Read Northern Rengma Naga 2 KADIMITHU 1 Bible Online

2 KADIMITHU 1 - Northern Rengma Naga bible

2 KADIMITHU 1

¹Israel Kadimi Ahab na keshü seng wi Moab diyyiwa na Israel matangla shun shagha.

²Israel Kadimi Ahaziya na Samaria wi ma kadijjen catu wina qancadu nu mesa-mena keti sa. Tsalina ma nyilothu pahan kesun pi Filistin nyunuti Ekron wi acenpvü Baalzebub wi ma kesakinaa hawi mehaiya benla nye khe kecenkinali wa thsüa.

³Isala Apvüwa nyilo na Tishbe wina kegho atusenjüh- kechüwa Elijah kiza nu wala Kadimi Ahaziya nyilothu metu nu mathu wi keü thsü, “Nthu mangkesa na wala Ekron cenpvüwa Baalzebub ccüneng ten nu? Nthu na Israel jawi Anyiza nmile kemeshen ghena kwe?

⁴Tsalina Apvüwa na hati khiben le kadimiwa kiza lo, ‘No kemetsa- kemena witsü mehaiya nben; no shüaben!’ ” Elijah na Apvüwa na ma kekiza ti sa,

⁵nu nyilothu na kadimiwa wi kheneng gho. Ma mathu keü, “Nthu mangkesa na kheneng ghodha nu?”

⁶Mathu na luneng, “Anyi meshu kesü ghola ikhang metu nu ikhang na kheneng whala Apvüwa na hati no kiza lo khiben le kiza le, ‘Mangkesa na no nyilothu kesun pi Ekron cenpvüwa Baalzebub ccüneng wa thsü ben nu? No Israel jawi Anyiza nmile kemeshen ghena kwe? No kemetsa-kemena witsü mehaiya nben; no shüaben!’ ”

⁷Kadimiwa na keü, “Anyi tsüna matsi khati kesa nu?”

⁸ Mathu na luneng, “Ma asahyu pi kesa agwomejuwa nu ageshi keqhan pvütenle.” Kadimiwa na khi. “Tsüna Elijah le!”

⁹Tsaseng wi ma anyi deni kesun pi kedi kesü gweghe wala Elijah ssi gholo sa. Kediwa na wala ma ayyishiphon kesü miwi donki keben muya nu ma wi khi, “Anyiza nyiwa, kadimiwa na no dugholo khiben le!”

¹⁰Elijah na luneng, “Keujüla hi Anyiza nyiwa lethu, tangwi anni na dugho no nu n-nyithu mecangthi kesawa salo!” Zuli anni na dugho kediwa nu ma nyithu mecangthia.

¹¹Kadimiwa na kedi kepa wi la kesü pi anyi deni gweghe kesunchi, nu mathu na gila Elijah wi khi, “Anyiza nyiwa, kadimiwa na no khili dugholo khiben le!”

¹²Elijah na luneng, “Keujüla hi Anyiza nyiwa lethu, tangwi anni na dugho no nu n-nyithu mecangthi kesawa salo!” Zuli anni na dugho kediwa nu ma nyithu mecangthia.

¹³Kadimiwa na kheneng kuti anyi deni pi kedi kesü gweghe kesunchi. Ma ayyishiphon wi gila Elijah tuwi akhhutsü nu khi, “Anyiza nyiwa, hi nu inyithu nantizen chi cülo. Ikhang kahangli heisha cülo!

¹⁴Kepa wi kedi keni nu manyi nyithu na tangwi anni na dugho mathu mecangthidha; isala tizenthu hi nantizen chicülo!”

¹⁵Apvüwa nyilowa na Elijah wi khi, “Nmessila nu ma gweghe cülo.” Tsalina Elijah na kediwa gweghe kadimiwa wi wa,

¹⁶nu ma wi khi, “Apvüwa na hati khiben le: ‘No nyilothu kesun pi Ekron cenpvüwa Baalzebub ccüneng wa thsüa — ciwi Israel jawi ccüneng ya kemehai Anyiza nkemi ti kesalina no mehaiya nben; no shüaben!’ ”

¹⁷Apvüwa na Elijah wina kekhi ti Ahaziya na shüa. Ahaziya na atsa nmi, tsalina ma cünyuwa Joram na ma shiwa sa, Judah kadimiwa Jehoshafat tsa Jehoram na kadikesa keniwa mapi wi kadimi saya.

¹⁸Kadimi Ahaziya kekuli cükithu tsüdila Israel kadimithu cükikezhü wi zhü theng.