Read Northern Rengma Naga 2 KADIMITHU 21 Bible Online

2 KADIMITHU 21 - Northern Rengma Naga bible

2 KADIMITHU 21

¹Manasseh na ma kahang mapi taghakeni wi Judah Kadimi saya, nu ma Jerusalem wi amapi deni nu manga kekhang sen. Ma jja na Hefziba.

² Israel nyithu na atujügükewa wi Apvüwa na ayyi ciwi kahangthu jügüshi kesa mizzatentithu kekuliyen nankiqananthu tsü kenie wina Manasseh na sami pi Apvüwa shun.

³Ma ma ba Hezekiya na yasa kesathu Anyiza nkechüthu kekinyipenthu tsü saneng; ma Israel Kadimi Ahab na kesa ti Baal kekinyipenthu sa nu acenpvü nzawa Asherah tsikezhü kesü sa. Manasseh na ghotsithu la kinyi.

⁴Ma Kekinyijjen wi Apvüwa na ma ketan kinyi benle kekhi pen witsü Anyiza nkechü kekinyipenthu sa.

⁵Kekinyijjen ccühha keni witsü ma ghotsithu kekinyipenthu sa.

⁶Ma ma tsa pi ahhansha sa nu mecang pi kekinyi kesü sa. Ma cenpvü keccüneng nu kechuchünyi kekulithu sa nu ma tusenkekhithu nu keshü ghamu keccünengthu ccüneng. Ma Apvüwa tuwi sami ntsa sa nu ma lebenketsu cüssia.

⁷ Ma acenpvü nzawa Asherah tsiton pi Kekinyijjen wi Apvüwa na apen ha ghena hati David nu ma tsa Solomon kekiza pen witsü chia; “Hewi Jerusalem wi Kekinyijjen hawa wi hi kinyi thsüle kesalina Israel mizza taghakeni tsüdi yyiwi kessishikeya apenwa tsüna hale.

⁸Nu keujüla Israel nyithu na iyenkhukechithu tsüdi yaya nu imaghawa Mosa na Ayenwa pi mathu kecü tsü mabenla nieya lethu, hi ayyi pi mathu bamyithu kecü witsü mathu jügüshi nben.”

⁹Isala Judah nyithu na Apvüwa jüh tsü n-nie, nu Manasseh na mathu ssi wala Apvüwa na ma nyithu atujügükewa wi ma ayyi ciwi na jügüshi kesa mizzatentithu miwi kesami tikayi sa thsüa.

¹⁰Apvüwa na ma magha atusenjüh-kechüthu wina khi,

¹¹“Kadimi Manasseh na nankiqanan kekuli hathu ha Kanaan nyithu miwi nmehaiki ntsa sadha; nu ma atsikezhüthu sen nu Judah nyithu ssi wa kesami wi chia.

¹²Tsalina hi Apvüwa, Israel Nyizawa na kededi kesü sengho Jerusalem nu Judah miwi chi nu tsü cüki zakeyathu tsüdila akhuna methi thsüden.

¹³Hi Samaria, Israel Kadimi Ahab nu ma shicübvüghathu miwi sa kecü ti Jerusalem meten cüden. Akhu kesü qhu temetha pi nkhwe ketheng ti hi Jerusalem nyithu jjü temetha pi cüden.

¹⁴Hi anyi hangkeyathu tsü teshi, nu mathu pi mathu ghinyithu kwen wi chiaden; mathu ghinyithu na mathu miwi khangya nu mathu yyi shu yaben.

¹⁵Hi inyithu miwi hati sa den, kepaghenanye mathu bamyithu na Ejipt wina keshhugho tsü na gho nansü kecu mathu na sami pi hi shun nu ilebenketsu cüssidha.”

¹⁶Manasseh na anyi kesami nkemithu ji mtsü pathi pi Jerusalem lentontithu wi ajjü na lle wa thsüa; ma ha miwi la Judah nyithu ssi wa atsikezhü kinyi nu sami pi Apvüwa shun thsüa.

¹⁷Manasseh na kekuli, nu ma kesamithu kesa cükithu tsüdila Judah kadimithu cükikezhü wi zhü theng.

¹⁸Manasseh na shü nu pi kadijjen sanku Uzza sanku witsü vhüa, nu ma tsa Amon na ma shiwa sa kadimi saya.

¹⁹Amon na ma kahang mapi ngwe nu keni wi ma Judah kadimi saya, nu ma Jerusalem wi amapi keni kekhang sen. Ma jja na Jotba nyuti wina keghowa Haruz nga Meshullet.

²⁰Ma ba Manasseh ti ma la sami pi Apvüwa shun;

²¹ma ma ba kekulithu tsü sa, nu ma ba na atsikezhüthu kekinyi tsü ma la tsüthu kinyi.

²²Ma Apvüwa ma bamyithu Nyizawa tsü meya mvu, nu Apvüwa yenkhukechithu tsü n-nie mvu sa.

²³Amon kekhu wi kedithu na acho sapi ma shun nu kadijjen wina ma pathia.

²⁴Judah nyithu na Amon kepathithu tsü pathia nu ma tsa Josiya pi kadimi sa thsüa.

²⁵Amon na kekuli cükithu tsüdila Judah kadimithu cükikezhü wi zhü theng.

²⁶Amon pi Uzza sanku wi ashüjjen wi vhüa, nu ma tsa Josiya na ma shiwa sa kadimi saya.