Read Northern Rengma Naga 1 KHENICÜKI 14 Bible Online

1 KHENICÜKI 14 - Northern Rengma Naga bible

1 KHENICÜKI 14

¹Tur Kadimi Hiram na nyilothu kesun pi David wi chi; ma sedar chan kedhithu khuchi, nu alon kahathu nu achan kecühthu kesunchi pi ma kadijjen sa thsü.

²Tsalina David na Apvüwa na ma sapi Israel miwi kadimiwa sa thsü nu ma nyithu ghena ma kadiyyi sapi mehai pfüpfü yale kesa chüya.

³Jerusalem wi David na awubvü jipfü yaya nu atsanga kejon benya.

⁴Jerusalem wi ma atsanga hathu muya: Shammuya, Shoba, Nathan, Solomon,

⁵Ibhar, Elishua, Elipelet,

⁶Noga, Nefeg, Jafia,

⁷Elishama, Beeliada nu Elifelet.

⁸Khathansha wi Filistinthu na David pila Israel diyyiwa maben miwi kadimiwa sa thsüdha le kesa zaya khe mathu süpahizi na ma ghanyale wa. Tsalina David na mathu metule wa.

⁹Filistinthu na gho Refaim yyiketijü cuya nu yasa shhugho.

¹⁰David na Anyiza wi keü, “Hi wala Filistinthu ssisala? No khangkeya pi hi cüben ma?” Apvüwa na luneng, “Anle, wa mathu ssisalo! Hi khangkeya pi no cüben na!”

¹¹Tsalina David na wala Baal Perazim wi mathu ssisa nu mathu chaya. Ma khi, “Anyiza na hi sen nu atssüketi ti aghinyi süpahizi pvüdhi shhuyadha.” Tsalina apen tsüpi Baal Perazim [10] le cia.

¹²Filistinthu na mathu tsikezhüthu tsü teshi nu bvüa, nu David na tsüthu pi mecanglo ahza khuchia.

¹³Tsümeyi Filistinthu na yyiketijü wi kheneng gho yasa shagha.

¹⁴Kheneng David na kuti Anyiza ccüneng, nu ma luneng, “Hawi ha mathu nssisala, isala wala pahanwa balsam chanton kete wina mathu ssisale kiden yalo.

¹⁵No khathansha wi achanton milithu wi alenketsen hhai zaya khe wala ssisalo, kepaghenanye hi ntuwi na wa Filistin süpahizi chayaden.”

¹⁶David na Anyiza na mangwale ma kiza khe tsü sa, tsalina ma Gibeon wina Filistinthu jügü neng sen wa Gezer kecu wi chia.

¹⁷David nyankethang na apen tsüdi wi la bvüzighe, nu Apvüwa na mizzatenti tsüdi sapi ma messi wa thsüa.