Read Northern Rengma Naga 2 KADIMITHU 8 Bible Online

2 KADIMITHU 8 - Northern Rengma Naga bible

2 KADIMITHU 8

¹ Elisha na nza Shunem wi kahangwa ma tsa sapi hang kecüwa wi Apvüwa na amapi tagü ghena azeng kesü pi ayyi hewi chiten na ma ma theghi ssinu ayyi kepa wi khiewa khe hangwalo kiza dha.

²Nzawa na ma kecükegwethu tsü nie nu ma theghi ssi wa Filistia wi amapi tagü ciwi hang wa.

³Amapi tagü sakhen wi nzawa na Israel wi kheneng gho ma yyi nu ma jjen tsü khuneng yale kadimiwa wi keü wa.

⁴Nzawa na Elisha maghawa Gehazi na kadimiwa ccüneng keben muya; kadimiwa na Elisha amankesa kekuli cüki tsü chüya mvu ben.

⁵Gehazi na Elisha khati nu anyi keshü kesü sapi hangya thsü khe khipi kadimiwa kiza keben wi Elisha na ma tsa sapi hang cü kesa nzawa tsüna gho kadimiwa wi ma yyi nu ma jjen ghena khi. Gehazi na ma wi khi, “Njenkeben Kadimiwa, hewi nzawa nu Elisha na ma tsa sapi hang cü kesawa tsü manyi na tenle!”

⁶Kadimiwa na Gehazi keü kebenwa cüki tsü nzawa na luneng chia; tsalina kadimiwa na kedi kesü cichi nu ma wi nzawa ji tsüdi pi nzawa na amapi tagü ma lli ncala kesa jüwi yangdsaketenthu mukeya tsüdi men saghu pi nzawa ccü neng lo kiza.

⁷Siriya kadimi Benhadad na naa keben tsüwi Elisha na Damaska wi wa. Khathansha wi Elisha na ciwi benle kesa pi kadimiwa kiza khe,

⁸ma ma kedithu jawi kesü Hazael wi khi, “Aju kesü khuya nu atusenjüh-kechüwa wi wa hi mehaiyala mehaiya nben khe Apvüwa ccüneng nanlo kesa ma wi keü nan thsülo.”

⁹Tsalina Hazael na Damaska wi muya keten atsanqai kemehai ntsathu tsüdi pi sunsiesathu jügha khhi sapvü nu Elisha wi wa. Hazael na wa ma metukeya wi ma khi, “Nmaghawa Kadimi Benhadad na hi kesun pi ma kesakinaa wi mehaiyala mehaiya nben khe no wi keü thsüben.”

¹⁰Elisha na luneng, “Ma shüabenle kesa Apvüwa na pi hi ccücadha; isala ma wi wala ma mehaiya benle ma kiza lo.”

¹¹Tsaseng wi Elisha na ma nyon satemeghe pi Hazael na npi kejüghe chu ma mmi tsü ghang. Elisha na zuli ma nyontssü qanca wa.

¹²Hazael na keü, “Kediwa, no mangkesa na qai ben nu?” Elisha na luneng, “Kepaghenanye no pala qhethiketen sapi Israel nyithu shun ben kesa hi chüben. No anni pi mathu khweti miwi chi, mathu kepvünyi kemehai ntsathu pathi, mathu ghanyithu cücha, nu mathu nza atsa-kenpvüthu pvü hanqhe ben.”

¹³ Hazael na keü, “Khatinu hi kekhang kedi tsüti saya mehai nu? Hi mangla nkenye nyi kesü na!” Elisha na khineng, “No Siriya kadimiwa sa ben kesa Apvüwa na pi hi ccücadha.”

¹⁴Hazael na Elisha teshi nu ma pvüwa wi wha neng, nu Benhadad na ma wi keü, “Elisha na khatile khiben nu?” Hazael na luneng, “Ma no mehaiya metsi benle hi kiza le.”

¹⁵Isala dhitsüwa wi Hazael na sükhuthsü kesü khuya nu pi atssü wi tenya nu pi kadimiwa mmi wi chi nu shü thsüa. Tsaseng wi Hazael na Benhadad shiwa sa kadimi saya.

¹⁶Ahab tsa Joram na Israel kadimi kesa mapi mangawa wi Jehoshafat tsa Jehoram na Judah kadimi saya,

¹⁷ma kahang mapi changha nu keni witsü, nu ma amapi tazen Jerusalem wi kekhang sen.

¹⁸Ma wubvü na Ahab nga, nu ma Ahab theghi ti Israel kadimithu nkemehai lenwa tsü nie. Ma sami pi Apvüwa shun,

¹⁹ isala Apvüwa na Judah tsü yasa nsamvu, kepaghenanye ma ma maghawa David wi ma shicübvüghathu na keshüthangla kekhang sen ben tenle khishi theng.

²⁰ Jehoram na kadikesa tsüwi Edom na Judah matangla shun nu ma kekhang kesen kadiyyi kepa saya.

²¹Tsalina Jehoram na ma gorugarithu tsüdi ssinu Zair wi wa nu ciwi Edom nyi süpahizi na mathu vüya. Aghaja wi ma nu ma gorugari benchüthu na bvü shhuya, nu ma süpahithu na bvü zighe sen nu mathu jjen wi wha.

²²Tsü nten na Edom na Judah wina ma kekhang kesen kepa saya. Ha tsüwi ha anyunutiwa Libnah la kivvü shagha.

²³Jehoram kekuli cükithu na Judah kadimithu cükikezhü wi zhü theng.

²⁴Jehoram na shü nu pi David Nyunutiwa wi kadi shüjjenthu wi vhüa, nu ma tsa Ahaziya na ma shiwa sa kadimi saya.

²⁵Ahab tsa Joram na Israel kadimi kesa mapi taghakeniwa wi Jehoram tsa Ahaziya na Judah kadimi saya,

²⁶ma kahang mapi ngwe nu keni witsü, nu ma Jerusalem wi amapi kesü kekhang sen. Ma jja Athaliya na Kadimi Ahab nga nu Israel Kadimi Omri ngawa nga.

²⁷Ahaziya na Kadimi Ahab shili kesa ghena ma la Ahab theghi ti sami pi Apvüwa shun.

²⁸Kadimi Ahaziya na Israel Kadimi Joram gweghe nu Siriya Kadimi Hazael ssinu aghisa. Süpahizithu na Gilead yyi Ramoth wi kesali, nu Joram na aghi wi mesa-mena ya.

²⁹Ma yisükesa witsü mehaiyale Jezreel nyunutiwa wi kheneng gho, nu Ahaziya na ciwi ma hhainnan wa.