Read Northern Rengma Naga 2 KADIMITHU 13 Bible Online

2 KADIMITHU 13 - Northern Rengma Naga bible

2 KADIMITHU 13

¹Ahaziya tsa Joash na Judah Kadimi saya nu kekhang kesen mapi ngwe nu kechengwa wi Jehu tsa Jehoahaz na Israel Kadimi saya, nu ma amapi tagha nu tagü Samaria wi kekhang sen.

²Ma Kadimi Jeroboam ti sami pi Apvüwa shun nu Israel ssi wa kesami wi chia; ma khiela ma nkemehai lenthu tsü nteshi.

³Tsalina Apvüwa na Israel miwi aghepvü nu Siriya Kadimi Hazael nu ma tsa Benhadad yala matsü kejon wi Israel chaya thsüa.

⁴Tsaseng wi Jehoahaz na Apvüwa wi kekhie sa, nu Apvüwa na ma kekhie lunengchi; kepaghenanye Apvüwa na Siriya Kadimiwa na khatila Israel nyithu pasha ben khe tsü muya.

⁵Apvüwa na Israel ccülikesawa kesü kesunchi, nu ma Siriya nyithu kwen wina mathu kekasha cüa, nu tsüna Israel nyithu na kheni ti cca hangya.

⁶Isala mathu na khiela Kadimi Jeroboam na Israel ssi wa kesamithu sa wa thsü kesa tsü teshi meyala sa ben; [5] nu acenpvü nzawa Asherah tsiketon tsüna Samaria wi ben.

⁷Jehoahaz na goru kessithu deni, gorugari tagha, nu accü lenketsen nyi hazar tagha ketan khe süpahizithu nmiladha; kepaghenanye Siriya Kadimiwa na mathu yasa pia nu mathu pi ayyinikhu ti mathu cüten.

⁸Jehoahaz kekuli nu ma kempvüza sa kekuli cükithu tsüdila Israel kadimithu cükikezhü wi zhü theng.

⁹Ma shü nu pi Samaria wi vhüa, nu ma tsa Jehoash na ma shiwa sa kadimi saya.

¹⁰Judah Kadimi Joash na kadikesa mapi changha nu tagüwa wi Jehoahaz tsa Jehoash na Israel Kadimi saya, nu ma amapi tagha nu tugho Samaria wi kekhang sen.

¹¹Ma la sami pi Apvüwa shun nu Israel ssi wa kesami wi kechiwa Kadimi Jeroboam nkemehai tsütsonca tsü nie.

¹²Jehoash kekuli nu ma Judah Kadimi Ahaziya shunla aghikesa wi kempvüza kesa cükithu tsüdi saghu pi Israel kadimithu cükikezhü wi zhü theng.

¹³Jehoash na shü nu pi Samaria wi kadi shüjjenthu wi vhüa, nu ma tsa Jeroboam 11 na ma shiwa sa kadimi saya.

¹⁴ Atusenjüh-kechüwa Elisha na kesakinaa kesü pvü nu ma keshü naa keben wi Israel Kadimi Jehoash na ma hhainan wa, nu ma qai nu khi, “Iba, iba! No Israel kekhwe kekhangwa sagho le!”

¹⁵Elisha na ma wi khi, “Alamugho nu alakusü pahan khuyalo.” Jehoash na tsüthu khuya,

¹⁶nu Elisha na ma tsüpi gale kidenyalo kiza. Kadimiwa na tsüti saya nu Elisha na ma kwen pi kadimiwa kwen miwi chiya.

¹⁷Tsaseng wi atusen- jühkechüwa kecükegwe kenie wina kadimiwa na Siriya kepeghe wiwa ajjenkubhi tsü shaya. Elisha na khi, “Alakusü tsü ga chilo!” Kadimiwa na alakusü tsü gachi meyi, atusenjüh-kechüwa na khi, “No Apvüwa lakusüwa tsüle, ma no sen nu Siriya miwi khangyaden. No Aphek wi Siriya nyithu npi chakeya chu mathu ssisa ben.”

¹⁸Tsaseng wi Elisha na kadimiwa wi alakusü kepathu khuya nu tsüthu pi ayyi kihhe chilo kiza. Kadimiwa na pi kecheng tughu kihhechi nu ngan wa.

¹⁹Tsüna Elisha sapi ma lebenminu thsüa ma kadimiwa wi khi, “No manga nyelela tugho tughu kihhe kechi-u, isalethu no Siriya nyithu miwi khangthahya kesale; isala no khili kecheng tughu ketan mathu miwi khang yaben.”

²⁰Elisha na shü nu pi vhüa. Amapi kaghapenla Moab nyithu na akhang sala Israel yyiwa tsü nka ghoden.

²¹Matsü kesü wi keshü kesü pie nu wa keten wi anyithu na akhang hathu kesü muchi nu mathu na akamang tsüpi Elisha shüjjen wi khalachi nu bvüa.[6] Anyi tsüwa kamang na wa Elisha güthu kidhenya meyi anyi tsüna hang nengya nu shagha ngan wa.

²²Jehoahaz na kadikesa tsü tsüdi wi Siriya Kadimi Hazael na Israel nyithu metenmesha,

²³isala Apvüwa na ccatssü nu mathu nantizen ntsa sa. Ma mathu yala yasa thsü nsa, isala ma Abraham, Isak, nu Jakob ssinu cenkethenjüh tsüghena ma mathu kiqa cü. Ma khiela ma nyithu teshi nsa.

²⁴Siriya Kadimi Hazael keshü seng wi ma tsa Benhadad na kadimiwa saya.

²⁵Tsaseng wi Israel Kadimi Jehoash na kecheng tughu Benhadad chaya nu Jehoash ba Jehoahaz kadikesa tsüwi Benhadad na anyunutithu nkaya kesathu tsü nka nengya khia.