Read Northern Rengma Naga 1 KHENICÜKI 21 Bible Online

1 KHENICÜKI 21 - Northern Rengma Naga bible

1 KHENICÜKI 21

¹Satan na agükeccü sengho Israel miwi chimvu sa, tsalina ma David sapi nyanzhüghu thsüle südheya.

²David na ahza pi Joab nu kedithu cü, “Israel diyyiwa kenten kesü wina wa pahanwa kecu wi wala anyithu si nanlo. Hi ciwi anyi khaju ben khe chüya mvu benle.”

³Joab na luneng, “Apvüwa na Israel nyithu sapi mathu khili keben miwi meza tughu jikayi kecüwa salo! Njenkebenwa, mathu tsüdila nmaghathu. No mankesa na hati sa nu mizzatenti maben sapi sazzi thsü mvuben nu?”

⁴Isala kadimiwa na Joab ya ahza tsü nie thsüa. Joab na Israel diyyiwa wi maben wa nu tsaseng Jerusalem wi kheneng gho.

⁵Ma ghola Kadimi David wi anyi aghi waya kemehai khaju ben khe maben pi kiza; Israel wi 1,100, 000 nu Judah wi 470,000 na ben.

⁶Joab na kadimiwa ahza tsü n-niela kesalina ma Levi nu Benjamin mizza nyithu nyan nzhüghula. nb

⁷Mangwa khati sadha khe Anyiza na tsü n-nenla, tsalina ma Israel meten cüa.

⁸David na Anyiza wi khi, “Hi ha kesa ghena kesami qhethiketen kesü sadha. Nchala hi kesami teshi cülo. Hi kejüphon kekuli sadha.”

⁹Apvüwa na David ghena atusenjüh-kechüwa Gad wi khi,

¹⁰“Wala David wi hi ajjügi kecheng pi ma cübenle kizalo. Ma khawa kessi yaten khe hi tsü sa ben.”

¹¹Gad na David wi wa nu Apvüwa na mangwale khi khe pi ma kiza, nu ma wi keü, “Khawa sa thsü ten nu?

¹²Amapi kecheng azengla? Nyelela asha kecheng nghinyithu tu kebvüla? Nyelela Apvüwa na ghanan kecheng ma njünnu pi no ssisa nu adhagha kesü kesun pi n-yyiwi chi nu ma tangnyilo sen nu keshü sengho Israel tsüdi miwi chi thsü nu? Hi khawa khipi Apvüwa kiza nu?”

¹³David na Gad luneng, “Hi sakeyishü ntsa wi bendha le! Isala hi anyi ya hi nmeten thsü mvu. Apvüwa ya ma ketanla hi meten thsülo, kepaghenanye ma nyu nantizen ketenwa.”

¹⁴Tsalina Apvüwa na adhagha kesü kesun pi Israel miwi chi, mathu anyi hazar achentagü na shüa.

¹⁵Tsaseng wi ma tang- nyilo kesü kesun pi Jerusalem yasa thsü, isala ma kemeshen kemili nu nyilowa wi khi, “Teshiyilo! Tsü mehaidha le!” Tangnyilowa na Jebus nyiwa Arauna niegi kete wi nganben.

¹⁶David na tangnyilowa na njünnu hanshi sen nu atssan nu ayyi manyi jüwi ngan nu Jerusalem yasale keben tsü muya. Tsaseng wi David nu anyi ccülikesathu tsüdila aleshithsü mphi nu kukedu, mathu mmi pi ayyiwi nkhwenki.

¹⁷David na khie, “O Anyiza, hi sazzi kesawa tsüle. Hi nyanzhüghulo ahza khuchi. Anyi hathu na mangwa sazzi theng nu? Apvüwa iNyiza, hi nu itheghi meten cülo, nu n-nyithu hangsha cülo.”

¹⁸Apvüwa nyilowa na Gad kiza nu David kizala wala Arauna niegi wi kekinyipen kesü sapi Apvüwa cülo kiza thsü.

¹⁹David na Apvüwa jühkina nu wala Gad na ma kekiza ti sa.

²⁰Ciwi Arauna niegi wi ma tsa mejü na awhengsu ghaceng ben, ma tsathu na tangnyilowa kemu wi ma tubvü wala kuthi wa.

²¹Arauna na Kadimi David na ma tetsaki gho keten muya meyi ma niegi teshi nu wala kukedu ma mmi pi ayyiwi nkhwenki wa.

²²David na ma wi khi, “N-niegi tsüpi hi shüya thsülo, isanu adhagha tsü khen thsüale kesalina hi Apvüwa ghena kekinyipen kesü sa den. Hi ma men maben pi no cüaben na.”

²³Arauna na khi, “Njenkeben Kadimiwa, tsü khuya nu pi no kenenwa sayalo. Hewi amesü süponthu hapi kekinyipen miwi mecang pi kekinyi ghena ben, nu hewi kaghaceng chanthu hapi kemecang chan saya, nu awhengsu hapi kekinyi sayalo. Hi tsüthu maben pi no cüaben.”

²⁴Isala Kadimiwa na luneng, “Nyele, hi tsüthu men maben sapi no cüaten le. Hi ma men nkesa pala pahan, nu njithu tsüpi ahhansha sapi Apvüwa cü nbenle.”

²⁵Isanu ma suna apisa meza tugho pi aniegi tsü ghena Arauna cüa.

²⁶Ma ciwi kekinyipen kesü saya nu mecang pi kekinyi nu kecca ghena kekinyi sapi Apvüwa wi chi. Ma kekhie sa, nu Apvüwa na ma luneng chi nu tangwi anni kesunsha pi kekinyipen miwi ahhanshathu tsü mecang.

²⁷Apvüwa na tangnyilowa ya ma njünnu pi thenglo kiza, nu tangnyilowa na tsüti sa.

²⁸David na hawi Apvüwa na ma kekhie luneng cüdhale kesa chüya, tsalina ma Arauna niegi wi kekinyipen sa ketheng miwi ahhanshathu sachi.

²⁹Ha tsüwi ha kheni Mosa na aghansha wi Apvüwa ketenpen Nithsüjjen kesa tsü, nu ahhanshathu pi ma miwi kemecang kekinyipenwa tsüna khilila Gibeon wi kekinyipen wi ben;

³⁰isala David na ciwi wala Anyiza kinyi meya, kepaghenanye ma Apvüwa nyilowa njünnu tsü kemessi ghena.