Read Northern Rengma Naga 2 KADIMITHU 16 Bible Online

2 KADIMITHU 16 - Northern Rengma Naga bible

2 KADIMITHU 16

¹Remalia tsa Peka na Israel kadimi saya nu kadikesa mapi tagha nu tagüwa wi Jotham tsa Ahaz na Judah kadimi saya,

²ma kahang mapi ngwe wi, nu ma Jerusalem wi amapi tagha nu tugho kekhang sen. Ma ma baqhai David tsütsonca kemehaiwa tsü n-niela, ma Anyiza Apvüwa nkenenwa tsü sa

³ nu Israel kadimithu tsütsonca tsü nie. Ma Israel nyithu na atujügü kewa wi Apvüwa na ayyi ciwi kahangthu jügüshi kesathu na nankiqanan kekuli sa keten ti sala ma tsawa lela pi atsikezhüthu tuwi mecang pi kekinyi sa.

⁴Yyishiphon thu miwi, achanton cakhu tsüdi wi Anyiza nkechüthu kekinyipenthu witsü Ahaz na ahhanshathu sa nu hankedemvu mecang pi kinyi.

⁵ Siriya kadimi Rezin nu Israel kadimi Peka manyi na wa Jerusalem ssisa nu tsü vüya, isala Ahaz cha meyala.

⁶(Tsü tsüwi Edom kadimiwa na Elath nyunutiwa tsü miwi khang nengya nu ciwi hangkeben Judah nyithu jügüshia. Edom nyithu na Elath wi hang wa nu khilila ciwi hangben.)

⁷Ahaz na nyilothu kesun pi ketsijüh ha pvü nu Assiriya kadimi Tiglath Pileser wi wa thsü: “Hi nmaghawa le. Ghola Siriya nu Israel kadimi keni na hi ssisakeben wi hi kekasha cülo.”

⁸Ahaz na Kekinyijjen nu kadijjen keben ketheng pen wi rükatssü nu suna khuya, nu tsüpi aju sala kesun pi kadimiwa cüa.

⁹Tiglath Pileser na Ahaz kekhie tsü keluneng wina ma süpahizi ssi shhula Damaska ssikaghashen nu tsü nkaya, Kadimi Rezin pathia, nu Kir wi anyithu ghan pi atssüzüthu saya.

¹⁰Khathansha wi Kadimi Ahaz na Damaska wi Kadimi Tiglath Pileser metule wa khe ma ciwi kekinyipenwa tsü muya nu ma tsü matsi, mayen tsü makesü maben kesun nen pi keqhaikediwa Uria wi chia.

¹¹Tsalina Uria na kekinyipen tsü makesü kesa kesü Ahaz na npi kegho neng tuwi sacenya.

¹²Ahaz na Damaska wina kegho neng wi kekinyipenwa tsüna sacen kesa muya,

¹³tsalina ma tsü miwi asahang pi mecang pi kekinyi, asu pi kekinyi, nu kisengtssü pi meyisha kechi kekinyi, nu ajjü pi kecca ghena kekinyi sachi.

¹⁴ Lezza pi kekinyipen kesa satemetha pi Apvüwa wi kechiwa tsüna kekinyipen ketheüwa nu Kekinyijjen manyi jüwi ben, tsalina Ahaz na tsü ketsen sen wa aghawa ma kekinyipen ketheü sa.

¹⁵Tsaseng wi ma Uria wi kiza : “Hi kekinyipen ketiwa hapi aghanen mecang pi kekinyi nu minulen wi asu pi kekinyi, kadimiwa nu anyithu na mecang pi kekinyi nu asu pi kekinyi, nu anyithu ghena kisengtssü pi kekinyi ghena senlo. Ahhansha kesa sahangthu tsüdi jjü pi tsü miwi keshusha chi. Isala lezza pi kesa kekinyipenwa tsüpi ighena cenpvü keccüneng pen sala theng lalo.”

¹⁶Uria na kadimiwa kekhi ti sa.

¹⁷ Kadimi Ahaz na lezza pi kesa amesü garithu Kekinyijjen wi sen keten tsüpi makepa sa nu ma miwi akwen kemetsikhuthu tsü khupia. Ma lezza pi kesa amesü süpon taghakeni miwi lezza pi kesa taghagu tsü la khusha pi alon pi magizhü ketheng miwi chia.

¹⁸Assiriya kadimi kenenwa sale kesalina Ahaz na Kekinyijjen wi kadipenwa tsü la khupia nu kadimiwa na Kekinyijjen wi kedulen tsü khen.

¹⁹Kadimi Ahaz kekuli cükithu na Judah kadimithu cükikezhü wi zhü theng.

²⁰Ahaz na shü nu pi David Nyunutiwa wi kadi shüjjenthu wi vhüa, nu ma tsa Hezekiya na ma shiwa sa kadimi saya.