Read Northern Rengma Naga 1 KADIMITHU 9 Bible Online

1 KADIMITHU 9 - Northern Rengma Naga bible

1 KADIMITHU 9

¹Kadimi Solomon na Kekinyijjen nu ma kadijjen nu ma samvu keben tsüdi sacenkeya seng wi

²Apvüwa na kheni Gibeon wi ti kheneng ma tuwi gho.

³Apvüwa na ma wi khi, “Hi no kekhie tsü zayadha. No anuphanla hi kekinyipen sa thsüle Kekinyijjen kesawa ha hi satemethadha. Hi matsü tsüdi wi la tsü miwi ben nu tsü hieben ben.

⁴Keujüla no nba David ti nleben tsentsa nu kemeshonwa wina hi kekuli sa, nu iyenthu yaya nu hi salo no kekizathu tsüdila sa lethu,

⁵hi nba David kizala ma shicübvüghathu na keshüthangla Israel miwi kekhang senbenle khishi ketheng tsü sa ben.

⁶Isala keujüla no nu nshicübvüghathu na hi n-niela, nu iyenthu nu ayenkhuchi pi no kecüthu meyala, nu acenpvü kepathu kinyi wa lethu,

⁷hi ayyi pi inyithu Israel cü ketheng witsü mathu khushi piaben. Israel na anyi tsüdi tuwi nankeqhewa nu nyu pangbi sa ben.

⁸Kekinyijjenwa ha yasa pi abhon sa ben, nu kahe wi anyi ha pvüdhi kewathu tsüdila qhethiketen nu amansa ben. Mathu na keüben, ‘Mangkesa na Apvüwa na ayyi ha miwi nu Kekinyijjen ha miwi hati sadha nu?’

⁹Anyithu na luneng ben, ‘Hawa ha mathu na Apvüwa mathu Nyiza Ejipt wina mathu bamyithu ssi keshhughowa tsü teshi kesa ghena le. Mathu na acenpvü kepathu ssinu ashusa nu tsüthu kinyi wale. Tsalina Apvüwa na ketizenkesa ha sengho mathu miwi chidha.’ ”

¹⁰Solomon na Kekinyijjen nu ma kadijjen kesa na amapi ngwe tsü sa.

¹¹Tur wi Kadimi Hiram na kekuli ha ghena nsenthu keyishü tsüdi sedar nu asahong chanthu nu suna tsüdila khuchi pi ma cü. Tsü sa cenkeya seng wi Kadimi Solomon na Galilee yegu wi anyutithu ngwe pi Hiram cüa.

¹²Hiram na tsüthu ghangle wa, isala ma tsüthu n-nenla.

¹³Tsalina ma Solomon wi khi, “Icünyuwa, no anyuti hathu hati kesa pi hi cü benla!” Tsü jjügi ghena khilila apen tsüpi Kabul [5] le khiden.

¹⁴Hiram na suna kilogram hazar mejü miwi pi Solomon wi kesun chicü.

¹⁵Kadimi Solomon na meten pi kekuli sa kebenthu ssinu Kekinyijjen nu ma kadijjen sa, anyunutiwa khweti tsü zhüyale kesalina ayyi pvüpi anyunuti na nishuwa tsü pongya. Ma tsüthu ssinu anyunuti hathu la sapfüneng Hazor, Megiddo, nu Gezer.

¹⁶(Ejipt kadimiwa na Gezer ssikaghashen nu tsü nkaya, ciwi kahangthu pathia nu anni pi anyunutiwa tsü mecang chia. Tsaseng wi ma nga na Solomon wi n-nukewa wi ma tsüpi keshanyi ju sa cüa,

¹⁷nu Solomon na tsü sapfüneng.) Solomon na meten pi kekuli sa kebenthu ssinu Beth Horon Ssanwa,

¹⁸Balaath, Judah ghansha wi Tamar,

¹⁹ma kedsakejjü pi kethengpen nyunutithu, ma goru nu gorugari nyunutithu, nu ma Jerusalem, Lebanon, nu ma kadiyyi kepa wi ma saya mvu keben tsüdila saya.

²⁰Israel nyithu na kheni ayyi nka pi mathu ji sakeya wi npathila kesa Kanaan nyi shicübvüghathu tsü Solomon na meten pi ma kekulithu sa. Hathu na Amor, Hitti, Periz, Hivi, nu Jebus nyithu, mathu shicübvüghathu na nssümaghathu sagho nansü kecu saben.

²²Solomon na Israel nyithu pi nssümaghathu nsa thsü, tsüthu na ma süpahithu, kedithu, benchüthu, gorugari meza miwi kedithu, nu goru kessithu sa thsü.

²³Ciwi kedithu 550 na Solomon na ajjen kepapa kesa wi meten pi kekuli sa kebenthu miwi kedi sa.

²⁴Solomon wubvü Ejipt kadimiwa nga tsüna David Nyunutiwa wina Solomon na ma ghena sa kecü kadijjen witsü kewa seng wi Solomon na ayyi pvüpi anyunuti na nishuwa tsü pongya.

²⁵ Solomon na amapi kesü wi ma kekinyipen sapi Apvüwa kecü tsü miwi kecheng tughu mecang pi kekinyi nu kecca ghena kekinyi saden. Ma hankedemvu la mecang pi Apvüwa cü. Isanu ma Kekinyijjenwa tsü sacenya.

²⁶Kadimi Solomon na aghihunjjen akhang kesü sapi Edom yyiwi, Aqaba Tssükevü ghüsa wi Elath kete Eziongeber wi chi.

²⁷Kadimi Hiram na ma ghihunjjenthu wi atssükedone wi kewachünyi pahan kesun pi Solomon nyithu gweghe kuli thsü.

²⁸Mathu na Ofir yyiwi wa nu ciwi suna kilogram hazar tagha- mejü miwi pvügho Solomon cü.