Read Northern Rengma Naga 1 KHENICÜKI 11 Bible Online

1 KHENICÜKI 11 - Northern Rengma Naga bible

1 KHENICÜKI 11

¹Israel nyi tsüdila Hebron wi David wi wala ma wi khi, “Ithu na asajjü kesütan,

²Kheni Saul na ithu kadimiwa sa keben tsüwi lela no aghi wi Israel nyi ssi, nu Apvüwa n-Nyiza na no wi no ma nyithu ssiden nu mathu miwi kekhang kesenwa sa tenle kesa khishi theng.”

³Tsalina Israel ccülikesathu tsüdila Hebron wi Kadimi David wi gho. Ma mathu ssinu kemetha pfüwakesa kesü sa, mathu na adeli pi ma nyen cüa, nu Apvüwa na Samuel wina atusenjüh-khi ketheng ti ma Israel kadimiwa saya.

⁴ Kadimi David nu Israel nyithu tsüdi wala Jerusalem nyunutiwa ssikaghashen. Tsüna tsü tsüwi pi Jebus le khiden, nu aghatsan na ayyi ciwi hang keshhugho Jebus nyithu na khilila ciwi hangben.

⁵Jebus nyithu na David na khiela anyunutiwa non wi duya nbenle ma kiza, isala David na mathu Zion khweti ketheng tsü yaya nu tsüpi “David Nyunutiwa” le cia.

⁶David na khi, “Anyi atuwa sala Jebus nyi kesü pathi keyawa na süpahizi benchüwa sa ben.” Joab, ma jja na Zeruiya, tsüna atuwa sa ssikaghashen wa nu benchüwa saya.

⁷David na khweti non wi hang wa kesalina tsüpi “David Nyunutiwa” le cia.

⁸Ma anyunutiwa tsü sapfü, tsüna yyishiphon na nishuwa tsü mabenla nkaya.

⁹David na zü pfüpfü shagha, kepaghenanye Apvüwa Kekhang ntsawa na ma ssiden.

¹⁰Hathu hana David süpahi nyankemechan ntsathu. Israel nyi kepathu gweghe mathu na ma kiqa pi Apvüwa na khishi ketheng ti kadimiwa saya thsüa, nu mathu na ma kadiyyi sapi khang thsüa.

¹¹Atuwa na Hakhmon gei wi Jasobeam “Meshu Kecheng” jawi aliwa. Ma apie sen nu anyi meza kecheng ssisa nu aghikesa kesü wi mathu tsüdi yathikhia.

¹²Nyankemechan “Meshu Kecheng” jawi keniwa na Aho gei wi Dodo tsa Eleazar.

¹³Ma David wiwa sa nu Pas Dammin ghikesa wi Filistinthu ssisa. Ma achentha lli kesü wi keben wi Israel nyithu na nyu tubvü shagha,

¹⁴tsalina ma ma nyithu ssi wa alli non wi ngan nu Filistinthu ssisa. Apvüwa na khangkeya kedi pi ma cüa.

¹⁵Ghanan kesü süpahithu kemechan changha jawi kecheng na alonshi kesü wi David na Adullam Lonshiku kete wi keben witsü wa, tsü tsüwi Filistinthu akhang kesü na Refaim Yyiketijü wi kemnanpen saben.

¹⁶Tsü tsüwi David na khweti ketheng yyishiphon kesü wi ben, nu Filistinthu akhang kesü na Bethlehem tsü nkaya.

¹⁷David na ajjen wi nmvuya nu khi, “O, anyi pahan na wa Bethlehem kaghapeng jenka kete atssükhang witsü atssü sengho hi jjüya thsülo kheshülan!”

¹⁸Süpahi nyankemechan kecheng hathu na Filistinthu kemnanpen tsü pvüghe dula atssükhang witsü atssü ssuya nu sengho David cüa. Isala ma tsü njjüla meyisha pi Apvüwa wi kekinyi kesü sa,

¹⁹nu khi, “Hi khiela ha jjüya nten! Hi anyi mathu kahang khuchi nu kewathu jjü jjükeben ti sa benle!” Tsalina ma tsü njjü mvula. Hathu hana nyankemechan süpahithu kecheng na kempvüza kekulithu.

²⁰Joab cünyuwa Abishai na “Nyankemechan Meshu Changha” jawi nyankemechan ntsawa, nu mathu ccüliwa saya, isala ma “Meshu Kecheng” nyankemechan ti sa meya.

²¹Ma “Meshu Kecheng” wi anyankemechan ntsawa, nu mathu ccüliwa saya, isala “Kechengwa” ti anyankemechan sa meya.

²²Kabzeel wina kegho Jehoiada tsa Benaiya na kepa wi süpahi nyankemechan kesü; ma kempvüza kekuli kejonla sa, nu Moab nyi aghikekhang ntsathu keni qho pathia. Ma kuti aghola keca ghanan kesü wi ayyiku kesü wi dula ssensitemi kesü pathia.

²³Ma Ejipt nyi kedikesie kesü ma kesie na meter keni-u apie kedi khusen ketenwa tsü la pathia. Benaiya na adajen sen wa ma ssikaghashen nu Ejipt nyiwa wi apie tsü chhenya, nu tsüpi ma yathia.

²⁴Tsüthu tsüna “Meshu Changha” jawi meshu kesü Benaiya kempvüza kekulithu.

²⁵Ma “Meshu Changha” jawi nyankemechan kesü, isala ma “Meshu Kecheng” nyankemechan ti sa meya. David na Benaiya pi ma ghikehie jawi kediwa sa thsüa.

²⁶Hathu hana süpahi kemechan kepathu: Joab cünyuwa Asael Bethlehem wina kegho Dodo tsa Elhanan Harod wina kegho Shammoth Pelet wina kegho Helez Tekoa wina kegho Ikkesh tsa Ira Anathoth wina kegho Abiezer Husha wina kegho Sibbekai Aho wina kegho Ilai Netofa wina kegho Maharai Netofa wina kegho Baana tsa Heled Benjamin yyi Gibea wina kegho Ribai tsa Ithai Pirathon wina kegho Benaiya Gaash yyiketijü kete wina kegho Hurai Arba wina kegho Abiel Bahurum wina kegho Azmaveth Shaalbon wina kegho Eliaba Gizon wina kegho Hashem Harar wina kegho Shagee tsa Jonathan Harar wina kegho Sakhar tsa Ahiam Ur tsa Elifal Mekhera wina kegho Hefer Pelon wina kegho Ahijah Karmel wina kegho Hezro Ezbai tsa Naarai Nathan cünyuwa Joel Hagri tsa Mibhar Ammon wina kegho Zelek Beeroth wina kegho Joab ghighe kepvüwa Naharai Jattir wina (...)