Read Northern Rengma Naga 1 KHENICÜKI 19 Bible Online

1 KHENICÜKI 19 - Northern Rengma Naga bible

1 KHENICÜKI 19

¹Matsü pahan seng wi Ammon kadimi Nahash na shü, nu ma tsa Hanun na kadimi saya.

²Kadimi David na khi, “Hi gweghe pvüshang kemehai jühkeya pi Hanun, ma ba Nahash na hi wi kesa ti pi ma nccücathu yishü ben.” Tsalina David na nyilothu kesun pi ma ketizenjüh khiwa thsü. Mathu na wala Ammon cukeya wi Kadimi Hanun ssikemetuli wa.

³Ammon nyi ccülikesathu na kadimiwa wi khi, “No kemeshentsü David na nba kekinyikü wina anyi hathu kesun pi no ketizenjüh khigho thsüle saben kwe? Nyele! Ma n-yyi nkayale kesalina mathu kesun pi wahhaithu sala tsü hhainan thsü ghoben le!”

⁴Hanun na David nyilothu tsü ghan pi mathu pangkenye cah, mathu geshi wi athsümeni hanqhe, nu mathu kesun pi bvü thsüa.

⁵Mathu na ajjen wi ghoneng le kesa na mathu jüghe mtsüa. David na mangwa khati sadha khe zakeya wi ma ajüh pi mathu wi mathu pangkenye npi shigü neng keya chu nghoneng la nu wala Jerikho wi benlalo kiza.

⁶Kadimi Hanun nu Ammon nyithu na mathu David sapi mathu ghinyi sa thsüdha kesa chüya, tsalina mathu na rükatssü kilogram hazar changha nu mejü pi Mesopotamia Mmiwa nu Siriya nyi yyi Maaka nu Zoba wi gorugarithu nu goru kessithu denga.

⁷Mathu na gorugari hazar changha nu keni ketenga tsü nu Maaka kadimi süpahizi na ghola Medeba kete wi kemnanpen saya. Ammon nyithu la mathu nyunutithu wina shhugho kesali le apenza saya.

⁸David na mangwa khati sadha khe zakeya wi ma Joab nu süpahizi maben kesunshi chi.

⁹Ammon nyithu na shhugho mathu nyunuti ghazenwa Rabbah kedulen wi kidenya, nu kadimithu ma kiqa keghothu na allithu wi mathu penza saya.

¹⁰Joab na aghinyi süpahithu na atu-uwa nu asengwa na ma ssisale keben tsü muya, tsalina ma Israel süpahi kemehai ntsathu kessiya nu mathu pi Siriya nyithu wiwa peghela apenza saya thsüa.

¹¹Ma ma süpahi kepathu pi ma cünyuwa Abishai kekhu wi chia, nu ma mathu pi Ammon nyithu wiwa peghela apenza saya thsüa.

¹²Joab na ma wi khi, “Keujüla no Siriya nyithu na hi chagho keten mu lethu, ghola hi kiqalo; nu keujüla Ammon nyithu na no chagho keten mu lethu, hi ghola no kiqaben.

¹³Leben zükeqhe nu kempvüza sayalo! Ithu nyithu nu ithu Nyiza nyunutithu ghena apiketsü sala aghisa na. Nu Apvüwa na ma kemeshen sa keyawa salo.”

¹⁴Joab nu ma nyithu na ssisale atujügü wa, nu Siriya nyithu na bvüa.

¹⁵Khathansha wi Ammon nyithu na Siriya nyithu bvü keten mu khe, mathu na Abishai wina bvü sen nu anyunutiwa wi dua. Tsaseng wi Joab na Jerusalem wi whaneng.

¹⁶Siriya nyithu na mathu Israel nyithu nchaladha kesa chüya, tsalina mathu na wala Eufrat Ghaku na nishuwa Siriya nyi yyithu wi süpahithu ssighola mathu pi Zoba wi Kadimi Hadadezer süpahizi benchüwa Shobakh kekhu wi chia.

¹⁷David na tsü cüki za keya wi ma Israel nyi süpahi tsüdi saghuya nu Jordan Ghaku pvüdhi wa, nu mathu pi Siriya nyithu wiwa peghela apenza saya thsü. Aghi kesali shhu,

¹⁸nu Israel nyithu na Siriya nyi süpahizi jügü neng. David nu ma nyithu na Siriya nyi gorugari kessithu hazar tagü nu ayyi süpahithu hazar jügha pathia. Mathu na Siriya nyi benchüwa Shobakh la pathia.

¹⁹Khathansha wi Hadadezer kekhu wi keben kadimithu na Israel na mathu chayadha kesa chüya khe mathu na David ssinu ponghu nu ma kekhu wi ben wa. Siriya nyithu na khiela Ammon nyithu nkiqa neng mvula.