Read Northern Rengma Naga 1 KHENICÜKI 28 Bible Online

1 KHENICÜKI 28 - Northern Rengma Naga bible

1 KHENICÜKI 28

¹Kadimi David na Israel kedithu tsüdila Jerusalem wi saghu lo ahza khuchi. Tsalina mizzathu wi kedithu, kadiyyi wi kekulithu wi kedithu, ageithu wi accülikesathu, kadimi nu ma tsathu ji asahang nu keben-keyeng kenonccathu — kadijjen nu kedithu, süpahi kemechanthu, nu anyi kemechanthu tsüdila ghola Jerusalem wi saghu ya.

²David na mathu tuwi ngan nu mathu wi khi, “Hi diyyi nyithu, ijüh kinachilo. Hi anuphan ghena Cenkethenjüh Khitsonwa tsüpi ketheng-jjen kesü Apvüwa ithu Nyiza ccü kenen penwa tsü samvu sa. Hi ma kekinyikü wina kekinyijjen kesü sale kiden-kesha yadha,

³isala ma hi ya tsü nsa thsüle khen, kepaghenanye hi süpahi kesü nu hi anyi jjü ji mtsü keji thsüdha.

⁴Apvüwa, Israel Nyizawa na hi nu ishicübvüghathu pi anuphan ghena Israel miwi kekhang sen thsüle kessiyadha. Ma Judah mizza pi accüli sa thsüle kessiya, nu Judah mizza wi iba theghi kessiyadha. Atheghi tsüwa wi ma kenen wina hi khuya nu pi Israel tsüdi miwi kadimiwa sa thsü.

⁵Ma atsathu kejon pi hi cü, nu ma mathu tsüdi jawi Solomon kessi pi Israel, Apvüwa kadiyyiwa miwi kekhang sen thsüaden.

⁶“Apvüwa na hi wi khi, ‘Ntsa Solomon na hi Kekinyijjen sa ketenwa tsüle. Hi ma kessi pi itsa sayadha, nu hi ma ba sa den.

⁷Ma khili sakeben ti keshüthangla kiden-kesha nu iyenthu nu iyenkhukechithu tsü kina lethu, hi ma kadiyyi tsü sapi anuphanla ben thsüaden.’

⁸“Tsalina khili inyithu, Apvüwa nyithu, ithu Nyiza nu Israel nyithu tsüdi kemehu ha tuwi na hi nthu kizaben, kiden-kesha nu Apvüwa ithu Nyiza na ithu wi kekiza tsüdi kinaya, isanu nthu na ayyi kemehai hawi benya nu nthu na tsüpi anuphan ghena abvüye ketheüthu kwen wi chiya le kesalina.”

⁹Nu ma Solomon wi khi, “Itsa, no nba Nyizawa tsü chüya, nu nleben tsüdi nu samvuthi kesa kahang pi ma kekuli salo kesa hi no kizaben. Ma ithu kemeshen nu kenmvu tsüdi chüben. Keujüla no ma wi wa lethu, ma no ssiyaben; isala keujüla no ma wina bvü lethu, ma anuphanla no teshiaben.

¹⁰Apvüwa na no ya ma Kekinyijjen kemethawa tsü sa thsüle kesalina no kessiyadha kesa chüyalo. Khili nleben zükeqhe nu tsü sashhu yilo.”

¹¹David na Kekinyijjenwa tsü kesa ghena kekiden tsüdi pi Solomon cüa, tsüna keben ketheng- jjenthu nu keshondhi kepathu tsüdi ghena, nu kesamithu teshicü keten Kemetha ntsawa Pen ghena.

¹²Ma accühha nu tsü kevü keshondhithu, nu Kekinyijjen tsanqai nu Apvüwa wi ajuthu satemetha kechithu pi ketheng-jjenthu tsüdi ghena ma leben wi kiden keben tsüpi Solomon cüa.

¹³David na ma khati keqhaikedithu nu Levi nyithu kiden-kesha pi Kekinyijjen wi mathu kekuli sa thsü, nu Kekinyijjen wi ahyikhu tsüdila noncca thsüle ben khe kekiden tsüpi ma cüa.

¹⁴Ma rükatssü nu suna khaju sen nu ahyikhuthu,

¹⁵ahula nu ahula ketonpenthu kesüsü,

¹⁶amesa pi Anyiza kecü pi ma miwi kechipen rükatssü nu suna miz kesüsü,

¹⁷suna kemetha pi akhakhwe ketsuthu, akhuzzathu, nu alakhüthu, rükatssü nu suna khaju pi akhuthu saden,

¹⁸nu suna kemetha pi hankedemvu pi ma miwi mecang keten kekinyipen nu gorugariwa cherubim na Apvüwa Cenkethenjüh Khitsonwa miwi ben nu mathu gisha zanshigü keben tsü tsüdi kesa ghena ma kecükegwethu khuchia.

¹⁹Kadimi David na khi, “Hathu ha tsüdila Apvüwa na hi salo pi kecü zhü ketheng kecükegwethu witsü ben.”

²⁰Kadimi David na ma tsa Solomon wi khi, “Kempvüza sa nu leben zükeqhe sayalo. Kekuliwa tsü sashhu yilo, nu mangla no nkhen thsüla. Apvüwa Anyiza hi ma kekuli sa ketenwa na no ssiden. Ma no teshi nben, isala no ma Kekinyijjen wi kekuli npi kesacen chu ma no gweghe benben.

²¹Kekinyijjen wi kekulithu kesa ghena pi keqhaikedithu nu Levi nyithu dhenchi cüdha. Kekuli lentagha wi sapichüthu na no kiqa mvuthi saben, nu anyithu nu ccülikesathu tsüdila no kekhu wi benben.”