Read Northern Rengma Naga 1 KADIMITHU 2 Bible Online

1 KADIMITHU 2 - Northern Rengma Naga bible

1 KADIMITHU 2

¹David na shü keten pang wi ma tsawa Solomon cichi nu ma kecükegwe sakhenthu ha pi cü:

²“Hi keshü tsüna gho cudha. Kempvüza sa nu lebenzü benyalo,

³nu Apvüwa n-Nyiza na mangwa salo no kiza khe tsü salo. Mosa yenwa wi zhüketheng ti ma ayenkhukechithu nu ayenthu tsüdi nieyalo, isanu no khiewa wa khe no kekuli tsüdi wi mehai kayi yale kesalina.

⁴Keujüla no ma jühkina lethu, Apvüwa na hi kiza la ishichübvüghathu na mathu leben nu mathu kahang tsüdi sen nu kiden-kesha jühtsentsa sala ma yenkhukechithu tsü niekeben chu mathu na Israel miwi kekhang sentenle kesa ma hi wi khishi ketheng jüh tsü saben.

⁵“Ciwila pala pahan benle. Joab na imiwi mangwa sa khe no chüben. Ma Israel süpahizi benchü keni Ner tsa Abner nu Jetter tsa Amasa manyi pathi cüle. Aghi wi keshüthu jukhikeya wina ma kecca tsüwi manyi pathi kesa tsü no chüben. Ma kesami nkemi nyi pathi kesa ghena hi khili akhhi tsü pvüben, nu hi tsü ghena ketizensa benle.

⁶No khati kesau khe chüben; no ma ya keshü matsü wi shü thsü yishüle.

⁷ “Isala Gilead wina keghowa Barzillai tsathu tuwi ccatssü nu mathu noncca yalo, kepaghenanye hi ncünyuwa Absalom tubvü keten wi mathu na ituwi ccatssü ntsa sale.

⁸“Ciwi Benjamin nyi Bahurim nyutiwa wina keghowa Gera tsa Shimei la ben. Hi Mahanaim wi kewa ghanan wi ma hi kishencü ntsa sa, isala ma Jordan Ghaku wi gho hi kemetu wi hi ma pathi nbenle kesa Apvüwa nyan wina ijüh khishichi pi ma cüa.

⁹Isala no ma nmetenmeshala nbvü thsü lalo. No mangwa kesau khe chüben, nu na ma pi shü thsü nsathu yishüle.”

¹⁰David na shü nu pi David Nyunutiwa wi vhüa.

¹¹ Ma Israel miwi amapi jügha kadimi sa, Hebron wi amapi tagü nu Jerusalem wi amapi changha nu kecheng kekhangsen.

¹²Solomon na ma ba David shiwa sa kadimi saya, nu ma kadiyyi na zükeqhhe piekiya.

¹³Tsaseng wi Haggith tsa Adonijah na Solomon jja Bathsheba wi wa. Nzawa na ma keü, “No hhainan keghowa ha apvüshang kemehai ghena ma?” Ma luneng, “Anle,”

¹⁴nu ma khineng, “Hi pala pahan no keü tenle.” Nzawa na khi, “Mangwa nu?”

¹⁵Ma luneng, “No chüben, hi kadimi kesaule nu Israel nyithu tsüdila tsü nondi keben. Isala tsüti nsala nu icünyuwa na kadimi sayadha, kepaghenanye tsüna Apvüwa kemeshen le.

¹⁶Nu hi khili no wi pala kesü khieben; nchala ijüh ha nhhaghe lalo.” Bathsheba na keü, “Mangwa nu?”

¹⁷ Ma luneng, “No nchala Kadimi Solomon wi — ma njüh hhaghe nben kesa hi chüben — hi ya Shunem wina kegho ghala Abishag tsüpi iwubvü saya thsülo keü nanlo.”

¹⁸Nzawa na luneng, “Mehaiben, hi nghena wala kadimiwa ccüneng nanden.”

¹⁹Tsalina Bathsheba na Adonijah mithon sa wa kadimiwa ccüneng. Kadimiwa na shagha ma jja shalom sa nu ma tuwi kukedu. Tsaseng wi ma kadipen wi donkiya nu nyu ya apen kepa wi kesü piegho nu nzawa pi ma na ajewa donki thsüa.

²⁰Nzawa na khi, “Hi no wi pala kizzakeu kesü keü ten na, nchala ijüh nhhaghe lalo.” Ma keü, “Ijja, mangwa nu? Hi njüh hhaghe nbenle.”

²¹Nzawa na luneng, “Ncünyuwa Adonijah yala Abishag pi ma wubvü saya thsülo.”

²²Kadimiwa na keü, “No mangkesa na hi Abishag pi ma cülo keü ben nu? No hi kadipen la pi ma cülo kesa keü ben man! Anle, ma ibiwa, nu keqhaikediwa Abiathar nu Joab manyi na ma wiwa saben.”

²³Tsaseng wi Solomon na Apvüwa nyan wina kekishen kesü sa, “Adonijah na ha kekhie ghena hi ma kahangli pi tsü dhi thsü nsa lethu, Anyiza na hi pathi kesawa salo!

²⁴Apvüwa na imiwi iba David kadipen satezü cüdha; ma ma jühkhukechi kenie wina kadiyyi pi hi nu ishicübvüghathu cüdha. Hi nansü Adonijah pi shü thsüaden kesa hangkebenwa Apvüwa nyan wina kishenben!”

²⁵Tsalina Kadimi Solomon na ahza pi Benaiya cü nu ma wala Adonijah pathia.

²⁶ Tsaseng wi Kadimi Solomon na keqhaikediwa Abiathar wi khi, “No diyyiwa Anathoth wi njjen wi whalo. No pi shü thsü qole, isala hi khili no pi shü thsü meten, kepaghenanye no iba David gweghe keben wi Apvüwa Cenkethenjüh Khitson tsü kenonccawa sa, nu no ma gükeccü tsüdi wi ma gweghe benle.

²⁷ Isanu Solomon na Apvüwa kekuli wi keqhaikedi kesü sa keben Abiathar khushi pia. Tsalina Apvüwa na Shilo wi keqhaikediwa Eli nu ma shicübvüghathu ghena kekhi tsü ntsakhiwa sacen thsüa.”

²⁸Joab na mangwa khati sadha khe tsü zaya. (Ma Adonijah khe Absalom nkiqa.) Tsalina ma bvü wa Apvüwa ketenpen Nithsüjjen wi dula kekinyipen ghacüthu ghansenya.

²⁹Joab na bvü wa Nithsüjjen wi kekinyipen kete wi benle kesa jühtheü tsüna Kadimi Solomon cukeya wi ma nyilo kesü kesun pi Joab wi ma mangkesa na bvü wa kekinyipen kete wi ben nu kesa keü thsü. Joab na ma Solomon kemessi ghena bvü sen nu Apvüwa wi wale kesa luneng. Tsalina Kadimi Solomon na Benaiya ya wala Joab pathilo kesunchia.

³⁰Ma Apvüwa ketenpen Nithsüjjen wi du nu Joab wi khi, “Kadimiwa na no shhugholo ahza khuchiben.” Joab na luneng, “Nmale, hi hewi shüaden.” Benaiya na kadimi wi wha neng nu Joab na mangwale khi khe pi ma kiza.

³¹Solomon na khineng, “Joab na kekhi ti salo. Ma pathi nu pi vhülo. Isanu hi le David shicübvüghathu kesü le kesü sa lela Joab na kesazzi nkemi nyi kepathi ghena tsü akhhi tsü npvü nengdha.

³²Joab na iba David nchü thsüla mathu pathi kesa ghena Apvüwa na ma meten cüben. Joab na ma miwi kemehaiki keni kesami nkemi nyi Israel süpahizi benchüwa Abner, nu Judah süpahizi benchüwa Amasa pathia.

³³Manyi kepathi ghena kemeten tsüna anuphanla Joab nu ma shicübvüghathu miwi benden. Isala Apvüwa na keshüthangla haicenkeya pi David shicübvügha ma kadipen wi kebenthu cüben.”

³⁴Tsalina Benaiya na Apvüwa ketenpen Nithsüjjen wi wala Joab pathia nu ma pi ma jjen ayyikeshü witsü vhüa.

³⁵Kadimiwa na Benaiya pi Joab pen wi süpahizi benchüwa nu Zadok pi Abiathar pen wi keqhaikediwa sa thsüa.

³⁶Tsaseng wi Kadimiwa na nyu kesun pi Shimei cichi nu ma wi khi, “No ketanla nghena he Jerusalem wi ajjen kesü sayalo. Ciwi hang nu anyunutiwa nteshila.

³⁷Keujüla no tsü teshi nu Kidron kuza tsü thenkeghe wa lethu no shü metsiben — nu tsüna no ketanla no meshensa yaben.”

³⁸Shimei na luneng, “Njenkeben Kadimiwa, tsüna mehaiben le. Hi no kekhi ti saaden.” Tsalina ma matsü kesiela Jerusalem wi hang.

³⁹Isala amapi kecheng seng wi Shimei nssümagha keni na bvü sen nu Gath kadimiwa Maaka tsa Akhish wi wa. Shimei na manyi na Gath wi benle kesa zakeya wi

⁴⁰ma kedonkipen pi ma gada miwi chiya nu Gath wi kadimi Akhish wi ma nssümagha keni tsü bha wa. Ma wa manyi muya nu ssinu ajjen wi gho neng.

⁴¹Solomon na Shimei khati sa khe zakeya wi

⁴²ma Shimei cichi nu keü, “Hi no Jerusalem nteshi lalo kesa Apvüwa nyan wina no wi khishichidha. Nu no keujüla tsüti nsa lethu no pi shü thsü metsi benle kesa hi no kitsanchidha. No anlo khi nu tsü nie benle nkhi kwe?

⁴³Isalethu, mangkesa na njüh khishi kechi tsü bheghe nu hi ayenkhukechi tsü n-niela nu?

⁴⁴No kheni iba David tuwi kesazzi tsüdila no mehaitsü chüben. Apvüwa na tsü ghena no meten cüben.

⁴⁵Isala ma sawegü pi hi cüben, nu ma David kadiyyi sapi anuphanla yazishu sa cüaben.”

⁴⁶Tsaseng wi kadimiwa na ahza pi Benaiya cü nu ma wala Shimei pathi thsüa. Solomon na khili tsü kekhang maben senyadha.