Read Northern Rengma Naga 1 KADIMITHU 13 Bible Online

1 KADIMITHU 13 - Northern Rengma Naga bible

1 KADIMITHU 13

¹Apvüwa yenkhukechi kenie wina Judah wina kegho atusenjüh-kechü kesü Bethel wi wala Jeroboam na ahhansha sala kekinyipen witsü ngan keben gho cuya.

² Apvüwa yenkhukechi kenie wina atusenjüh-kechüwa na jisha pi kekinyipenwa tsü shun; “O kekinyipen, kekinyipen, Apvüwa na hati khiben: David theghi wi ghanyi kesü ma nyan Josiya kesa pvügha yaben. Ma nmiwi Anyiza nkechü kekinyipenthu wi ahhansha sa keten keqhaikedithu tsü pathiaben, nu ma anyi güthu pi nmiwi mecang ben.”

³Atusenjüh-kechüwa na khi, “Kekinyipen hawa ha pakhhizighe, nu ma miwi kemecang khalathu na bvüzigheaben. Isalethu, nthu na Apvüwa na hi wi ha khile kesa chüyaben.”

⁴Kadimi Jeroboam na ha zakeya wi ma tsütson nu ahza khuchi, “Anyi katsü ghanyalo!” Zuli kadimiwa hacü na shü nu ma tsü zan neng meyala.

⁵Kekinyipenwa na zuli qancazighe nu kemecang-khalathu na ayyiwi keshusha, tsüna atusenjüh-kechüwa na Apvüwa nyan wi npi wina khi kechi ti sa.

⁶Kadimi Jeroboam na atusenjüh-kechüwa wi khi, “Nchala Apvüwa n-Nyiza wi ighena kekhie sa nu ma ihacü ha sapi mehai cülo keü chilo!” Atusenjüh-kechüwa na Apvüwa wi kekhie sa, nu kadimiwa hacü na mehaiya.

⁷Tsaseng wi kadimiwa na atusenjüh-kechüwa wi khi, “Hi gweghe ijjen wi gho nu pala pahan dsayalo. No ighena mangwa sacüdha khe hi akutimen sapi no cüden.”

⁸Atusenjüh-kechüwa na luneng, “No no keben-keyeng gishü pahan pi hi cü lela hi no gweghe wa nyelela dsajjü nyelela no gweghe mangla sa nben.

⁹Apvüwa na hi mangla dsa nu njjüla, nu hi kagha len makesü wina ajjen wi nwha neng lalo hi kiza theng.”

¹⁰Tsalina ma kagha len wi nyela alen kepawa wina bvüa.

¹¹Tsü tsüwi atusenjüh-kechü kaghawen kesü na Bethel wi hangden. Ma tsathu na Judah wina kegho atusenjüh-kechüwa na tsü ghanan Bethel wi mangwa sachi nu ma mangwale Kadimi Jeroboam kiza khe pi mathu ba kiza.

¹²Atusenjüh-kechü kaghawenwa na mathu wi keü, “Ma alen khiewa na wa nu?” Mathu na alen tsü khipi ma ccüca,

¹³nu ma mathu wi ma gada miwi kedonkipen sachilo kiza. Mathu na tsüti sacüa, nu ma tsü miwi na

¹⁴Judah wina kegho atusenjüh-kechüwa tsü jügü wa nan ma ayangton kesü cakhu wi donki kebenla muya, nu ma keü, “No Judah wina kegho atusenjüh-kechüwa tsü kwe?” Anyi tsüwa na luneng, “Anle, hi anyi tsüle.”

¹⁵Ma khi, “Ajjen wi ghola hi gweghe dsajjülo.”

¹⁶Isala Judah wina kegho atusenjüh-kechüwa na luneng, “Hi no gweghe ajjen wi wha neng nyelela no hi ssikeya tsü yaya nbenle. Nu hi no gweghe hewi dsa nyelela atssü la jjüya nben,

¹⁷kepaghenanye Apvüwa na hi mangla dsa nu njjüla, nu hi kagha len makesü wina ajjen wi nwha neng lalo hi kiza theng.”

¹⁸Tsaseng wi Bethel wina kegho atusenjüh-kechü kaghawenwa na khi, “Hi la no ti atusenjüh-kechü kesü, nu Apvüwa jüh wina tangnyilo kesü na hi no ssinu ajjen wi wha nu no ya dsajjüya thsülo kiza le.” Isala atusenjüh-kechü kaghawenwa na milimesa ben.

¹⁹Tsalina Judah wina kegho atusenjüh-kechüwa na atusenjüh- kechü kaghawenwa gweghe ajjen wi whala gweghe dsajjü.

²⁰Manyi gweghe miz wi donki keben wi Apvüwa jüh na atusenjüh-kechü kaghawenwa miwi gho,

²¹nu ma Judah wina kegho atusenjüh-kechüwa wi magha, “Apvüwa na khiben, no ma jüh meyala nu ma no kekiza tsü nsalale.

²²No kheneng ghola ma no ndsajjü lalo kekiza pen witsü dsajjüdha. Ha ghena no pathiaben nu nkamang pi ntheghi shüjjenpen wi vhü nbendha.”

²³Manyi dsajjükeya seng wi atusenjüh-kechü kaghawenwa nu Judah wina kegho atusenjüh- kechüwa ghena kedonkipen pi gada miwi chicüa,

²⁴nu ma wa keten alenca wi ssensitemi kesü na ma metuya nu ma ghan. Ma kamang pi alen wi khalachia, nu gada nu ssensitemi manyi na tsü kete wi ngan ben.

²⁵Anyi pahan na tsü pvüdhi wa kamang na alen wi ben nu ssensitemi na tsü kete wi keben muya. Mathu na Bethel wi dula mathu na mangwa muya khe pi nyu kiza.

²⁶Atusenjüh-kechü kaghawenwa na tsü cüki zakeya wi ma khi, “Tsüwa tsüna atusenjüh-kechüwa Apvüwa jüh nkinala kesawa tsüle! Tsalina Apvüwa na ma sa benle kekhi ti ma ssensitemi kesun pi ma ghan thsüdha.”

²⁷Tsaseng wi ma ma tsathu wi khi, “Ighena kedonkipen pi gada miwi chicülo.” Mathu na tsüti sacüa.

²⁸nu ma wala atusenjüh-kechüwa kamang pi alen wi khalachi, nu gada nu ssensitemi manyi na khilila ma kete wi ngan kepen tsü muya. Ssensitemi na kamang tsü ndsa nu gada la nssikaghashen.

²⁹Atusenjüh-kechü kaghawenwa na kamang tsüpi gada miwi chiya, nu tsü pvü neng gho Bethel wi ma ghena anongü nu tsüpi vhüa.

³⁰Ma tsüpi ma theghi shüjjenpen wi vhüa, ma nu ma tsathu na tsü ghena anongü nu khi, “Oh, icünyuwa, icünyuwale!”

³¹Pi kevhü seng wi atusenjüh-kechüwa na ma tsathu wi khi, “Khathansha wi hi shü khe pi ashüjjen hawi ikamang pi ma shiwa sa vhülo.

³²Ma Apvüwa jühkhukechi kenie wina Bethel wi kekinyipenwa nu Samaria nyutithu tsüdi wi kekinyipenthu keshun jühthu tsüna sacen metsiben.”

³³Isala Kadimi Jeroboam na khilila ma nkemehai lenthu wi khapeghe meyala atheghi jümuthu wi keqhaikedithu kessi pi ma kekinyipen kesathu witsü kekuli sa thsüben. Ma anyi kesü le kesü lela keqhaikediwa samvu kebenwa tsü khuthipi sa thsüa.

³⁴Ma kesami hawa ghena ma kadishi tsü kededi nu yasatha kesa senghoa.