Read Northern Rengma Naga 1 KADIMITHU 19 Bible Online

1 KADIMITHU 19 - Northern Rengma Naga bible

1 KADIMITHU 19

¹Kadimi Ahab na Elijah kulikechi tsüdi nu ma khati nu Baal tusenjüh-kechüthu tsüdi pi shü thsü khe khipi ma wubvü Jezebel kiza.

²Nzawa na ketsijüh kesü pi Elijah wi kesunchi, “No atusenjüh- kechüthu miwi sa kechi ti hi dhitsü wi hathansha wi nmiwi tsü makesü nsachi lethu, acenpvüthu na hi pathi kesawa salo.”

³Elijah na messiya nu ma kahang ghena kuthi bvüa; ma ma maghawa ssisen Judah yyi Beersheba wi wa. Amaghawa pi ciwi teshi theng nu

⁴ Elijah na ghanan thangthang alentsen sen aghansha non wi dua. Ma wala achanton kesü cakhu wi donki nu mnan, nu ma shülo kheshülan sa. Ma kekhie sa, “Agüccü mtsüdhale, Apvüwa! Hi kahangli khuyalo, hi ibamyithu miwi mehaiki nsale!”

⁵Ma achanton cakhu witsü qancadu jen wa. Zuli tangnyilo kesü na gho ma pa nu khi, “Shagha nu dsayalo.”

⁶Ma ghangkevüli chi nan amesa kesü nu atssü khüti kesü na ma li kete wi keben muya. Ma tsü dsajjüya nu jen neng wa.

⁷Apvüwa nyilowa na keni tughuwa gho ma pamechü nu khi, “Shagha nu dsayalo, kijünyi wa ketenwa ha nghena agüccü mtsü tenle.”

⁸Elijah na shagha dsa nu jjüya, nu atsse tsü ghena ma ghanan jügha alentsen sen nu Sinai Yikha kemethawa wi waya kemehai kezü pi ma cü.

⁹Ma ciwi wa aghaja alonshiku kesü wi jen. Zuli Apvüwa na ma wi khi, “Elijah no hewi mangwa saben nu?”

¹⁰Ma luneng, “Kemisintsa Apvüwa Anyiza, hi keshüthangla no kekuli ketan saden. Isala Israel nyithu na no ssinu cenkethenjüh tsü pakhhidha. Hi hi ketan sadha, nu mathu na hi la pathiale saben le!”

¹¹Apvüwa na ma wi khi, “Wala ayikha shoni wi ituwi nganlo.” Tsaseng wi Apvüwa na tsü pvüdhi wa nu ameghü kesho khang ntsa kesun pi yyishiphon thu pvükhhia nu alonshithu pacha zighe— isala Apvüwa na ameghü witsü nmi. Ameghü na nshola, nu tsaseng wi ameghükuju— isala Apvüwa na ameghükuju witsü nmi.

¹²Ameghükuju seng wi anni kesü shhugho — isala Apvüwa na anni witsü nmi. Nu anni seng wi ciwi ahhai nkhena kesa kesü gho.

¹³Elijah na tsü zakeya wi ma athsü pi ma mmi shanpvü nu wa alonshiku kedulen wi ngan wa. Ahhai tsüna ma wi khi, “Elijah no hewi mangwa saben nu?”

¹⁴Ma luneng, “Kemisintsa Apvüwa Anyiza, hi keshüthangla no kekuli ketan saden. Isala Israel nyithu na no ssinu cenkethenjüh tsü pakhhidha, no kekinyipen yasa, nu atusenjüh-kechüthu tsüdi pathikhidha. Hi hi ketan sadha, nu mathu na hi la pathia le saben le!”

¹⁵ Apvüwa na khi, “Damaska kete wi aghansha witsü wa nenglo, tsaseng wi anyunutiwa wi du adeli pi Hazael nyen pi Siriya kadimi sa thsülo.[7]

¹⁶ Nimshi tsa Jehu pi Israel kadimi sa thsü, nu Abel Mehola wina keghowa Shafat tsa Elisha pi nshiwa sa atusen- jühkechüwa sa thsülo.

¹⁷Anyi kesü le kesü lela Hazael tuwi na bvü keyawa Jehu na ma pathiaben, nu kesü le kesü lela Jehu tuwi na bvü keyawa Elisha na ma pathiaben.

¹⁸ Isala hi anyi hazar tagü pi Israel wi hang thsüden— mathu tsüdila ijühkeya wi ben nu Baal tuwi nkukedu nyelela ma tsikezhü tsü nkimang.”

¹⁹Elijah na tsü teshi nu wala Elisha na amesü süpon kegweghe kesü ssinu allichhü keben muya; ma tuwi amesü süpon kegweghe taghakeni na ben, nu ma asakhenwa tsü ssinu chhüben. Elijah na ma thsü khushiya nu pi Elisha miwi chicüa.

²⁰Elisha na tsaseng wi ma mesü süponthu teshi theng nu Elijah jügü wa ma wi khi, “Hi yala wa iba, ijja kimang nu kemehaiwa sa benlo kiza yathsü nu tsaseng wi hi no gweghe wa tenle.” Elijah na luneng, “Anlo, wa nenglo. Hi no khen nbenle!”

²¹Isanu Elisha na ma mesü süpon khang witsü whala tsüthu pathi, nu asunkeqhan chan tsüpi anni sa nu asa tsü shvuya. Ma asa pi anyithu cü nu mathu na tsü dsaya. Tsaseng wi ma wala Elijah kekiqawa sala ma nie wa.