Read Northern Rengma Naga 1 KADIMITHU 3 Bible Online

1 KADIMITHU 3 - Northern Rengma Naga bible

1 KADIMITHU 3

¹Solomon na Ejipt kadimiwa nga yaya nu ma ssinu apfüwa saya. Ma nzawa ssinu David Nyunutiwa wi gho ma kadijjen, Kekinyijjen, nu Jerusalem khweti kevü npi sacenkeya chu ciwi hang.

²Apvüwa ghena kekinyijjen kesüla npi saya, tsalina anyithu na khili lela kekinyipen kepapa kesa wi ahhanshathu saden.

³Solomon na Apvüwa ghali nu ma ba David kecükegwethu tsü nieden, isala ma asahangthu la pathi pi kekinyipen kejon wi ahhanshathu sa nu kinyi.

⁴Matsü kesü wi ma Gibeon wi wa ahhansha sapi kinyi, kepaghenanye ciwi kekinyipen kemechan ntsawa na ben. Ma kheni ciwi mecang pi kekinyi meza meza sapi kinyidha.

⁵Tsü ghaja Apvüwa na aman wina ma tuwi gho nu ma wi keü, “Hi mangwa pi no cü thsü mvu ben nu?”

⁶Solomon na luneng, “No keshüthangla kaghali keti pi nmaghawa David ccücale, nu ma ntuwi tsatan, jühtsentsa, nu kemeshonwa sa. Nu no ghaliki kesa keti pi ma ccüca nu atsa kesü nansü ma mithon wi kekhangsen kebenwa pi ma cüle.

⁷O Apvüwa Anyiza, hi ghanyi mtsü nu kekhang kesen yen nchü lela no hi yala iba shiwa sa kadimi saya thsüdha.

⁸Hi hewi no anyithu kessi pi n-nyithu saya kesathu jawi ben, anyi na ji ntsa nu mathu sikhiya nben.

⁹Tsalina hi kemeshon nu kemehai keteshi chü kepapa kesa sen nu n-nyithu miwi kekhang nsenthu yishü kebenwa kemetsa tsüpi hi cülo. Nyelethu, hi khatinu n-nyitenti keti ha miwi kekhang senya mehai nu?”

¹⁰Solomon na ha kekhie ghena Apvüwa na ma nen ntsa saya,

¹¹tsalina Apvüwa na ma wi khi, “No nghena kesie kahang, nyelela keben nyelela nghinyithu keshü ghena kekhiewa nyela kemeshon wi kekhang senkeya kemetsa kekhie ghena

¹²hi no mangwa khie khe sapi no cüaden. Hi anyi thola ntuwi nyelela nseng wi lela mu nkeya kemetsa nu chüshikeya pi no cüaden.

¹³Hi no nkekhie wi la pi no cüaden; kadimi kepathu tsüdi miwi hi keben-keyeng nu kekinyikü pi no cüaden.

¹⁴Nu keujüla no nba David ti iyenkhukechi nu iyenthu tsü kina nu nie lethu, hi kesie kahang la pi no cüden.”

¹⁵Solomon na shagha nu Anyiza na aman wi ma ccünengle kesa chüya. Tsaseng wi ma Jerusalem wi wa nu Apvüwa Cenkethenjüh Khitson tuwi ngan nu mecang pi kekinyi nu kecca ghena kekinyi sapi Apvüwa cü. Tsaseng wi ma kekhu wi kedithu tsüdi ghena ma kemishu kesü sa.

¹⁶Ghanan kesü keqheza menkedsa nza meshu keni na Kadimi Solomon tuwi gho.

¹⁷Manyi meshu kesü na khi, “Njenkeben Kadimiwa, nza hawa ishinyi gweghe ajjen kesü wi hangden, nu ma ajjen wi keben wi hi atsa kesü pvüghaya.

¹⁸Ghanan keni seng wi ma la atsa kesü pvüghaya. Ishinyi ketan khe thola ajjen ciwi nmi.

¹⁹Ghaja kesü wi ma nchüla khapeghe wa ma tsa nenthia.

²⁰Ma aghaja wi hi jen keben wi shaghala ikete wi itsa pie wa ma we wi chiya, nu ma tsa keshüwa pie gho iwe wi chitheng cüle.

²¹Hi ghanenwa wi shagha itsa ni cüle wa nan tsüna keshü muya. Hi tsü ghang kaketsü sa wa nan tsüna itsawa nkenye muyale.”

²²Isala nza kepawa na khi, “Kahangwa ha itsa, nu keshüwa tsüna ntsa le!” Nza atuwa tsüna khineng, “Nyele! Keshüwa tsüna ntsa, nu kahangwa tsüna ijile!” Tsalina manyi na Kadimiwa tuwi keccücanli.

²³Tsaseng wi Kadimiwa Solomon na khi, “Nshinyi qho atsa hang kebenwa tsüna ma jile nka, nu keshüwa tsüna kepawa jile khiben.”

²⁴Ma njünnu kesü sengholo kesunchi, nu tsü sen kegho wi

²⁵ma khi, “Atsa hang kebenwa tsü süthi pi keni saya nu tsü gishü pahan han pi manyi kaghapeng cülo.”

²⁶Ajja ntsawa na ma leben wi ma tsawa tizen ntsa nu kadimiwa wi khi, “Njenkeben Kadimiwa, tizenthu atsawa tsü npathi lalo! Tsüpi ma cülo!” Isala nza kepawa na khi, “Tsüpi ishinyi qho ncüla, tsü süthi pi keni salo.”

²⁷Tsaseng wi Solomon na khi, “Atsawa tsüpi npathila! Tsüpi nza atuwa tsü cülo — ma atsa tsüwa jja ntsawa le!”

²⁸Khathansha wi Israel nyithu na Solomon na südhekecü tsü zaya khe mathu tsüdila ma kinyikü ntsa sa, kepaghenanye mathu na tsü meten na Anyiza na kemeshon wina kicennali südhekeya kemetsa pi ma cütheng kesa chüya.