu Apvüwa wi ma ba David ti leben tsentsa nsala.

⁷Jerusalem na nishuwa ayikha miwi ma Moab cenpvü nankiqananwa Khemosh kekinyipen kesü, nu Ammon cenpvü nankiqananwa Molek kekinyipen kesü sa.

⁸Ma ma wubvü asangthu tsü tsüdila mathu kepapa cenpvüthu wi hankedemvu mecang nu ahhansha kesa pen la sapi cüa.

⁹Apvüwa Israel Nyizawa na keni tughu Solomon tuwi gho nu ma asang cenpvüthu tsü nkinyi lalo kiza lela Solomon na Apvüwa jüh meyala ma wina khapeghe bvüa. Tsalina Apvüwa na Solomon miwi aghepvü,

¹¹nu ma wi khi, “No aghandu hi ssinu cenkethenjühwa tsü pakhhi nu iyenkhukechithu tsü n-niela kesalina hi no wi kadiyyi tsü khuya nu pi no kedithu kesü cüaben kesa khishiben.

¹²Isala nba David imaghawa ghena hi no kahang tsüwi ha sa nben, isala ntsawa na kadikesa tsüwi sa ben.

¹³Hi ma wi kadiyyi tsü maben sen bvü nben; isala imaghawa David nu hi kessi pi iji saya kesa nyunutiwa Jerusalem ghena hi amizza kesü teshi pi ma cüaden.”

¹⁴Tsalina Apvüwa na Edom nyi kadimishi wi Hadad sapi Solomon shun thsüa.

¹⁵Kheni tsüwi David na Edom nkakeya wi ma süpahizi benchüwa Joab na ciwi keshüthu tsüpi vhüle wa. Ma nu ma nyithu na asha tugho Edom wi ben, tsü tsüwi mathu na Edom npvüzathu tsüdila pathia.

¹⁷Isala Hadad nu ma ba Edom nyiwa maghathu pahan gweghe Ejipt wi bvüa. (Tsü tsüwi Hadad na kepvüza nyi kesü saben.)

¹⁸Mathu na Midia nyi teshi nu Paran wi wa, ciwi anyi kepathu na mathu gwegheya. Tsaseng wi mathu na Ejipt wi wa kadimiwa metu, kadimiwa na ayyi pahan nu ajjen kesü nu kedsakejjü pi Hadad cüa.

¹⁹Hadad na kadimiwa pvüshang saya, nu kadimiwa na ma wubvü kadijja Tapen pvünonwa pi Hadad wubvü saya thsüa.

²⁰Ma atsa kesü Genubath pvügha pi ma cü. Kadijja na kadijjen wina Genubath noncca shagha, nu ma tsathu gweghe hang.

²¹Khathansha wi Ejipt wi Hadad na David na shüdha nu ma süpahizi benchüwa Joab la shüdha le kesa jühtheü zaya khe, Hadad na kadimiwa wi khi, “Hi ya iyyi wi wha neng thsülo.”

²²Kadimiwa na khi, “Mangkesa na, hi pala pahan pi no ncüla kwe? Tsalina no njjen wi wha neng mvu benla?” Hadad na kadimiwa luneng, “Hi ya wha neng thsülo.” Isanu ma ma diyyiwa wi ghoneng. Hadad, Edom kadimiwa na nkemehai nyi kesü, ma Israel ghinyi nmehai ntsa sa.

²³Anyiza na Eliada tsa Rezon la sapi Solomon shun thsü. Rezon na ma pvüwa Zoba wi kadimiwa Hadadezer wina bvüa,

²⁴ma wa ayenkepakhhi nyithu khang kesü miwi aliwa sa, (Hana David na Hadadezer chaya nu Siriya nyi pfüwathu pathi kesa seng wi.) Rezon nu ma nyithu na wa Damaska wi hang, nu ciwi ma nyithu na ma pi Siriya kadimiwa sa thsüa.

²⁵Ma Solomon kahang tsüwi Israel ghinyi kesü sa.

²⁶Anyi kepa wi kesü Kadimi Solomon shun kesawa na ma kedithu jawi meshu kesü Efraim wi Zeredah wina keghowa Nebat tsa Jeroboam. Ma jja na denyile kesü ma nyan Zerua.

²⁷Hawa ha kekivvü cüki. Solomon na ayyi pvüpi Jerusalem na nishuwa pong nu anyunuti khweti tsü sapfüben.

²⁸Jeroboam na anyi cahli kezü kesü, Solomon na ma kekuli piketsünyi kesa mukeya wi ma pi Manasseh nu Efraim mizza yyi tsüdi wi meten pi kekuli kesathu miwi kediwa sa thsüa.

²⁹Ghanan kesü wi Jeroboam na Jerusalem wina kijünyi wa keten Shilo wi atusenjüh-kechüwa Ahijah na gho ma ketan diyyiwa len wi keten ma metu.

³⁰Ahijah na agwomejuwa kaghazu ketheü pvü keten tsü mezüqhhe pi abe taghakeni saya,

³¹nu Jeroboam wi khi, “No nghena abe tagha khuyalo, kepaghenanye Apvüwa Israel Nyizawa na no wi khiben, ‘Hi Solomon wina kadiyyi tsü khuya den, nu amizza tagha pi no cüaden.

³²Imaghawa David nu Israel yyi maben wina hi kessi pi inyunuti saya kesawa Jerusalem ghena Solomon na amizza kesütan benya ben.

³³Solomon na hi meya mvula nu asang cenpvüthu Sidon cenpvü nzawa Astart; Moab cenpvü Khemosh; nu Ammon cenpvü Molek kinyi wa kesa ghena hi ha saaden. Solomon na ijüh meyaladha; ma sazzidha; nu ma ba David ti iyenthu nu iyenkhukechithu tsü n-nieladha.

³⁴Isala hi Solomon wi kadiyyi maben sen bvü nben, nu ma hang keben chu hi ma ya kekhang sen thsüben. Hawa ha imaghawa David hi ma kessiya nu ma iyen, nu iyenkhukechithu kenie ghena hati saaben.

³⁵Hi Solomon tsawa wi kadiyyi khuya nu amizza tagha pi no cüaden,

³⁶isala hi Solomon tsa ya amizza kesütan benya thsüden, isanu hi keshüthangla imaghawa David shicübvügha kesü na hi kekinyipen sa thsüle anyunuti kessiya kesawa Jerusalem witsü kekhang sen thsüben.

³⁷Jeroboam, hi no sapi Israel kadimiwa sa thsüaden, nu no samvu keben ti ayyi tsüdi miwi kekhang senya thsüben.

³⁸Keujüla no ijüh yatha sa, iyenthu nie nu hang, nu imaghawa David na kesa ti iyenkhukechi nie nu ituwi keya qowa tsü sa lethu, hi keshüthangla no ssiben den. Hi no pi Israel kadimiwa sa thsüaden, nu hi David ghena sa kechi ti nshicübvüghathu na nseng wi kekhang sen thsü metsiben.

³⁹Solomon kesami ghena hi David shicübvüghathu meten cüaden, isala anuphan ghena nye.’ ”

⁴⁰Tsalina Solomon na Jeroboam pathiale sa, isala ma bvü sen nu Ejipt kadimiwa Shishak wi wa nu Solomon npi keshü chu ciwi ben wa.

⁴¹Solomon kekuli, ma kahang yen, nu ma kemetsa tsüdi cükithu pi Solomon cüki kezhü wi zhü theng.

⁴²Ma Jerusalem wi Israel tsüdi miwi amapi jügha kadimiwa sa.

⁴³Ma shü nu pi David Nyunutiwa wi vhüa, nu ma tsa Rehoboam na ma shiwa sa kadimi saya.