Read Northern Rengma Naga 1 KADIMITHU 5 Bible Online

1 KADIMITHU 5 - Northern Rengma Naga bible

1 KADIMITHU 5

¹Tur wi Kadimi Hiram na keshüthangla David pvüshang kesü sagho, nu ma Solomon na ma ba shiwa sa kadimi sayadha le kesa zakeya wi ma mithonthu kesun pi Solomon wi chi.

²Solomon na ketsijüh ha kesun neng pi Hiram wi chi:

³“No chüben, iba David na ma kevü diyyithu tsüdi wi aghinyi ssinu aghikesa nhandhila kesalina Apvüwa na ma ghinyithu tsüdi miwi khangkeya pi ma npi kecü chu ma Apvüwa ma Nyiza kekinyi ghena kekinyijjen kesü tsü sa meyala ghole.

⁴Isala Apvüwa iNyiza na khilitsü hi kevü tsüdi wi kecca pi hi cüdha. Hi ighinyithu nmidha, nu ciwi ssikesali kesa kemessi nmidha.

⁵ Apvüwa na iba David wi ‘Ntsa, hi ma pi nshiwa sa kadimi sa thsü ketenwa tsüna ighena kekinyijjen kesü sa ben’ khishitheng. Nu hi khili Apvüwa iNyiza kinyile kesa ghena kekinyijjenwa tsü sale südheyadha.

⁶Tsalina n-nyithu kesun pi Lebanon wi ighena sedar chanthu shüchi thsülo. Inyithu na mathu gweghe nu kuliben, nu hi no khaju südhe cü khe akutimen pi mathu cüaben. No chüben, inyithu na n-nyithu ti achan nshüchi chüle.”

⁷Hiram na Solomon wi ketsijüh mukeya wi ma nonghe ntsa sa nu khi, “Apvüwa senglo, nansü ma atsa kemetsa kesü pi David cü nu pi ma shiwa sa mizzatenti keti tsüwa miwi kadimi saya thsüdha!”

⁸Tsaseng wi Hiram na ketsijüh ha pi Solomon wi chi: “Hi no ketsijüh tsü muyadha, nu no kekhie tsü sale kidenyadha le. Hi sedar nu asahong chanthu khuchiben.

⁹Inyithu na Lebanon wina achan kedhithu tsü bhenghu pi atssükedone miwi na lle sen nu no kekhi pen ghüsa witsü dugho thsüaben. Ciwi inyithu na tsüthu lisha cü lethu, n-nyithu na tsüthu nonccayaben. Ndulu wi lethu, no inyithu kedsakejjü pi cü thsü mvu benle.”

¹⁰Tsalina Hiram na Solomon nsenthu keyishü sedar nu asahong chanthu tsüdi pi cü,

¹¹nu Solomon na amapi kaghapengla awhengsu nu awheng metric ton hazar keni nu oliv deli kemetha liter hazar meza mejü pi Hiram nyithu ghanja.

¹²Apvüwa na ma khishi ketheng tsü nie nu kemetsa pi Solomon cü. Hiram nu Solomon manyi jüwi kecca na ben, nu manyi na keponghu kesü sa.

¹³Kadimi Solomon na Israel yyi tsüdi wi kekuli nyi hazar changha saghuya,

¹⁴nu Adoniram pi mathu kenonccawa sa thsüa. Ma mathu gishü pi anyi akhang kecheng kesü wi hazar tagha saya, nu akhang kesüsü na asha kesü wala Lebanon wi ben nu kheneng gho asha keni ajjen wi ben thsü.

¹⁵Solomon na anyi hazar achentazen pi yyishiphon diyyiwa wi alon hah, nu hazar achentagü pi tsü pvü thsü,

¹⁶nu ma anyi hazar kecheng nu meza kecheng pi mathu aliwa sala mathu kekuli tsü ghang thsüa.

¹⁷Kadimi Solomon na ahza khukechi kenie wina mathu na Kekinyijjenwa giketegü ghena alon ketiti kemehai hah.

¹⁸Solomon nu Hiram manyi kekuli nyithu nu Biblo nyunutiwa wina kegho nyithu na Kekinyijjenwa kesa ghena alon nu achanthu kiden-kesha.