Read Northern Rengma Naga 1 KHENICÜKI 13 Bible Online

1 KHENICÜKI 13 - Northern Rengma Naga bible

1 KHENICÜKI 13

¹David na anyi hazar kesü miwi nu meza kesü miwi kedithu tsüdi wi kecenkinali.

²Tsaseng wi ma Israel nyi tsüdi wi jishachi, “Keujüla ha nthu kenen nu Apvüwa ithu Nyiza kemeshen lethu, ithu na nyilothu kesun pi ithu diyyi nyi kepathu nu mathu nyutithu wi keqhaikedithu nu Levi nyithu wi ghola hewi ithu gweghe mehulo kesa mathu kiza thsü na.

³Isanu ithu na wala Saul na kadimi sa keben tsüwi teshi kesawa Anyiza Cenkethenjüh Khitson tsü pieya na.”

⁴Anyithu na khikechi jüh tsü nenya nu mathu na tsüti sale cenya.

⁵Tsalina David na Kiriath Jearim wina Cenkethenjüh Khitsonwa tsü pieya nu Jerusalem wi ghole kesalina diyyiwa maben, acülawa Ejipt kemeggü na wala aghawa Hamath Pass kecu wi Israel nyithu saghu ya.

⁶ David nu anyithu na Judah yyiwi Baala nyunutiwa, tsüna Kiriath Jearim wi, Anyiza Cenkethenjüh Khitson, Apvüwa, cherubim miwi donki keben kadipenwa nyan ci ketheng tsü khuyale wa.

⁷Mathu na Abinadab jjen wina Cenkethenjüh Khitsonwa tsü pie shhugho amesü gari ketheü kesü miwi chiya. Uzza nu Ahio manyi na tsü ssi wa,

⁸nu David nu anyithu tsüdila mathu kezü tsüdi sen nu nashü pi Anyiza kinyikü. Mathu na akhwisa nu akhwikesa tsanqaithu — harp, nu tutuwathu khou, apha, nu simbal kihhe.

⁹Mathu na gho Khidon niegi tsü cukeya wi amesü süpon keni na cüchen chi nu Uzza na ma kwen pi Cenkethenjüh Khitsonwa tsü ghantenya.

¹⁰Uzza na Akhitson tsü kekidhen ghena Apvüwa na ma miwi aghepvüya nu ma pathia. Ma Anyiza tuwi shüa,

¹¹tsalina tsü nten na apen tsüpi Perez Uzza cia. Apvüwa na aghekepvü wina Uzza meten cü kesalina David na ma lebentsu ntsa sa.

¹²Tsaseng wi David na Anyiza messiya nu khi, “Hi khatinu Cenkethenjüh Khitsonwa ha sen nu hi gweghe whaya nu?”

¹³Tsalina David na tsü khusen nu ma gweghe Jerusalem wi nwhala. Ma tsü teshi pi anyi kesü ma nyan Obed Edom, Gath nyunutiwa wi kepvügha nyi kesü jjen wi chia.

¹⁴ Tsüna asha kecheng ciwi ben, nu Apvüwa na sawegü pi Obed Edom theghi nu ma keben tsüdi miwi chicü.