Read Northern Rengma Naga 1 KADIMITHU 14 Bible Online

1 KADIMITHU 14 - Northern Rengma Naga bible

1 KADIMITHU 14

¹Tsü tsüwi Kadimi Jeroboam tsa Abijah na naa ben.

²Jeroboam na ma wubvü wi khi, “Ntsi sakemiliya nu thola no nchü thsüla atusenjüh-kechüwa Ahijah na hi Israel kadimiwa saya benle kekhiwa kahang pen Shilo witsü walo.

³Amesa abe tagha, amesa shamlu kegü pahan, nu anikhotssü ahikhu kesü khuya nu ma wi wa. Ishinyi tsa ha khati sa ben khe ma keü nanlo, ma no kiza ben na.”

⁴Tsalina nzawa na Shilo wi Ahijah jjen wi wa. Qhaithi kesa ghena Ahijah na ma nyon nmuladha.

⁵Jeroboam wubvü na ma tsa naa kebenwa cüki ghena ma keü nanle ma jjen wi ghotenle kesa Apvüwa na Ahijah kizadha. Nu Apvüwa na Ahijah mangwa khilo khe pi kizadha. Jeroboam wubvü na gho cukeya wi ma anyi kepa wi ghe sa.

⁶Isala Ahijah na nzawa ajenka wi gho keten hhai zaya nu khi, “Dugholo, no Jeroboam wubvü le kesa hi chüben. No mangkesa na nyu kepa ghe saben nu? Hi nghena jühtheü nkemehai benle.

⁷Wala Jeroboam wi Apvüwa Israel Nyizawa na hati ma wi khiben le kiza lo: ‘Hi anyithu jawi na no kessishiya nu pi inyi Israel miwi kekhang kesenwa sa thsüa.

⁸Hi David shicübvüghathu wi kadiyyi khuya nu tsüpi no cüa. Imaghawa David na ijühkeya wi bentha sa, iyenkhukechithu nie, nu hi yaqole kesa ketan sa, isala no ma ti nsale.

⁹No ntuwi kekhang kesenthu miwi kesami di mtsü sadha. No hi meya mvula, nu atsikezhü nu amighe pi atsiketonthu kekinyi ghena ileben keminu cüssidha.

¹⁰Ha ghena hi ketizenkesa sengho no kadishi miwi chi nu nshicübvüghathu npvüza ghanyi keqhai tsüdila pathiaben. Anyi meshu kesü na amesü keku kemecang ti hi ntheghi tsüdila nmila npi kesa chu mecangtha sa cüden.

¹¹Ntheghi kesü le kesü lela anyunuti wi keshüwa kamang tsü affüthu na dsaben, nu alli wi keshüwa kamang tsü kamang kemcüwathu na mcüben. Hi Apvüwa, hi khidha.’ ”

¹²Nu Ahijah na Jeroboam wubvü wi khi, “No khili ajjen wi whalo. No wala anyunutiwa wi duya meyi ntsawa na shüaben na.

¹³Israel nyi tsüdila ma ghena anongü nu ma pi vhüaben. Jeroboam theghi jawi ma ketan mehaitsü pi vhü yaben, kepaghenanye ma ketan Apvüwa Israel Nyizawa kaghali pvüya.

¹⁴Apvüwa na kadimi kesü pi Israel miwi chiben nu ma ya Jeroboam kadishi tsüpi masakhen sa thsüaben.

¹⁵Apvüwa na Israel meten ben, nu ma ahuphon kesü na aghakutssü miwi kuli keben ti sa ben. Ma ayyi kemehai pi mathu bamyithu kecü ha wina Israel nyithu ghazan pfüpi nu mathu jügü zighe pi Eufrat Ghaku thenkeghe chiaben, kepaghenanye mathu na Asherah cenpvü nzawa tsikezhü tsü sa nu Apvüwa lebenketsu cüssidha.

¹⁶Apvüwa na Israel teshiaben kepaghenanye Jeroboam na sami nu ma Israel nyithu ssi wa kesami wi chia.”

¹⁷Jeroboam wubvü na Tirzah wi wha neng. Ma whala ma jjen wi duya meyi atsawa na shüa.

¹⁸Apvüwa na ma maghawa atusenjüh-kechüwa Ahijah wi khi ketheng ti Israel nyithu na ma ghena anongü nu ma pi vhüa.

¹⁹Kadimi Jeroboam kekuli cüki kepathu, ma aghikesa nu khati kekhang sen khe tsüdila Israel kadimithu cükikezhü wi zhü theng.

²⁰Jeroboam na amapi ngwe nu keni kadimi sa nu kekhang sen. Ma shü nu pi vhüa, nu ma tsa Nadab na ma shiwa sa kadimi saya.

²¹Solomon tsawa Rehoboam na ma kahang mapi jügha nu kesü wi Judah kadimi saya, nu ma amapi tagha nu tagü Apvüwa na Israel yyi tsüdi wina ma kekinyipen sa thsüle anyunuti kessiya kesawa Jerusalem witsü kekhang sen. Rehoboam jja na Ammon wina kegho Naamah.

²²Judah nyithu sami pi Apvüwa shun nu kheni mathu bamyithu miwi sami kayi pi Apvüwa lebenketsu cüssi pi mathu shun thsü.

²³ Mathu na milikemesa acenpvü kekinyipenthu sa, nu yyishiphon nu achantonthu cakhu wi Asherah tsikezhüthu kekinyi ghena alonthu pi sheng.

²⁴ Tsüdi miwila nkemehai ntsawa na Anyiza nkechüthu kekinyipenthu witsü npvüza nu nzathu na keqheza menkedsa kekuli sa. Israel nyithu na atujügü sen nu diyyiwa wi kedu wi Apvüwa na ayyi ciwi na jügüshi kesa anyithu na nkemejüghe kekuli sa ketenthu tsü Judah nyithu na tsüthu tsüdila sa wa.

²⁵ Rehoboam na kadikesa mangawa mapi wi Ejipt kadimi Shishak na gho Jerusalem ssikaghashen.

²⁶ Ma Kekinyijjen nu kadijjen wi keben-keyeng tsüdi pi Solomon na kesa suna tsonhithu tsü saghu sen bvüa.

²⁷Tsüthu mithon wi kadimi Rehoboam na lezza tsonhithu saya nu tsüthu pi kadijjen kaghapeng jenka kehie kedithu nondi chia.

²⁸Kadimi na Kekinyijjen wi kewa kaghapeng aghikehiethu na atsonhithu tsü pvü, nu tsaseng wi tsüthu pi aghihie keben keshondhi witsü chi neng den.

²⁹Kadimi Rehoboam kekuli cükithu na Judah kadimithu cükikezhü wi zhü theng.

³⁰Hatsü tsüdi wila Rehoboam nu Jeroboam manyi na keshüthangla khokho ssinu aghi sa.

³¹Rehoboam na shü nu ma pi David Nyunutiwa wi kadishüjjen wi vhüa (ma jja na Ammon wina kegho Naamah), nu ma tsa Abijah na ma shiwa sa kadimi saya.