Read Northern Rengma Naga 1 KHENICÜKI 15 Bible Online

1 KHENICÜKI 15 - Northern Rengma Naga bible

1 KHENICÜKI 15

¹David na ma ghena David Nyunutiwa[11] wi ajjenthu saya. Ma Anyiza Cenkethenjüh Khitson tsüghena la apen kesü kidenya nu ciwi nithsüjjen kesü saya.

²Tsaseng wi ma khi, “Levi nyithu ketan Cenkethenjüh Khitsonwa tsü pie ben, kepaghenanye Apvüwa na mathu ya tsü pie thsü nu anuphanla ma kekuli sa thsüle kessiyadha.

³David na Cenkethenjüh Khitson tsü sen nu ma Jerusalem wi apen kiden ketheng witsü ghole kesalina ma Israel nyi tsüdi cighu chi.

⁴Tsaseng wi ma Aaron shicübvüghathu nu Levi nyithu cichi.

⁵Levi nyi Kohath gei wi Uriel, ma gei wi anyi 120 miwi kebenwa;

⁶Merari gei wi Asaiya, anyi 220 miwi kebenwa;

⁷Gershon gei wi Jel, anyi 130 miwi kebenwa;

⁸Elizafan gei wi Shemaiya, anyi 200 miwi kebenwa;

⁹Hebron gei wi Eliel, anyi 80 miwi kebenwa;

¹⁰nu Uzziel gei wi Amminadab, anyi 112 miwi kebenwa tsüti ghoya.”

¹¹David na keqhaikedi keni Zadok nu Abiathar, nu Levi nyi tugho — Uriel, Asaiya, Joel, Shemaiya, Eliel, nu Amminadab cichi.

¹²Ma Levi nyithu wi khi, “Nthu na Levi nyi geithu wi accülikesathu. Apvüwa Israel Nyizawa Cenkethenjüh Khitson tsü pie nu hi apen kiden ketheng witsü ghole kesalina nthu ketanla nthu nu nthu Levi nyithu satemetha yalo.

¹³Kepaghenanye nthu na hatuwi tsü piele kesa ghena ciwi nmi, Apvüwa ithu Nyiza na ithu kesau wi ma nkinyila kesa ghena ma ithu meten cüle.”

¹⁴Tsaseng wi keqhaikedithu nu Levi nyithu na Apvüwa Israel Nyizawa Cenkethenjüh Khitson tsü pie ketsenle kesalina mathu ketanla mathu satemethaya.

¹⁵Apvüwa na Mosa wina khi ketheng ti Levi nyithu na kepiechan pi mathu depfü miwi chi nu tsü pie.

¹⁶David na ahza pi Levi nyi ccülikesathu cü nu Levi nyithu ya kepapa sala akhwisa nu anonkeghe sa harp khou nu simbalthu kihhelo pi dhenchia.

¹⁷Mathu na akhwi kesathu gei wi anyi hathu kessi pila lezza simbalthu kihhe thsü: Joel tsa Heman, ma shiliwa Berekhiya tsa Asaf, nu Merari gei wi Kushaiya tsa Etham. Tsüthu kiqa thsüle kesa ghena mathu na Levi nyi hathu kessi pi harpthu kentongwa khou thsü: Zekhariya, Jaaziel, Shemiramoth, Jehiel, Unni, Eliab, Maasaia, nu Benaiya. Harpthu khou pi abvü sa thsüle kesalina mathu na Levi nyi hathu ha kessiya: Mattithiya, Elifelehu, Mikneia, Azaziria, nu Kekinyijjen ghikehiethu, Obed Edom nu Jeiel.

²²Khenaniya na akhwi kesachü ghena ma kessi pi Levi nyi akhwi kesathu kessiwa sa thsü.

²³Berekhiya nu Elkanah pila Obed Edom nu Jehia mathu kessi pi Cenkethenjüh Khitsonwa ghikehiethu sa thsü. Keqhaikedithu Shebaniya, Joshafat, Nethanel, Amasai, Zekhariya, Benaiya, nu Eliezer kessi pi Cenkethenjüh Khitson tuwi tutuwa kekhouthu sa thsü.

²⁵Tsalina Kadimi David, Israel ccülikesathu, nu süpahi benchüthu na Cenkethenjüh Khitsonwa tsü pieyale Obed Edom jjen wi wa, nu mathu na kemini kedi sa.

²⁶Anyiza na Cenkethenjüh Khitsonwa pie keten Levi nyithu tsü kiqa thsüle kesalina mathu na amesü süpon tagü nu khaghaneni tagü pathi pi ahhansha sa.

²⁷David, akhwikesathu, mathu ccüliwa Khenaniya, nu Akhitson pie keten Levi nyithu tsüdila linen kemehai pi kesa agwomejuwa kaghazu pvüden. David na adeshi kewhengthsü la pvüden.

²⁸Tsalina Israel nyithu tsüdila Cenkethenjüh Khitsonwa tsü niela tutuwa, aghacü, nu harpthu khou, nu akhwi sala simbalthu kihhe sen nu anonkeghe sa Jerusalem wi shu.

²⁹Akhitsonwa tsü pie nu anyunutiwa non wi du keten wi Saul ngawa Mikhal na ajjenkubhi wina ghangchi nan David na ma nonkeghe wina nashü nu kephenki keben mu, nu nzawa na ma leben wina ma nankeqhe.