Read Northern Rengma Naga 1 KHENICÜKI 22 Bible Online

1 KHENICÜKI 22 - Northern Rengma Naga bible

1 KHENICÜKI 22

¹Tsalina David na khi, “Apen hawi Apvüwa Anyiza Kekinyijjen tsü sa ben. He wi Israel nyithu na mecang pi kinyi keten kekinyipenwa tsüna ben.”

²Kadimi David na ahza khuchi nu asangthu Israel yyiwi hang keben tsüdi saghu ya, nu mathu pi kekuli sa thsüa. Mathu pahan na Kekinyijjenwa kesa ghena alonthu hah.

³Ma kejentenji nu achan pi kaghapeng jenkathu kesa ghena kizantenjithu sale kesa amighe kejon khuchi, nu lezza ji ntsa sa kesalina thola tsü whu meyala.

⁴Ma Tur nu Sidon nyithu yala sedar chankedhithu kejon sengho ma cü thsü.

⁵David kemeshen na, “Itsa Solomon na sa keten Kekinyijjenwa tsüna mehai ntsa nu ayyiwi nyankemechan sa den. Isala ma ghanyi saben nu mangla npi sanan, tsalina hi tsü ghena kiden-kesha nsathu yishü.” Tsalina David na ma npi keshü tu wina ajjen tsanqaithu kejon kidenya.

⁶Ma ma tsa Solomon cichi nu ma Apvüwa Israel Nyizawa ghena kekinyijjen kesü salo ma kiza.

⁷ David na ma wi khi, “Itsa, hi Apvüwa iNyiza kekinyikü wina kekinyijjen kesü samvuthi sale.

⁸Isala Apvüwa na hi kizala hi aghi ji ntsa sa nu anyi kejon pathidha. Hi anyi kejon pathi kesa ghena ma hi yala ma ghena kekinyijjen kesü nsa thsü ladha.

⁹Isala ma hiwi kekhishi kesü sadha. Ma khi, ‘No atsa kesü muyaben nu ma kecca wina kekhang senben, kepaghenanye hi ma ghinyithu tsüdi wina kecca pi ma cüden. Ma nyan pi Solomon [12] ciden, kepaghenanye ma kadisa keben jüwi hi kecca nu keyazi pi Israel cüden.

¹⁰Ma ighena kekinyijjen kesü tsü sa ben. Ma itsa sa nu hi ma ba sa ben. Ma kadishi na anuphanla Israel miwi kekhang sen ben.’ ”

¹¹David na khineng, “Itsa, tsalina Apvüwa n-Nyiza na no ssiketenwa salo, nu ma jühkhishi kechi tsü no sapi ma ghena kekinyijjen kesü tsü kesa wi haicen keyawa salo.

¹²Nu Apvüwa n-Nyiza na kechü nu kemetsa pi no cü nu no Israel miwi kekhang kesen wi ma Yenwa kenie wina sa keyawa salo.

¹³ Keujüla no Apvüwa na Israel ghena ayen pi Mosa kecüthu tsüdi nieya lethu, no haicen yaben. Lebenzü nu kempvüza saya, nu mangla ya no patemessi nsa thsüla.

¹⁴Kekinyijjenwa ghena, hi agüccü ntsa nu kekinyijjenwa tsü kesa qo senle kesalina suna metric ton 3,400, nu rükatssü metric ton 34,000 saghu pi thengdha. Tsümiwi lezza nu amighe whu nkeyakhi saghu theng. Hi achan nu alonthu la saghu theng isala no tsü miwi la meyathu yishü.

¹⁵No kekuli nyi kejonla ben. Alon kechhüpen wi anyithu ben, ciwi alon kahathu, achan kecühthu, nu alentagha kepachünyi kejon na

¹⁶suna, rükatssü, lezza, nu amighe sen nu saya kemehaiben. Khili kekuli sashhu yilo, nu Apvüwa na no ssiketenwa salo.”

¹⁷David na Israel ccülikesathu tsüdila Solomon kiqalo kesa ahza khuchia.

¹⁸Ma khi, “Apvüwa nthu Nyiza na nthu ssiden, nu apen tsüdi wi kecca pi nthu cüdha. Ma hi yala anyi ayyi hewi hang ketenthu tsüdi miwi khangya thsü, nu mathu na khili nthu nu Apvüwa kekhu wi bendha.

¹⁹Tsalina khili nthu leben nu nthu kahang tsüdi pi Apvüwa nthu Nyiza kekuli salo. Kekinyijjenwa tsü sashhu yilo, isanu nthu na Apvüwa Cenkethenjüh Khitsonwa nu ma kekinyi wi kesen tsanqai kemethathu tsüdi pi tsü non wi chiale kesalina.”