Read Northern Rengma Naga 1 KHENICÜKI 29 Bible Online

1 KHENICÜKI 29 - Northern Rengma Naga bible

1 KHENICÜKI 29

¹ Kadimi David na kemehu maben tuwi khichi: “Itsa Solomon ha Anyiza na ma kessiyadha, isala ma ghanyi nu mangla npi sanan. Kekuli kesau hana tisie ntsa ben, kepaghenanye ha anyi ghena kadijjen kesü nye isala Apvüwa Anyiza ghena Kekinyijjen kesü.

²Hi apiketsü sa nu Kekinyijjen ghena atsanqaithu kiden-keshadha— suna, rükatssü, lezza, amighe, kahachan, alon menkedhu, nu jems, tsikesa ghena alonthu, nu marble kejonla.

³Hi hathu tsüdi khukechi miwi Anyiza Kekinyijjenwa tsü nen kesa ghena hi ketanla iji rükatssü nu suna la khuchidha.

⁴Hi Kekinyijjen keshon tsikesa ghena suna kemehai ntsa metric ton meza kesü miwi nu rükatssü kemetha metric ton meza keni kecheng khuchi,

⁵nu kepachünyithu ya sa thsüle kesalina atsanqaithu tsüdi. Khili anyi thothu na mohhola khuchi pi Apvüwa chü mvu ben nu?”

⁶Tsaseng wi ageithu wi alikesathu, mizzathu wi kedithu, süpahizi benchüthu, nu kadimi keben-keyeng kenonccathu na mathu kenen wina

⁷Kekinyijjen wi kekuli kesa ghena hathu khuchi: suna metric ton 170 miwi, rükatssü metric ton 340 miwi, lezza metric ton 620 kecen, nu amighe metric ton 3,400 miwi.

⁸Anyi alon menkedhu kebenthu na tsüthu pi kekinyijjen keben wi chi, nu Gershon gei wi Levi nyi Jehiel na tsü noncca.

⁹Anyithu na nenthi khuchi pi Apvüwa cü, nu ji ntsa khuchi kesalina mathu anonghe ntsa sa.

¹⁰Ciwi kemehu maben tuwi na Kadimi David na Apvüwa seng. Ma khi, “Apvüwa, ithu baqhai Jakob Nyiza, anuphan nu anuphanla no kesengwa salo!

¹¹ O Apvüwa, kedi, kekhang, anyankethang, khangkeya, nu ajenkeben tsüdila nji. Atssan nu ayyi manyi jüwi pala tsüdila nji, nu no kadimiwa, tsüdi miwi kekhang kesenwa.

¹²Keben-keyeng nu kekinyikü tsüdila no wina ghoden: nu no tsüdi miwi kekhang senden. Nkwen wi kesü le kesü lela pi kedi nu kezü saya kemehai kekhang na ben.

¹³Tsalina khili, ithu Nyiza, ithu na no nkesengcha sa nu n-nyankethangwa tsü seng ben.

¹⁴“Isala hi nu inyithu na mangla pi no cükeya nmi, kepaghenanye pala tsüdila no wina ghoden, nu ithu na nji tsüpi no cü neng keben ketanle.

¹⁵O Apvüwa, ithu na ithu bamyithu ti ayyi hawi kijünyi gha keben ti kesa nu kijünyithu le. Ithu tsathang na ayyi hawi akekhwen kesü ti, nu ithu na khiela keshü tsü ghü keya nmi.

¹⁶O Apvüwa, ithu Nyiza, ithu na keben-keyeng ha tsüdi pi Kekinyijjen kesü sapi n-nyan kemetha kinyiküle sen ghoben, isala ha tsüdila nji nu no wina keghole!

¹⁷No anyi tsüdi lebenpinan nu ketsatanwa nenten kesa hi chüben. Hi lebenchi nu atsentsa wi inonkeghe sala ha tsüdi pi no cüben, nu hi khili n-nyi hewi saghu kebenthu na mathu nonghe ntsa nu sengho no cü keben muyadha.

¹⁸Apvüwa, ithu bamyi Abraham, Isak, nu Jakob Nyiza, lebenkechi hati ha anuphanla n-nyithu leben wi ben thsü nu mathu ya keshüthangla no wi jühtsentsa sa thsülo.

¹⁹Itsa Solomon ya ma leben ntsa sa n-yenkhukechi tsüdi kina mvu kesa nu hi Kekinyijjen ghena kiden-kesha ketheng hathu pi tsü saya thsülo.”

²⁰Tsaseng wi David na anyithu wi khi, “Apvüwa nthu Nyiza senglo!” Nu kemehu mabenla Apvüwa mathu bamyithu Nyiza tsü seng, nu mathu kukedu Apvüwa nu kadimiwa la kinyikü.

²¹Tsü dhitsüwa wi mathu na asahangthu pathi pi ahhanshathu sa, tsüthu satemetha pi Apvüwa cü, nu tsüthu pi anyithu ya dsa thsüa. Tsümiwi mathu na amesü süpon hazar kesü, aneni süpon hazar kesü, nu khaghaneni zza hazar kesü pi ahhansha sa nu maben pi kekinyipen miwi mecang. Mathu na kisengtssü pi kekinyi la sa.

²²Tsalina tsü ghanan mathu na Apvüwa tuwi dsa nu jjü, nu anonghe ntsa sa. Keni tughuwa la mathu na Solomon pi kadimiwa le thangchia. Apvüwa nyan wina mathu adeli pi ma nyen pi mathu kekhang kesenwa nu Zadok pi keqhaikediwa sa thsüa.

²³ Tsalina Solomon na ma ba David shiwa sa kadimi sa nu Apvüwa kadipen wi donkiya. Ma haicenkeya kadimi kesü sa, nu Israel mizzatenti mabenla ma jühkina.

²⁴Kedithu nu süpahithu tsüdi, nu David tsa kepathu lela tsüdi Kadimi Solomon jühkeya wi benle khishi chia.

²⁵Apvüwa na mizzatenti maben sapi Solomon messikü, nu ma sapi Israel kadimi kepathu miwi anyanthang kayiya thsüa.

²⁶Jesse tsa David na amapi jügha Israel tsüdi

²⁷ miwi kekhang sen. Ma amapi tagü Hebron wi kekhang sen nu amapi changha nu kecheng Jerusalem wi kekhang sen.

²⁸Ma kahang wi keben, nyu ma kinyikü, nu keqhai nyi kesü sa nu shü, nu ma tsa Solomon na ma shiwa sa kadimi saya.

²⁹Kadimi David cükikezhü aghatsan na wa asakhen kecu tsüna atusenjüh-kechüthu Samuel, Nathan, nu Gad cükikezhüthu wi zhü theng.

³⁰Zhü kethengthu wi ma khati kekhang sen, khang ntsawa sa, pala ma miwi nu Israel miwi nu ma kevü kadiyyithu miwi kuli khe tsüdi muyaben.