Read Northern Rengma Naga 1 KADIMITHU 15 Bible Online

1 KADIMITHU 15 - Northern Rengma Naga bible

1 KADIMITHU 15

¹Israel Kadimi Jeroboam na kadikesa mapi tagha nu tazenwa wi Abijah na Judah Kadimi saya,

²nu ma amapi kecheng Jerusalem wi kekhang sen. Ma jja na Absalom ngawa Maaka.

³Ma ma ba ti kesamithu tsü sa, nu ma ma baqhai David na kesa ti Apvüwa ma Nyiza jühkeya wi bentha nsa.

⁴ Isala David keghangki ghena Apvüwa Anyiza na atsa kesü pi Abijah cü nu ma seng wi Jerusalem wi kekhang sen thsü nu Jerusalem yala yazishu benya thsü.

⁵ David na Hitti nyi Uria miwi ketan khe ma Apvüwa kenenwa sa nu khiela ma yenkhukechithu kesüla n-niela nkesa ghena Apvüwa na ha sachi.

⁶ Rehoboam nu Jeroboam manyi jüwi aghikesa tsüna Abijah kahang chuli sa.

⁷Nu Abijah kekuli cükithu na Judah Kadimithu cükikezhü wi zhü theng.

⁸Abijah na shü nu pi David Nyunutiwa wi vhüa, nu ma tsa Asa na ma shiwa sa kadimi saya.

⁹Israel Kadimi Jeroboam na kadikesa mapi ngwewa wi Asa na Judah Kadimi saya,

¹⁰nu ma amapi jügha nu kesü Jerusalem wi kekhang sen. Ma jjaqhai na Absalom ngawa Maaka.

¹¹Asa na ma baqhai David na kesa ti ma Apvüwa kenenwa tsü sa.

¹² Ma npvüza nu nzathu na Anyiza nkechü kekinyipenthu wi keqheza menkedsa kekuli sa ketenthu tsüdila diyyiwa wina jügüshia, nu ma tuwi kadi kesathu na atsikezhü kesathu tsüdila khupia.

¹³Ma ma jjaqhai Maaka na kadijja sa keben witsü khupia, kepaghenanye ma aghasu cenpvü nzawa Asherah tsikezhü kesü zhü theng. Asa na atsikezhü tsü pacha nu tsüpi Kidron Yyiketijü wi mecang.

¹⁴Asa na Anyiza nkechüthu kekinyipenthu tsüdi yasa meyala lela ma kahang chu Apvüwa wi jühtsentsa sa.

¹⁵Ma ma ba na atsanqai satemetha pi Anyiza wi chi kesathu nu ma suna nu rükatssü tsanqaithu satemetha kesathu tsüdi pi Kekinyijjen wi chia.

¹⁶Judah Kadimi Asa nu Israel Kadimi Baasha manyi na kekhang sen keben chuli manyi na keshüthangla khokho ssinu aghi sa.

¹⁷Baasha na Judah nkaya nu Judah wi kedukeshhu tsüdi khen le kesalina Rama tsü khwetivü shagha.

¹⁸Tsalina Kadimi Asa na ma rükatssü nu suna pi Kekinyijjen nu kadijjen wi chi ketheng tsüdi khuya nu tsüpi ketsijüh ha gweghe pi ma kedithu pahan wina kesun pi Damaska wi Hezion tsa Tabrimmon tsawa Siriya Kadimi Benhadad wi chi:

¹⁹“Ithu bathu na sakegho ti ithu la apfüwa sa na. Rükatssü nu suna hana nghena aju kesü le. Khili Israel Kadimi Baasha ssinu apfüwa kesa tsü bheghelo, nu ma iyyiwi ma süpahithu tsü khushi yathsüale kesalina.”

²⁰Kadimi Benhadad na Asa kekhi tsü anlo sa nu ma kedi benchüthu nu mathu süpahizithu kesun pi Israel nyunutithu ssikaghashen wa thsüa. Mathu na Ijon, Dan, Abel, Beth Maaka, Galilee Ghajü kete wi ayyi, nu Naftali yyi maben nkaya.

²¹Kadimi Baasha na mangwa sadha khe zakeya wi ma Rama khwetivü keben tsü teshi theng nu Tirzah wi wa.

²²Tsaseng wi Kadimi Asa na ahza kesü kesun pi Judah yyi maben wi, Baasha na pi khweti kesa alon nu achanthu tsü kesüla nheila Rama wina sen bvü kiqalilo khichi. Asa na atsanqai ha sen wa Benjamin yyiwi anyunuti kesü Mizpah nu Geba khweti saya.

²³Kadimi Asa na ma kempvüza sala kekuli nu anyunutithu kekhweti cükithu tsüdila Judah kadimithu cükikezhü wi zhü theng. Isala ma keqhai len wi ma ccü wi khumakhujü ghena ma ccü nmehaila.

²⁴Asa na shü nu pi David Nyunutiwa wi kadishüjjen wi vhüa, nu ma tsa Jehoshafat na ma shiwa sa kadimi saya.

²⁵Judah Kadimi Asa na kadi sakeya mapi keniwa wi Kadimi Jeroboam tsa Nadab na Israel Kadimi saya, nu ma amapi keni kekhang sen.

²⁶Kheni ma ba ti ma kesami sapi Apvüwa shun, nu Israel ssi wa kesami wi chia.

²⁷Isaakhar mizza wi Ahijah tsa Baasha na Nadab shunle acho kiden, nu Nadab nu ma süpahizi na Filistia wi anyunuti Gibbethon tsü vüsen keben wi ma Nadab pathia.

²⁸Hana Judah Kadimi Asa na kadikesa mapi kechengwa tsüwi sa. Tsalina Baasha na Nadab shiwa sa Israel Kadimi saya.

²⁹Ma wan nu Jeroboam theghi tsüdi pathia. Tsüna Apvüwa na ma magha atusenjüh- kechü Shilo wina keghowa Ahijah wina Jeroboam theghi tsüdi pathiaben khi ketheng tsü sacen; mathu kesüla hang meyala.

³⁰Hati kesa hana Jeroboam na kesamithu sa nu ma Israel yala sami thsü nu Apvüwa Israel Nyizawa lebenketsu cüssi thsü kesalina.

³¹Nadab kekuli cükithu na Israel Kadimithu cükikezhü wi zhü theng.

³²Judah Kadimi Asa nu Israel Kadimi Baasha manyi na kekhang sen keben chuli khokho ssinu aghi sa.

³³Judah Kadimi Asa na kadikesa mapi kechengwa wi Baasha tsa Ahijah na Israel Kadimi saya, nu ma Tirzah wi amapi ngwe nu mejü kekhang sen.

³⁴Ma tuwi Kadimi Jeroboam ti ma sami pi Apvüwa shun nu Israel ssi wa kesami wi chia.