Read Northern Rengma Naga 1 KHENICÜKI 23 Bible Online

1 KHENICÜKI 23 - Northern Rengma Naga bible

1 KHENICÜKI 23

¹Khathansha wi David na qhai ntsa sa khe, ma ma tsa Solomon pi Israel Kadimiwa sa thsüa.

²Kadimi David na Israel nyi ccülikesathu, keqhaikedithu, nu Levi nyithu tsüdila saghu ya.

³Ma Levi nyi kahang mapi changha nu tsü miwi keqhaiki npvüza tsüdi nyanzhüghuya. Tsüdi saghu la anyi hazar changha nu tazen.

⁴Kadimiwa na anyi hazar ngwe nu mejü pi Kekinyijjenwa ghena kekuli sa thsü, hazar tugho pi kezhüthu noncca nu kicennalithu südhe thsü,

⁵hazar mejü pi aghihie, hazar mejü pi Apvüwa keseng wi kesen ghena kadimiwa na khukechi akhwikesa tsanqaithu tsü sen thsüa.

⁶David na Levi nyithu mathu gei kenie wina gishü pi akhang kecheng sa: Gershon, Kohath, nu Merari.

⁷Gershon na atsa keni— Ladan nu Shimei ben.

⁸Ladan na atsa kecheng— Jehiel, Zetham, nu Joel ben,

⁹mathu na Ladan shicübvügha geithu wi aliwathu. Shimei na atsa kecheng— Shelomoth, Haziel, nu Haran [13] ben).

¹⁰Shimei na atsa mejü— Jahath, Zina, Jeush, nu Beriya, ghanyi keqhai sa nieben, Jeush nu Beriya manyi na ashicübvüghathu kejon nmi, tsalina mathu sipi agei kesütan sa.

¹²Kor hath na atsa mejü— Amram, Izhar, Hebron, nu Uzziel ben.

¹³ Ma tsa tssütsewa Amram na Aaron nu Mosa manyi ba. (Aaron nu ma shicübvüghathu tsü khuthipi makepa sapi anuphanla kemetha tsanqaithu noncca, Apvüwa kekinyi wi hankedemvu mecang, ma kekuli sa, nu ma nyan wina sawegü pi anyithu cü thsü.

¹⁴Isala Anyiza nyiwa Mosa tsathu tsüpi Levi nyithu wi sichi.)

¹⁵Mosa na atsa keni— Gershon nu Eliezer ben.

¹⁶Gershon tsathu jawi aliwa na Shebuel.

¹⁷Eliezer na atsa kesütan— Rehabiya ben, isala Rehabiya na ashicübvüghathu kejon ben.

¹⁸Kohath tsa keniwa, Izhar na atsa kesü agei wi aliwa Shelomith ben.

¹⁹Kohath tsa kechengwa Hebron na atsa mejü— Jeria, Amariya, Jehaziel, nu Jekameam ben.

²⁰Kohath tsa mejüwa Uzziel na atsa keni— Mika nu Isshiya ben.

²¹Merari na atsa keni— Mahli nu Mushi ben. Mahli la atsa keni— Eleazar nu Kish ben,

²²isala Eleazar na angathu ketan khe atsa nmila shüa. Ma ngathu na Kish tsathu, mathu baghathu wi n-nuwa.

²³Merari tsa keniwa Mushi na atsa kecheng— Mahli, Eder, Jeremoth ben.

²⁴Hathu hana Levi shicübvüghathu, mathu tsüdi agei nu atheghi kenie wina mathu nyan zhüya. Ma shicübvüghathu amapi ngwe nu tsümiwi keqhaiki tsüdila Apvüwa Kekinyijjen wi kekuli wi ma shei na ben.

²⁵David na khi, “Apvüwa Israel Nyizawa na kecca pi ma nyithu cüdha, nu ma anuphanla Jerusalem wi hang benden.

²⁶ Tsalina Levi nyithu ghena Apvüwa ketenpen Nithsüjjenwa tsü nu kekinyi wi kesen tsanqaithu tsüdi tsü npvüthu keyishü mangla nmidha.”

²⁷David kecükegwe sakhenwa tsü kenie wina Levi nyithu tsüdila mathu kahang mapi ngwe cen lethu, kekuli kesa ghena mathu nyan zhüya,

²⁸ nu kekuli hathu pi mathu dhenchi theng: Kekinyijjen wi kekinyi wi Aaron shicübvügha keqhaikedithu kiqa, ajjen kevü nu keshondhithu satemetha, nu kemetha tsanqai tsüdila n-nakhi thsüle kesa;

²⁹mathu khhi na amesa pi Anyiza kekinyi, kekinyithu wi kesen awheng, azimi nchila amesa kegü ghapasi, amesa kegü pi kekinyithu, nu awheng pi oliv deli kesaghu; Kekinyijjen wi pi kekinyithu tsü whu nu kede;

³⁰nu aghanen nu minulen kaghapenla Apvüwa nyankethang nu keseng,

³¹nu Apvüwa kekinyithu pi Sabbath, Asha ketheü Kho, nu akho kepathu wi kemecang wi. Levi nyithu na matsü kesü wi anyi khaju na kekuli ha nsathu yishü khe ayenthu zhü theng. Levi nyithu na matsü tsüdi wi Apvüwa kekinyi kekuli ha salo pi dhenchi theng.

³²Apvüwa ketenpen Nithsüjjen nu Kekinyijjen kenoncca, nu Kekinyijjen wi kekinyi wi mathu shilithu, Aaron shicübvügha keqhaikedithu kekiqa khhi tsüpi mathu cü theng.