Read Northern Rengma Naga 2 KADIMITHU 12 Bible Online

2 KADIMITHU 12 - Northern Rengma Naga bible

2 KADIMITHU 12

¹Israel Kadimi Jehu na kekhang kesen mapi tagüwa wi Joash na Judah Kadimi saya, nu ma Jerusalem wi amapi jügha kekhang sen. Ma jja na Beersheba nyunutiwa wina kegho Zibia.

²Joash na ma kahang chu Apvüwa tuwi kemeshonwa tsü sa, kepaghenanye Jehoiada keqhaikediwa na ma kecükegwe cü.

³Isala Anyiza nkechüthu kekinyipenthu tsü meyasa, nu anyithu na ciwi ahhansha sa nu hankedemvu mecang pi kinyi.

⁴Joash na keqhaikedithu cichi nu nyu na ahhansha kesa ghena apisa pi Kekinyijjen wi kechi, ahhansha kesa wi keshüthangla pi chi keten nu papa kenen wina ajuthu khukechi pisa keni qho wi mesha pi thengyalo kiza.

⁵Keqhaikedi kesüsü na anyithu na apisa khukechi tsü noncca, nu apisa tsüpi Kekinyijjen nsapfüthu keyishüthu tsü sale sa.

⁶Isala Joash na kekhang kesen mapi ngwe nu kechengwa wi lela keqhaikedithu na khiela Kekinyijjenwa tsü npi sapfü.

⁷Tsalina ma Jehoiada nu keqhaikedi kepathu cichi nu mathu wi keü, “Nthu mangkesa na Kekinyijjenwa tsü nsapfüla ben nu? Khili nten nthu na pisa mukeya tsüpi nthengla nu khuchilo, isanu tsü sapfüya thsüle kesalina.”

⁸Keqhaikedithu na mathu na anyithu wi apisa kejon meyadha nu Kekinyijjenwa tsü la nsapfüdha le kesa cenya.

⁹Tsaseng wi Jehoiada na akhitson kesü saya nu ma kishan miwi maku bhiya nu pi Kekinyijjen kedulen na ajewa kekinyipen kete wi tsü chia. Kedulen wi hie keben keqhaikedithu na kinyi keghothu na apisa khukechi tsüdi pi akhitson non witsü chia.

¹⁰Khathansha wi akhitson wi apisa na kejon sa khe kadijjen wi kezhüwa nu Keqhaikedi ntsawa manyi na ghola rükatssü tsü meyisha pi whu yaden.

¹¹Manyi na tsü centi zhüya kesa seng wi rükatssü tsüpi Kekinyijjen wi kekulithu kediwa cüden, nu tsüthu tsüpi chan kecüthu, ajjen kesathu,

¹²alon pi kezhüthu, nu alon kahathu kutimen sa, pila achan nu alonthu shü, nu pi kepa wi nsathu keyishü tsüdi ghena saya.

¹³Isala apisa tsü kesüla pi rükatssü pi kesa ahyi, akhuzza, tutuwa, nyelela ahulathu kenoncca tsanqaithu, nyelela rükatssü, suna pi kesa tsanqaithu kesa kutimen nsa.

¹⁴Ha tsüdi pi kesapfü ghena kekuli kesathu kutimen nu atsanqaithu keshü men wi sen.

¹⁵Anyi kekuli keghangthu na atsentsa kesalina mathu apisa pi nyu kecü cüki kezhüthu tsü nsenla mehai.

¹⁶ Apisa pi kedhineng ghena kekinyi nu kesami ghena kekinyi khukechi tsüpi akhitson witsü nchi; tsüna keqhaikedithu ji.

¹⁷Tsü tsüwi Siriya Kadimi Hazael na Gath nyunutiwa tsü ssisa nu nkaya; tsaseng wi ma wala Jerusalem ssisale südheya.

¹⁸Judah Kadimi Joash na ma tuwi kadikesathu Jehoshafat, Jehoram, nu Ahaziya na satemetha pi Apvüwa cü kesa kekinyithu tsüdi, pi ma kekinyithu, nu pi Kekinyijjen nu kadijjen wi keben suna tsüdi saghuya, nu tsüthu pi aju kesü sala Kadimi Hazael wi kesun chia; tsaseng wi Hazael na Jerusalem wina ma süpahizi ssinu bvüa.

¹⁹Kadimi Joash kekuli cükithu tsüdi pi Judah kadimithu cükikezhü wi zhü theng.

²⁰Kadimi Joash kedithu na acho sapi ma shun, mathu meshu keni, Shimeath tsa Jozakar nu Shomer tsa Jehozabad manyi na Jerusalem na niduwa ayyi pvü pi pong nu ma miwi ajjen sa ketheng wi Silla wi kecülen witsü ma pathia. Joash pi David Nyunutiwa wi kadi shüjjenthu wi vhüa, nu ma tsa Amaziya na ma shiwa sa kadimi saya.