Read Northern Rengma Naga 2 KADIMITHU 6 Bible Online

2 KADIMITHU 6 - Northern Rengma Naga bible

2 KADIMITHU 6

¹Ghanan kesü Elisha na ssi keten atusenjüh-kechüthu na ma wi leben nkaghajüh khi, “Ikhang kahang pen tsüna ikhang ghena zza mtsü dhale!

²Tsalina ikhang ya Jordan wi wa nu achan pahan shüchi yathsülo, isanu pi ikhang kahang pen kesü saya na.” Elisha na luneng, “Anlo.”

³Mathu meshu kesü na ma mathu gweghe walo khi; ma wa na khi,

⁴nu mathu gweghe wa. Mathu na wa Jordan cuya nu kekuli sa shhu.

⁵Mathu meshu kesü na achan shüchi keben wi ampvütsa na shhu sen nu atssü non wi qancadua. Ma Elisha wi khi, “Kediwa, hi khati sa nu? Tsüna nyu mpvü khie sen nu ghale!”

⁶Elisha na keü, “Tsüna khiewa qancadu nu?” Anyi tsüwa na ampvü keqancadu pen tsü khipi ma kiza, nu Elisha na akhhatssü kesü wiya nu tsüpi atssü non wi chi, nu ampvütsa tsüna atssü miwi shhugho thsüa.

⁷Ma anyi tsüwa wi “tsü khuyalo” khi. nu anyi tsüwa na dula ampvütsa tsü khuya.

⁸Siriya kadimiwa na Israel ssinu aghisa. Ma ma kekhu wi kedithu ccüneng nu ma kemnanpen kesa pen kessiya.

⁹Isala Elisha na ajüh kesun pi Israel kadimiwa wi chi nu ma apen tsü kete wi nwa lalo kitsanchi, kepaghenanye Siriya nyithu na ciwi aghiceng nu hie ben.

¹⁰Tsalina Israel kadimiwa na anyi ciwi kahangthu kitsanchi nu mathu na kiden-kesha yathsüa. Hawa ha keni kecheng tughu sa.

¹¹Siriya kadimiwa na ha ghena ma lebengüccü ntsa sa; ma kekhu wi kedithu cichi nu mathu wi keü, “Nthu thothu na Israel kadimiwa wiwa sa ten nu?”

¹²Mathu meshu kesü na luneng, “Njenkeben kadimiwa, thola ma wiwa nmi. Atusenjüh- kechüwa Elisha na no njjen keshondhi non wi lela kuthila mangwa khi khe tsüpi Israel kadimiwa kiza ben.”

¹³Kadimiwa na ahza khuchia, “Ma khiewa ben khe bhayalo, hi wa ma ghan yaten na.” Khathansha wi Elisha na Dothan wi benle kesa nyu na ma kiza khe,

¹⁴ma süpahi kejon pi goru nu gorugarithu gweghe kesunchia. Mathu na aghaja wi wala anyunutiwa tsü cuya nu tsü vüya.

¹⁵Dhitsüwa wi ghanen mitu Elisha maghawa na shagha akhemi wi shhu nan Siriya nyi süpahithu na mathu goru nu gorugarithu ssigho anyunutiwa vüya kebenla muya. Ma kheneng dula Elisha wi khi, “Waishe, kediwa! Ikhang khati sa tendha nu?”

¹⁶Elisha na luneng, “Nmessila. Mathu wiwa kesawa nyela ikhang wiwa kesawa na jiben.”

¹⁷Tsaseng wi ma kekhie sa, “O Apvüwa, ma nyon sha chicü nu ma yala muya thsülo!” Apvüwa na ma kekhie luneng cüa, nu Elisha maghawa na ghangchi nan anni goru nu gorugarithu na yyishiphon kepeghewa tsü Elisha vüsen keben muya.

¹⁸Khathansha wi Siriya nyithu na ssikaghashen gho khe Elisha na kekhie sa, “O Apvüwa, anyi hathu nyon nmu thsü lalo!” Apvüwa na ma kekhie lunneng chicü nu mathu nyon nmu thsüla.

¹⁹Tsaseng wi Elisha na mathu wi wa nu khi, “Nthu na alen deja den; anyuti hawa ha nthu na ghang ketenwa tsü nyele. Hi nie ghalo, hi nthu ssi wa anyi nthu na bha ketenwa witsü chi cü na.” Nu ma mathu ssinu Samaria wi wa.

²⁰Mathu na wa anyunutiwa tsü cuya meyi Elisha na kekhie sa, “Apvüwa, mathu nyon sha chicü nu mathu ya muya thsülo.” Apvüwa na ma kekhie luneng chicüa; ma mathu nyon ya mu nengya thsüa, nu mathu na Samaria non wi keben muya.

²¹Khathansha wi Israel kadimiwa na Siriya nyithu muya khe ma Elisha wi keü, “Hi mathu pathiala, kediwa? Hi mathu pathiala?”

²²Ma luneng, “Nyele. No kesali nu ghankeya wi lela süpahithu pi shü thsü nten. Pala pahan pi mathu ya dsa nu jjüya thsülo, nu mathu yala mathu kadimiwa wi wha neng thsülo.”

²³Tsalina Israel kadimiwa na mathu ghena kemishu keti kesü sa; nu mathu na dsa nu jjü keya seng wi ma mathu kesun pi Siriya kadimiwa wi wha neng thsüa. Tsü nten na Siriya nyithu na Israel yyi yilakeshu tsü khen.

²⁴Matsü pahan seng wi Siriya kadimi Benhadad na ma süpahizi maben ssisen Israel shun nu Samaria nyunutiwa tsü vüya.

²⁵Vüya kesalina anyunutiwa wi kedsakejjü ghena agüccü ntsa sa nu gada li kesü men na rükatssü achentazen, nu nkhetsü keku [4] gram meza keni men na rükatssü manga sa wa.

²⁶Israel kadimiwa na anyunutiwa khweti miwi kegoe keten wi nza kesü na maghala, “Njenkeben Kadimiwa, hi kiqa cülo!”

²⁷Ma khineng, “Keujüla Apvüwa na no nkiqa lethu, hi mangwa pi no kiqa ya mehai nu? Hi awheng nyelela kisengtssü ben kwe?

²⁸Ngükeccü mangwa nu?” Nzawa na luneng, “Ghanan kesü nza hawa ha ishinyi gweghe itsa tsü pathi dsa, nu tsasengwa wi ma tsa tsü pathi dsale khile.

²⁹ Tsalina ishinyi na itsa tsü pathi pi shvu dsaya. Dhitsüwa wi hi ma kiza la ishinyi na ma tsa tsü pathi dsale khi, isala ma ma tsa tsüpi kuthile.”

³⁰Ha zakeya wi kadimiwa na ma leben gükeccü wi ma thsümeni mezüqhe, nu anyi ajjen-keshon tetsaki kebenthu na ma thsümeni cakhu wi aleshithsü pvü keten mu.

³¹Ma khi, “Keujüla hi nansü aghani npi kedu wi Elisha li wiya nsa lethu, Anyiza na hi pathi kesawa salo.”

³²Nu ma nyilo kesü kesun pi Elisha ssigholo wa thsüa. Tsü tsüwi Elisha na ajjen wi keshenpfüthu pahan na ma hhainan keghothu gwegheben. Kadimi nyilowa na npi kegho tuwi Elisha na keshenpfüthu wi khi, “Nyu kepathinyi katsüwa na hi pathi thsüale nyu pahan kesunchi ben le! Ma khathansha wi gho khe ajjen khentenya nu ma yala ndugho thsü lalo. Kadimiwa na ma sengwa sa tenla ben na.”

³³Ma tsü khi cenya meyi kadimiwa na gho nu khi, “Hawa ha Apvüwa na agükeccü ha sengho ithu miwi chile! Hi mangsale ma pala pahan kekuli tsü hie bendha nu?”