Read Northern Rengma Naga 2 KADIMITHU 25 Bible Online

2 KADIMITHU 25 - Northern Rengma Naga bible

2 KADIMITHU 25

¹Zadekiya na Babylonia Kadimi Nebukhadnezzar matangla shun, tsalina Nebukhadnezzar na ma süpahizi tsüdi ssisen ghola Zadekiya na kadikesa amapi tuguwa asha taghawa tagha ghanan wi Jerusalem ssikaghashen. Mathu na anyunuti na ameiwa kemnanpen sa, khweti sapi kevüliya,

²nu Zadekiya na kadikesa mapi taghakhenwa npi kecen chu tsü vüya.

³Tsü mapi asha mejüwa[15] tugu ghanan wi azeng na nmehai ntsa sa nu ciwi anyithu na mangla kedsa nmila,

⁴ nu anyunutiwa khwetiwa tsü pasha. Babilon nyithu na anyunutiwa tsü vüsen ben lela süpahithu tsüdila ghaja wina bvüya. Mathu na kadi Sanku len wiwa na akhweti kenijü kaghapeng-jenka wi shhuya nu Jordan Yyiketijü kepeghe wiwa bvüa.

⁵Isala Babilon nyi süpahizi na Kadimi Zadekiya jügü wa Jerikho kete deshentijü wi ma ghanya, nu ma süpahithu tsüdila ma teshi nu bvü zighea.

⁶Zadekiya ssinu Ribla nyunutiwa wi Kadimi Nebukhadnezzar wi wha, nu ciwi Nebukhadnezzar na ma miwi ajühkaghaten.

⁷ Zadekiya na ghang keben wi ma tsathu tsü pathia; tsaseng wi Nebukhadnezzar na Zadekiya nyon kuhoshia, amighe ssüle pi ma bhenya, nu ma ssinu Babilon wi wa.

⁸Babylonia Kadimiwa Nebukhadnezzar na kadikesa mapi tagha nu tuguwa asha mangawa tagü ghanan wi kadimi kesansiwa, ma süpahizi benchüwa Nebuzaradan na Jerusalem wi duya.

⁹ Ma Kekinyijjen, kadijjen, nu Jerusalem wi anyi kemechanthu jjen tsüdi mecang chia,

¹⁰nu ma süpahithu na anyunutiwa khwetithu pasha pia.

¹¹Tsaseng wi Nebuzaradan na anyunutiwa wi teshi keathu Babilon nyithu wiwa sa kesa anyithu, kekuli wi sapichüthu [16] he wila kebenthu tsüdila ssinu Babilon wi wa.

¹²Isala ma anyi ketha-u ntsathu keben mangla nkemithu teshi pi Judah wi kemeshentsse lli nu allithu wi kekuli sa thsüa.

¹³ Babilon nyithu na Kekinyijjen wi lezza pi kesa makedon nu amesü garithu, pi taghagu ketiwa tsü saghu pakhhi zighe nu mathu na lezza tsüdi pvü nu Babilon wi wa.

¹⁴ Mathu na kekinyipen wi kekhweji, kemecang qe kechipen, ahula satekemetha tsanqaithu, ahhanshathu jjü kechipen nu hankedemvu kemecang ghena akhuzzathu, nu Kekinyijjen wi kesen ghena lezza pi kesa tsanqaithu tsüdila pvü nu bvüa.

¹⁵Mathu na suna nyelela rükatssü pi kesa tsüdi akhuzzathu amihi kechipen akhu magi kebenthu saghu sen nu bvüa.

¹⁶Kadimi Solomon na Kekinyijjenwa ghena lezza pi kesathu makedon keni, amesü garithu, nu taghagu ketiwa tsüthu tsüna kiyang metsü nu whu meyala.

¹⁷Ma kedon keni kesüsü kemisi na meter tazen, shoni wi kedon kemisi na meter 1.3 tsüti saben. Shoni wi kedon kesüsü tsüna lezza pi ahhibvüthu sapi matsi sa kevüli theng.

¹⁸Benchüwa Nebuzaradan na tsü miwi la atssüzüthu sa ssi bvü kesathu na Keqhaikedi ntsawa Seraiya, keqhaikedi keniwa Zefaniya, nu Kekinyijjen wi kedithu kemechan kecheng.

¹⁹Ma anyunutiwa wi süpahithu benchü sa keghowa, kadimiwa kesansithu meshu manga khili la anyunutiwa wi keben, benchüwa kekhu wi süpahithu cüki zhü kethengthu kenonccawa, nu anyi kemechanthu achentugho ssi bvüa.

²⁰Nebuzaradan na tsüthu ssinu Ribla nyunutiwa wi Babylonia kadimiwa wi wa,

²¹tsüna Hamath yyiwi. Ciwi kadimiwa na mathu kiccü nu pi shü thsüa. Tsalina Judah nyithu tsü mathu yyiwi na ssinu kushiyyi wi wa.

²²Babylonia Kadimi Nebukhadnezzar na Shafan tsa Ahikam tsawa Gedaliya pi Judah ahng sa thsüa, nu ma pi anyithu ssinu Babilon wi nkewathu miwi kediwa sa thsüa.

²³Khathansha Judah nyi kedithu nu süpahithu nyu kwen wi npi keduthu na ha cüki zaya khe mathu wa Mizpah wi Gedaliya gwegheya. Kedi hathu na Nethaniya tsa Ishmael, Kareya tsa Johanan, Netofa wina keghowa Tanhumeth tsa Seraiya, nu Maaka tsa Jezaniya.

²⁴Gedaliya na mathu wi khi, “Nthu na Babilon nyi kedithu nmessila mehaile kesa hi ijüh pi nthu cüben. Ayyi hewi ben nu Babilon kadimiwa kekuli salo, isathu pala tsüdila nthu ghena mehai ben.”

²⁵ Isala tsü mapi asha tagüwa wi Elishama tsa Nethaniya tsawa Ishmael, kadi theghi kesü na anyi tagha ssinu Mizpah wi wa Gedaliya ssisa nu ma pathia. Ma Israel nyithu nu Babilon nyithu na Gedaliya gweghe kebenthu la pathia.

²⁶ Tsaseng wi Israel nyi keban nu ketha-uthu lela süpahizi kedithu gweghe Ejipt wi bvüa, kepaghenanye mathu na Babilon nyithu messi kesalina.

²⁷Evilmerodak na Babilon kadimi sa keya mapi wi ma Judah Kadimi Jehoiakhin nantizenchi nu atssüzüjjen wina ma khushia. Hawa ha Jehoiakhin ghan sen nu atssüzü sa kewa mapi changha nu tagüwa asha taghakeniwa ngwe nu tagü ghanan seng wi sa.

²⁸Evilmerodak na Jehoiakhin gweghe Babylonia wi kushinyi sa keben kadimi kepathu miwi ma tuwi ccatssü nu kinyiküpen kesü pi ma cüa.

²⁹Tsalina Jehoiakhin na ma tssüzü thsümeni kemiyili sen ma kahang chu kadimiwa miz wi dsajjüwa thsüa.

³⁰Ma hang keben chu atsathangla ma nsenthu keyishü pi ma cüa.