Read Northern Rengma Naga 1 KHENICÜKI 17 Bible Online

1 KHENICÜKI 17 - Northern Rengma Naga bible

1 KHENICÜKI 17

¹Kadimi David na khili tsü wi ha ma kadijjen wi hang den. Ghanan kesü ma atusenjüh-kechüwa Nathan cichi nu ma wi khi, “Hi hewi sedar chan pi ajjen sa ketheng kesü wi hangben, isala Apvüwa Cenkethenjüh Khitsonwa tsü pila anithsüjjen kesü wi chi thengle!”

²Nathan na luneng, “No nleben wi mangwa meshenben khe tsü sayalo, kepaghenanye Anyiza na no ssitenle.”

³Isala Anyiza na tsü ghaja Nathan wi khi,

⁴“Wala imaghawa David wi hi ma wi khiben le kizalo. ‘Hi ya hang thsüle kesa ghena kekinyijjenwa tsü no saya nben.

⁵Hi Ejipt wina Israel nyithu kekasha keya tsü wina gho khili kecu hi khiela kekinyijjen kesü wila nhang; hi keshüthangla nithsüjjen wi hang nu apen kesü wina kesü wi ketsen waden.

⁶Hi Israel nyithu gweghe kijünyi kewa chuli wi hi mathu pi accülisa thsü kethengthu kesü wila mathu mankesa na sedar chan pi kekinyijjen kesü sapi hi ncü nu kesa hi khiela nkeü.’

⁷“Tsalina wala imaghawa David wi hi Kekhang ntsawa Apvüwa na ma wi khiben le kizalo. ‘No alli wi khaghanenithu hie keten hi no khuya nu no pi Israel nyithu miwi kekhang kesenwa sa thsü.

⁸Hi no khiewa wa khe no ssigho, nu no atujügü wathu hi nghinyithu tsüdi chaya. Hi no pi ayyiwi accülikesathu nyankemechan ntsawa sa thsü theng.

⁹Hi inyi Israel ghena apen kesü kessiya nu mathu pi ciwi ben thsüa, mathu na ciwi kepasha nmila hang tendha. Mathu na ayyi hawa wi duya meyi yasayala nyithu na mathu ssisa ghoben, isala hati ha nsa nengdha. Hi ighinyithu tsüdi chaya nu ashicübvüghathu pi no cüle khishiben.

¹¹No khathansha wi shü nu pi nbamyithu gweghe vhü khe hi ntsa kesü pi kadimiwa saya thsü nu ma kadiyyi sapi khang thsüben.

¹²Ma ighena kekinyijjen kesü tsü sa ketenwa sa ben, nu hi ma kadishiwa tsü sapi anuphanla ben thsü metsiden.

¹³ Hi ma ba sa nu ma itsa sa ben. Hi Saul khupi nu no pi kadimiwa sa thsü kesa tsüti hi ma nkiqala sa nben.

¹⁴Hi ma pi anuphanla inyithu nu hi kadiyyi wi aliwa sa thsüden.’ ”

¹⁵Nathan na Anyiza na pi ma keccüca tsüdila khipi David kiza.

¹⁶Tsaseng wi Kadimi David na Apvüwa ketenpen Nithsüjjen wi dula donki nu kekhie sa, “Apvüwa Anyiza, no sa kechi tsü hi nyelela itheghi ghena nsa qole.

¹⁷Isala no khilila tsü miwi kejiki saben; no ghaketen wi ishicübvüghathu ghena khishikechithu la sadha, nu no, Apvüwa Anyiza, hi pi kedi nyi kesü ti saben.

¹⁸Hi ha miwi mangwale khipi no kizadha nu! No mehaitsü hi chüben, isala no hi nmaghawa ha kinyikü cüdha.

¹⁹No ighena ha sa kechi nu haseng wi ighena pala kedi pi ccücha kechi ha tsüdila no kemeshen nu no kenen wina le.

²⁰Apvüwa, ciwi no ti kesa kesüla nmi; ithu na keshüthangla no ketan Anyiza le kesa chüben.

²¹Ciwi mizzatenti kesüla Israel ti kesa ayyiwi nmi, no nssümagha sa keben wi mathu kekashaya nu mathu pi n-nyithu saya. No mathu ghena pala kedi nu amankesa kuli kechithu ghena ayyi tsüdi wi n-nyankemechan sachidha. No Ejipt wi n-nyithu kekashaya nu n-nyithu na atujügü wathu no mizzatenti kepathu jügüshia.

²²No Israel pi anuphan ghena n-nyithu sayadha, nu no Apvüwa, no mathu Nyiza sayadha.

²³“Apvüwa Anyiza, khili no anuphan ghena hi nu ishicübvüghathu ghena khishi ketheng tsü sacen, nu no sale khi ketheng tsü salo.

²⁴N-nyankemechan na di ntsa, nu anyithu na anuphanla hati khiben, ‘Apvüwa Kekhang ntsawa na Israel miwi Anyiza.’ Nu no anuphan ghena hi kadishi nonccaden.

²⁵Hi kempvüza sala no, iNyiza wi kekhie ha saya mehaidha, kepaghenanye no hathu ha tsüdi pi nmaghawa hi ccücadha. nu no ishicübvüghathu pi kadimithu sa thsü benle hi kizadha.

²⁶No Apvüwa Anyiza, nu no amankesa ha hi wi khishichidha.

²⁷No sawegü pi ishicübvüghathu cü nu mathu na no kenen wi anongheki benya thsüle kesalina hi no wi khieben. No Apvüwa, sawegü pi mathu cüdha, nu no kesawegü na anuphanla mathu miwi benden.”