Read Northern Rengma Naga 2 KADIMITHU 4 Bible Online

2 KADIMITHU 4 - Northern Rengma Naga bible

2 KADIMITHU 4

¹Atusenjüh-kechü akhang kesü jawi kesü shü kesa wubvü denyilewa na Elisha wi wha nu khi, “Kediwa, iwuba na shüdha le! No chüben, ma Anyiza kemessi nyi kesü, isala khili iwuba na ma menpvü kebenwa na gho itsa keni ssi wa ma nssümagha sayale bendha.”

²Ma nzawa keü, “Hi nghena mangwa sacü nu? Njjen wi mangwa ben khe hi kiza lo.” Nzawa na luneng, “Oliv deli ahikhu kizzakeu tsü ketan khe mangla nmile!”

³Elisha na ma kiza, “Njenphonthu wi wala alakhü kaghacang khaju muya mehai khe sengholo.

⁴Tsaseng wi no nu ntsa keni na ajjen khenten duya, nu adeli tsüpi alakhüthu wi keshusha chilo. Kesüsü pong lethu khupi makepa sayalo.”

⁵Tsalina nzawa na ma tsa keni ssidu ajjen khetenya, adeli hikhu kizzakeuwa tsü khuya, nu ma tsa keni na alakhüthu senghothu ma adeli pi ciwi meyishachi.

⁶Mathu na pi alakhü tsüdi pongkeya seng wi ma hewi benla nmidha nu keü. Ma tsawa kesü na luneng, “Hawa ha asakhenwa dha le!” Tsaseng wi oliv deli na lle nshhughola.

⁷Nzawa na atusenjüh-kechüwa Elisha wi wa neng, nu ma nzawa kiza, “Oliv deli tsü jeü pi no amenkepvü tsüdila dhiyalo, nu ciwi la no nu ntsa nshinyi na sen nu hangya kemehai apisa na benla ben.”

⁸Ghanan kesü Elisha na nza keban kesü na hang keten ben Shunem wi wa. Nzawa na kedsakejjü ghena ma cichi, nu ma tsü nten na Shunem wi kewa kaghapen ma jjen wi wa dsajjü sa.

⁹Nzawa na ma wuba wi khi, “Hi chütiben le, anyi keshüthangla hewi gho ketenwa ha kemetha nyi kesü.

¹⁰Ajjen miwi keshondhi kizzakeu kesü sa na; awe, miz, kedonpen, nu ahula kesüsü pi ciwi chi, nu ma kusi ishinyi hhainan gho khe ma ya ciwi ben thsü na.”

¹¹Ghanan kesü Elisha na Shunem wi kheneng gho ma jjenkeshondhi wi mnan yale ki.

¹²Ma ma maghawa Gehazi kiza nu wa nzawa tsü cichi thsü. Nzawa na gho cukeya wi

¹³ma Gehazi wi khi, “Ma ishinyi ghena agükeccü sa ishinyi nsenthu keyishü tsüdi pi ishinyi kecü ghena hi ma ghena mangwa sa thsü mvu ben nu ma keü nanlo. Ma hi kadimiwa wi nyelela süpahizi benchüwa wi wa ma ghena ajüh kemehai pi khi thsü mvu benshe.” Nzawa na luneng, “Hi hewi inyithu jawi hi nsenthu keyishü tsüdila benle!”

¹⁴Elisha na Gehazi wi keü, “Isalethu, hi ma ghena mangwa sachiya mehai nu?” Gehazi na luneng, “Ma atsa nmi, nu ma wuba na qhaiwadha le!”

¹⁵Elisha na khi, “Ma hewi gholo kiza lo.” Tsalina ma nzawa cichi nu ma ghola ajenka wi nganya,

¹⁶ nu Elisha na ma wi khi, “Vvüthi wi hathansha wi no nkwen wi atsa kesü pieya ben.” Nzawa na khi, “Oh, no Anyiza nyi kesüle! Tizenthu, hi wi milimesa nsa lalo.”

¹⁷Isala Elisha na kekhi ti, vvüthiwa wi tsü tsüwi nzawa na atsa kesü pvüghaya.

¹⁸Amapi keu seng wi allikewwi tsüwi ghanen kesü pvüzanyiwa na ma ba na alli wi allikewwithu gweghe keten witsü wa.

¹⁹Zuli ma qai nu ma ba wi khi, “Ili naa ben le! Ili naa ben le!” Ma ba na ma magha kesü wi khi, “Pvüzanyiwa tsü pvü nu ma jja wi whalo.”

²⁰Amaghawa na pvüzanyiwa pvü nu ma jja wi wha neng; pvüzanyiwa na ghanan lapvü kecu ma jja phedhi miwi ben, nu tsü tsüwi ma shüa.

²¹Nzawa na pvüzanyiwa pvü nu Elisha jjenkeshondhi wi ki, ma pi awe wi chia nu ajjen khenten nu bvüa.

²²Tsaseng wi ma ma wuba cichi nu khi, “Amagha kesü kesun pi gada ssisen hewi gho thsülo, hi atusenjüh-kechüwa Elisha wi nwathu yishü ben na. Hi saya kemehai chu wan gho neng shaben.”

²³Ma wuba na ma wi keü, “Mangkesa na nansü wale saben nu? Nansü ha Sabbath nyelela Asha Ketheü Kho[2] nyele.” Nzawa na luneng, “Mangla nsa.”

²⁴Tsaseng wi nzawa na gada miwi kiya, nu amaghawa kiza, “Gada ya kaghaji ntsawa thsülo, nu hi no nkekiza tsü ashina nsa thsüla.”

²⁵Tsalina ma Elisha na keben ben Karmel Yikha witsü wa. Elisha na nzawa tsüna gho keten alen kesie wina muya nu ma maghawa Gehazi wi khi, “Ghangchilo, Shunem wi nzawa tsüna gho tenle!

²⁶Wan ma wi wa nu ma, ma wuba, nu ma tsa ghena pala tsüdila kemehai sabenla nye khe chüyalo.” Nzawa na Gehazi wi pala tsüdila mehai benle kiza,

²⁷isala ma Elisha wi gho ma tuwi kukedu nu ma ccü ghansenya. Gehazi na nzawa deshen neng pia le sa, isala Elisha na khi, “Makesasalo. Nzawa na ma lebengüccü ntsa keben tsü no nmu kwe? Nu Apvüwa na tsü jjügi mangla pi hi nkiza le.”

²⁸Nzawa na ma wi khi, “Kediwa, hi no wi atsa kesü khie kwe? Hi wi milimesa nsalalo hi no nkiza kwe?”

²⁹Elisha na Gehazi wi khapeghe wa khi, “Wanlo! Ikhhatssü khuya nu walo. No alenca wi anyi kesü le kesü lela metuyala ccüneng deja nbenla; nu nyu no ccüneng lela tsüghena matsü dedi nben lalo. No meshonqhe ajjen tsüwa wi whala ikhhatssü pi pvüzanyiwa miwi chilo.”

³⁰Nzawa na Elisha wi khi, “Hi hangkebenwa Apvüwa jühkeya nu no wi hi no teshi ntenle kesa kishenben.” Tsalina manyi gweghe sen wha neng.

³¹Gehazi na atuwi whala Elisha khhatssü pi ghanyiwa miwi chi. isala ciwi ahhai nyelela kahang zensu mangla nshhugho. Tsalina ma kheneng wa Elisha metu nu khi, “Pvüzanyiwa tsüna nshagha le!”

³²Elisha na gho cukeya wi ma ketanla ajjen keshondhiwa witsü du nu ghanyiwa kamang tsüna awe miwi keben muya.

³³Ma ajjenkhenten nu Apvüwa wi kekhie sa.

³⁴ Tsaseng wi ma ghanyiwa miwi nkhwendu ma pang, ma nyon, ma kwenthu pi ghanyiwa pang, anyon, nu akwenthu miwi chi. Ma ghanyiwa miwi nkhwendu kesa wi ghanyiwa gwo na yeng shagha.

³⁵Elisha na shagha, ajjen keshondhiwa witsü alentsen kevüli, nu kheneng kuti wa ghanyiwa miwi nkhwendu. Ghanyiwa na tagü tughu ahthe sachi nu ma nyon kü shagha.

³⁶Elisha na Gehazi cichi nu ghanyiwa jja cichilo ma wi kiza. Nzawa na kegho wi ma nzawa wi kiza, “Ntsawa ssiyalo.”

³⁷Nzawa na gho Elisha ccü wi ayyiwi kukedu; tsaseng wi ma tsawa ssiya nu bvüa.

³⁸Khenen kuti ayyi maben wi azeng sa, Elisha na Gilgal wi gho neng. Ma atusenjüh-kechüthu akhang kesü sansi keben wi ma ma maghawa wi apfü keti kesü pi qhanki nu mathu ghena kemaghüh salo kiza.

³⁹Mathu meshu kesü na alli wi awwenja yayale wa. Ma wa agheja ji kemeshentsse ton muya nu ma bi la pi pvüya kemehai ju kejonla pvü gho. Ma tsüthu tsüna mangwa khe nchüla keyi pi kemaghüh sa.

⁴⁰Kemaghüh tsüpi anyithu ya dsa thsüle higishü chi, isala mathu na tsü dsa nan nu Elisha wi khi, “Ha ajidha!” — nu tsü dsaya nben.

⁴¹Elisha na anün pahan khieya nu pi apfü wi cühchi nu khi, “Anyithu ghena kemaghüh tsü pahan higishü yalo.” Nu ciwi mangla nkemehai na nmila.

⁴²Tsaseng wi anyi kesü Baal Shalisha wina keghowa na tsü mapi achentha lliwwi tegü pi kesa amesa be ngwe, nu asu wwi meyi kahang pahan sen nu Elisha wi gho. Elisha na ma maghawa wi tsüpi atusenjüh-kechüthu dsa thsülo khi,

⁴³isala ma luneng, “No hawa ha anyi meza kesü dsa qo benle meshen ben kwe?” Elisha na khineng, “Tsüpi mathu dsa thsülo, kepaghenanye Apvüwa na khiben mathu na tsü dsa lela pahan dsatuaben.”

⁴⁴Tsalina amaghawa na kedsakejjü tsüpi mathu tuwi chicüa, nu Apvüwa na kekhi ti mathu tsüdila dsaya lela ciwi la pahan na ben.