Read Northern Rengma Naga 1 KHENICÜKI 16 Bible Online

1 KHENICÜKI 16 - Northern Rengma Naga bible

1 KHENICÜKI 16

¹Mathu na Cenkethenjüh Khitsonwa tsü pie nu David na tsü ghena anithsüjjen kiden ketheng witsü wa nu pi ma non wi chia. Tsaseng wi mathu na ahhanshathu nu kecca ghena kekinyi sapi Anyiza wi chi.

²David na ahhansha kekinyi kesacen seng wi ma Apvüwa nyan wina sawegü pi anyithu cü,

³nu kedsakejjü pi mathu tsüdila gishü cü. Ma amesa be kesü, asa kegü sakü kesü, nu kemeshentsse keqen pahan pi Israel wi nza nu npvüza kesüsü cü.

⁴David na Levi nyithu pahan pi Cenkethenjüh Khitson tuwi Apvüwa Israel Nyizawa kekinyi wi akhwisa pi ma keseng wi kessithu sa thsü.

⁵Asaf pi aliwa nu Zekhariya pi ma kekiqawa sa thsü. Jeiel, Shemiramoth, Jehiel, Mattithiya, Eliab, Benaiya, Obed Edom, nu Jeiel, hathu na harpthu khou. Asaf na simbal kihhe,

⁶nu keqhaikedi Benaiya nu Jahaziel manyi na keshüthangla Cenkethenjüh Khitson tuwi tutuwa khou.

⁷Hawa ha atuwa David na Apvüwa keseng khwikesa khhi tsüpi Asaf nu ma Levi nyithu kecü.

⁸Keseng pi Apvüwa cülo, ma kedi pi thangchilo; ma mangwa kulichidha khe pi mizzatentithu kizalo.

⁹Akhwi sa pi Apvüwa senglo; ma amankesa kekulithu tsüpi kizalo.

¹⁰Nonghe yalo ithu na ma ji le; ma kinyi ketenthu tsüdila anongheya thsülo!

¹¹Apvüwa wi kekiqa bha walo, nu keshüthangla ma kinyitenlo.

¹²Nthu Anyiza maghawa Jakob shicübvüghathu, Anyiza na kessiya kesa Israel shicübvüghathu, Anyiza na amankesa kulikechithu, nu ma ajühkekaghaten khukechithu tsü meshen yalo.

¹⁴Apvüwa na ithu Nyiza; ma yenkhukechithu tsüna ayyi nyi tsüdi ghena.

¹⁵Khiela Anyiza Cenkethenjüh tsü nmalila, tsüna ma anuphan ghena sa theng,

¹⁶ ma Cenkethenjüh tsüna Abraham ssinu sa, ma Isak wi khishichi.

¹⁷ Apvüwa na Jakob ssinu Cenkethenjüh kesü sa, tsüwa tsüna anuphanla benden.

¹⁸Ma khi, “Hi Kanaan yyi tsüpi nthu cüden, tsüwa tsüpi nthu ji sayaben.”

¹⁹Anyiza nyithu na keu ketan, Kanaan yyiwi kijünyi thu sa.

²⁰Mathu diyyi kesü wina kesü wi keqoedeja, kadiyyi kesü wina kesü wi wa.

²¹ Isala Anyiza na anyi thola mathu npasha thsü; mathu khwele kesalina ma kadimithu kitsanchi:

²²“Hi kessiya kesa amaghathu npatenala; itusenjüh-kechüthu nkidhenla.”

²³Ayyi tsüdila akhwisa pi Apvüwa senglo! Atsathangla ma ithu hangsha yadhale kesa ajühkemehaiwa tsüpi thangchilo.

²⁴Ma nyankethang tsüpi mizzatentithu wi thangchilo. ma kekhang kekulithu tsüpi anyi tsüdi kizalo.

²⁵Apvüwa na di ntsawa nu ma seng ntsa kesaule; acenpvü tsüdi miwila ma kekinyikü-ule.

²⁶Mizzatentithu kepa wi cenpvüthu tsüdila tsikezhü ketan, isala Apvüwa tsü atssanthu sachi.

²⁷Nyankethang nu ajenkeben na ma vüben, kekhang nu anonkeghe na ma Kekinyijjen pong ben.

²⁸Ayyiwi anyi tsüdila Apvüwa senglo, ma nyankethang nu kekhang tsü senglo.

²⁹Apvüwa nyankethang nyanwa tsü senglo, kekinyi kesü sen nu ma Kekinyijjen wi gholo. Kemethawa na shhugho lethu ma tuwi kukedulo;

³⁰ayyi tsüdila ma tuwi kedheggü! Ayyiwa tsüna zükeqheben nu kuli meyacha.

³¹Anonghelo, atssan nu ayyi! Apvüwa na kadimiwa le kesa pi mizzatentithu kizalo.

³²Atssükedone, no nu no wi kahangthu tsüdila ghamo thsü; allithu, nthu nu nthu wi kebenthu tsüdila anonghe thsülo!

³³Ayinong wi achantonthu na Apvüwa tuwi anonkeghe wina jisha ben, ma ayyiwi kekhang senle kegho wi.

³⁴ Keseng pi Apvüwa cülo; kepaghenanye ma mehai; ma kaghali na anuphanla benden.

³⁵Ma wi hati khilo, “O, Anyiza, ithu Hangshawa, ithu hangsha yalo; ithu saghu yalo; mizzatentithu wina ithu kekashaya, isanu ithu na no nkesengcha sala n-nyan kemethawa tsü seng thsülo.”

³⁶Israel Nyizawa Apvüwa tsü senglo! Khili nu anuphanla ma senglo! Tsaseng wi anyi tsüdila khi, “Amen”, nu Apvüwa seng.

³⁷Kadimi David na Asaf nu ma Levi nyithu pi Cenkethenjüh Khitson kechipen wi keshüthangla kekinyi ghena aliwathu sa thsüa. Mathu na keshüthangla ciwi mathu kekuli sa.

³⁸Jeduthun tsa Obed Edom nu ma gei wi anyi achentugho nu tazen na mathu kiqa. Hosah nu Obed Edom na kaghapeng jenkathu ghikehie wi accülithu sa.

³⁹Keqhaikediwa Zadok nu ma pvüshang keqhaikedithu na Gibeon wi kekinyi pen wi Apvüwa kekinyi wi aliwathu sa.

⁴⁰Aghanen nu minulen tsüdila Apvüwa na Ayenwa pi Israel kecü tsü kenie wina mathu na kekinyipen miwi ahhansha kesa tsü mabenla pi mecangden.

⁴¹Ciwi mathu gweghe keten Heman nu Juduthum nu kepathu na Apvüwa kaghali na anuphan le kesa ma kesaki khwi kesa ghena kessi kethengthu na mathu gweghe ben.

⁴²Heman nu Jeduthun manyi na achünong kepathu ghena lela aliwathu. Jeduthun gei wi anyithu na kaghapeng jenkathu ghikehie wi aliwathu saden.

⁴³ Tsaseng wi anyi tsüdila ajjen wi wha, nu David la ajjen wi whala ma theghi gweghe matsü pahan ben wa.