Read Northern Rengma Naga 2 KADIMITHU 23 Bible Online

2 KADIMITHU 23 - Northern Rengma Naga bible

2 KADIMITHU 23

¹Kadimi Josiya na Judah nu Jerusalem wi ccülikesathu tsüdila cichi,

²nu keqhaikedithu, atusenjüh-kechüthu, nu kepa wi keban nu ketha-uthu tsüdila mathu gweghe Kekinyijjen wi wa. Mathu tsüdi tuwi na Kadimiwa na Kekinyijjen wi mukeya cenkethenjühwa tsü mabenla misikhhali sichi.

³Ma kadijjen kedon kete wi ngan nu lesüshenwa wi zhü ketheng ti Apvüwa jüh kina, ma leben nu kahang tsüdi pi ma yen nu ayenkhukechithu tsü nie, nu cenkethenjüh wi khi keben ti tsüthu sale kesa Apvüwa ssinu cenkethenjüh kesü sa. Nu anyi tsüdila cenkethenjühwa tsü niele khishichia.

⁴ Tsaseng wi Josiya na ahza pi Keqhaikedi ntsawa Hilkiya, ma kekiqa keqhaikedithu, nu aghikehiethu Kekinyijjen kedulen wi kekuli sa kebenthu cü nu mathu ya Kekinyijjen non wi Baal, acenpvü nzawa Asherah, nu ghotsithu kekinyi wi sen keten tsanqaithu tsüdila sen nu shhugholo kiza. Kadimiwa na atsanqai hathu tsüdi pi anyunuti na ameiwa Kidron Yyiketijü kete wi mecang nu kemecang qaethu sen nu Bethel wi wa thsüa.

⁵Ma Judah kadimithu na pi Anyiza nkechü kekinyipenthu wi ahhanshathu sa thsüle keqhaikedithu sa thsü kethengthu tsüna Judah nyunutithu nu Jerusalem kete witsü ahhanshathu sapi Baal, aghani, asha, tangwi kebenthu, nu ghotsithu cü ketenthu tsüdi khupia.

⁶Ma Kekinyijjen wi acenpvü nzawa Asherah tsiketon tsü khusen wa anyunuti na ameiwa Kidron Yyiketijü wi mecang, ma kemecang qaethu tsü doncha pi awheng sa nu sen wa anyithu pi vhü keten pen wi vvü zighe chia.

⁷Ma Kekinyijjen wi keqheza menkedsathu [13]na hang keten jjenthu tsü yasa pia. (Nzathu na ciwi Asherah kekinyi wi kesen thsümenithu tsü ben.)

⁸Ma Judah nyunutithu wi keqhaikedithu ssinu Jerusalem wi gho, nu diyyi maben wi mathu na ahhansha sa keten kekinyipenthu sapi anyan kekinyen sa thsüa. Ma anyunutiwa wi kedulen kete tavüwa wi anyunuti wi ahngwa Joshua na kekinyipenthu sapi atsaghangthu cü ketheng tsü la pasha pia.

⁹Keqhaikedi tsüthu na Kekinyijjen wi kekuli nsa thsüla, isala mathu na mathu pvüshang keqhaikedithu ghena azimi nkechi mesa tsü dsaya mehai.

¹⁰ Kadimi Josiya na Hinnom Yyiketijü wi Anyiza nkechü kekinyipenwa Tofeth la sapi anyan kekinyen sa thsüa, tsalina thola ma tsanga pi mecang pi acenpvü Molek ncüla.

¹¹Ma Judah kadimithu na goruthu nu gorugarithu pi aghani kekinyi wi kesen ghena cü ketheng tsü la khupia. (Hathu pi Kekinyijjen ccühha kaghapeng-jenka kete wi kedi kesü Nathan Melek na hang keten jjen ketsaki witsü chi theng.)

¹² Kadimi Josiya na Judah kadimithu na kadijjen miwi Kadimi Ahaz jjen miwi kekinyipen sa kethengthu tsü pasha; ma kekinyipenthu tsü pacha zighe nu tsüthu pi Kidron Yyiketijü wi khala.

¹³Josiya na Jerusalem na nishuwa, Oliv Yikha [14]na acülawa wi Kadimi Solomon na nankiqanan atsikezhüthu Sidon cenpvü nzawa Astart, Moab cenpvü Khemosh, nu Ammon cenpvü Molek kekinyi ghena kekinyipenthu sa ketheng tsü sapi anyan kekinyen sa thsüa.

¹⁴Kadimi Josiya na alon kishengthu tsü pakhhi zighe, acenpvü nzawa Asherah tsiketon tsü pacha pia, nu ma anyi güthu pi tsüthu kechipen witsü chia.

¹⁵ Josiya na Israel ssi wa kesami wi chikesawa Nebat tsa Kadimi Jeroboam na Bethel wi kekinyipen sa ketheng tsü la pasha pia. Josiya na kekinyipenwa tsü zansha, nu alonthu tsü pacha zighe nu tsüthu doncha pi ayyinikhu sa; ma Asherah tsiketon tsü la pi mecang.

¹⁶ Tsaseng wi Josiya na ghangkevüli chi nan yyishiphon miwi ashüjjenthu pahan muya; ma tsüthu wi anyi güthu khushiya thsü nu pi kekinyipenwa miwi mecang thsüa. Hatinu ma kekinyipenwa tsü sapi anyan kenyen thsüa, hawa ha kheni akho tsüwi Kadimi Jeroboam na kekinyipenwa kete wi ngan keben atusenjüh-kechüwa ha kekhiwa shüjjen tsü muya,

¹⁷ nu ma keü, “Katsü na thowa shüjjen nu?” Bethel nyithu na luneng, “Hawa ha Judah wina kegho atusenjüh-kechüwa, no nansü kekinyipen hawa miwi sa kechi hathu cüki kekhiwa shüjjen tsüle.”

¹⁸Josiya na khi, “Tsü teshilo. Ma güthu tsü papheghe nben.” Tsalina ma güthu nu Samaria wina kegho atusenjüh-kechüthu güthu la npapheghela teshia.

¹⁹Tsalina Israel nyunuti tsüdi wi Israel kadimithu na sapi Apvüwa lebenketsu kecüssi Anyiza nkechü kekinyipenthu tsü Kadimi Josiya na tsüdila yasa pia. Ma Bethel wi kesa ti kekinyipen hathu tsüdi miwi la sa.

²⁰Ma kekinyipenthu miwi ciwi kekuli sa keten Anyiza nkechü keqhaikedithu tsüdila pathia, nu anyi güthu pi kekinyipen tsüdi miwi mecangchia. Tsaseng wi ma Jerusalem wi kheneng wha.

²¹Josiya na cenkethenjüh lesüshen wi zhü ketheng ti anyithu na Apvüwa mathu Nyiza kekinyikü wina Shhukeya Kho wa tsü kemini salo ahza khuchia.

²²Pendhethu na mizzatenti miwi kekhang kesen tsüwi na gho Israel nyelela Judah kadimithu tsü kecu mathu kesüla Shhukeya Kho hati kemini npi sa.

²³Khili asakhen wi Josiya na kadikesa mapi tagha nu tazen wi Jerusalem wi Shhukeya Kho ha kemini sa.

²⁴Keqhaikedi ntsawa Hilkiya na Kekinyijjen wi mukeya lesüshen wi zhü ketheng ayenthu tsü sale kesalina Kadimi Josiya na Jerusalem nu Judah yyi tsüdi wi keshü ghamu keccünengthu, atusenkekhithu, ajjen wi acenpvüthu, atsikezhüthu, nu Anyiza nkechü kekinyi wi senketen tsanqaithu tsüdila khupia.

²⁵Ciwi khiela ma tuwi kadimi kesüla ma ti kesa ma leben, kahang, nu kezü tsüdi pi Mosa Yenwa tsüdi nie nu Apvüwa kekuli kesa nmi; nyelela kadimi kesüla ma seng wi ma ti kesa nmi.

²⁶Isala Kadimi Manasseh kekuli ghena Apvüwa lebenketsu cüssi pi Judah keshun tsüna khili lela npi ghaya.

²⁷Apvüwa na khi, “Hi Israel miwi kesa ti Judah miwi la saaden; Hi ituwi Judah nyithu khupiaden, nu hi kessikeya anyunutiwa Jerusalem tsü, nu hi kinyilo kekhi ben Kekinyijjenwa tsü meya mvu laden.”

²⁸Kadimi Josiya na kekuli cükithu tsüdila Judah kadimithu cükikezhü wi zhü theng.

²⁹Josiya na kadimi sa keben wi Ejipt Kadimi Neko na süpahizi kesü ssinu Eufrat Ghaku kecu wi Assiriya kadimiwa kiqa wa. Kadimi Josiya na Megiddo wi Ejipt nyi süpahizi khenle sa nu aghi wi ma pathia.

³⁰Ma kekhu wi kedithu na ma kamang pi gorugari kesü wi cipvü nu Jerusalem wi gho neng nu ma pi kadi shüjjenthu wi vhüa. Judah nyithu na Josiya tsa Joahaz kessiya nu adeli pi ma nyen pi kadimiwa sa thsüa.

³¹Joahaz na ma kahang mapi ngwe nu kechengwa wi Judah kadimi saya, nu ma asha kecheng Jerusalem wi kekhang sen. Ma jja na Libnah nyunutiwa wina keghowa Jeremiya nga Hamutal.

³²Ma bamyithu tsütsonca nie nu ma sami pi Apvüwa shun.

³³Ejipt Kadimi Neko na Hamath yyiwi Ribla wi ma ghan pi atssüzü sa thsüa, nu Judah yala rükatssü 3,400 kilogram nu suna 34 kilogram pi keküju sala kecü thsü wi ma kadikesa sakhen sa.

³⁴ Kadimi Neko na Josiya tsa Eliakim pi Josiya shiwa sa Judah kadimi sa thsüa, nu ma nyan kemiyili pi Jehoiakim sa. Kadimi Neko na Joahaz ssinu Ejipt wi wa, nu ma ciwi shüa.

³⁵Kadimi Jehoiakim na keküju pi Ejipt kadimiwa kecü qo apisa tsü muyale kesalina anyithu wi mathu keben-keyeng kenie wina khajana saghu.

³⁶ Jehoiakim na ma kahang mapi ngwe nu manga wi Judah kadimiwa saya, nu ma amapi taghakhen Jerusalem wi kekhang sen. Ma jja na Ruma nyutiwa wi keghowa Pedaiya nga Zebida.

³⁷Ma bamyithu tsütsonca kenie wina Jehoiakim na sami pi Apvüwa shun.