Read Northern Rengma Naga 1 KHENICÜKI 5 Bible Online

1 KHENICÜKI 5 - Northern Rengma Naga bible

1 KHENICÜKI 5

¹ Hathu hana Jakob tsa tssütsewa Reuben shicübvüghathu. (Kepaghenanye ma ma ba wubvü meshibvüwa ssimehai kesalina ma atsa tssütsewa shei tsü nmula nu tsüpi Josef cüa.

² Isala tsüna Judah mizza na amizza tsüdi jawi kezü ntsawa sa nu kekhang kesenwa sa shagha.)

³Jakob tsa tssütsewa Reuben na atsa mejü ben: Hanok, Pallu, Hezron, nu Karmi.

⁴ Hathu hana abvüye bvüye wi Joel shicübvüghathu: Shemaiya, Gog, Shimei, Mika, Reaiya, Baal, nu Beera. Assiriya nyi kadimi Tiglath Pileser na amizza jawi aliwa ghanya nu ma pi kushinyi sa thsüa.

⁷Reuben mizza wi atheghi cüki zhü ketheng wi hathu hana agei wi accülikesathu: Jeiel, Zekhariya,

⁸nu Joel gei wi Shema tsawa Azaz tsa Bela. Agei hawa na Aroer nu ayyi ciwi na aghawa wala Nebo nu Baal Meon kecu wi hang.

⁹Mathu na Gilead yyiwi amesüsi kejon ben, tsalina mathu ayyi nishuwa yyikeshü na Eufrat Ghaku kewalen kecu shicha kebenwa witsü benya.

¹⁰Kadimi Saul tsüwi Reuben mizza na wala Hagri nyithu ssisa nu aghi wi mathu pathia, nu mathu yyi Gilead na nishuwa tsü nkaya.

¹¹Gad mizza na Reuben na aghawa Bashan yyiwi wala nishuwa Saleka kecu wi hang.

¹²Joel na agei kemechan ntsawa tsü bha kechiwa nu Shafam na agei tsüshiwa tsü bhachi. Janai nu Shafat manyi na Bashan wi agei kepathu bha kechi keni.

¹³Amizza tsüwa wi anyi kepathu na agei tagü hathu nyi: Mikhael, Meshullam, Sheba, Jorai, Jakan, Zia, nu Eber.

¹⁴Mathu na Huri tsa Abihail shicübvüghathu, ma bamyithu na hathu: Abihail, Huri, Jaroah, Gilead, Mikhael, Jeshishai, Jado, Buz,

¹⁵Guni tsawa Abdiel tsa Ahi na agei hathu wi aliwa.

¹⁶Mathu na Bashan nu Gilead yyiwi anyutithu wi nu Sharon yyi amou tsüdi wi hang.

¹⁷(Zhüketheng hathu na Judah kadimi Jotham nu Israel kadimi Jeroboam tsüwi sa keya.)

¹⁸Reuben, Gad, nu Nishuwa Manasseh mizzathu wi süpahithu 44,760 na atsonhi pvü, njünnu sen, nu alamughothu pieya kemehai tsü sansikemehai sapi theng.

¹⁹Mathu na wala Hagri nyi Jetur, Nafish, nu Noda mizza nyithu ssinu aghisa.

²⁰Mathu na mathu kenondi pi Anyiza miwi chi nu mathu kiqa cülo kesa kekhie sa, nu Anyiza na mathu kekhie kina cü nu mathu sapi Hagri nyi nu mathu pfüwathu miwi khangya thsüa.

²¹Mathu na mathu ghinyithu wi sunsiesathu 50,000, khaghanenithu 250,000, gadathu 2,000, nu aghitssüzüthu 100,000, ghanya.

²²Mathu na aghinyithu kejon pathia, kepaghenanye aghikesa hawa na Anyiza kemeshen sa. Isanu mathu na kushinyi [4] npi sakewa chu ayyi ciwi hangwa.

²³Nishuwa Manasseh nyithu na Bashan yyi aghawa wala Baal Hermon, Senir, nu Hermon Yikha kecu wi hang, nu mathu na anyi jikayi ntsa sa.

²⁴Hathu hana mathu gei wi alikesathu: Efer, Ishi, Eliel, Azriel, Jeremiya, Hodaviya, nu Jadiel. Mathu na süpahi kemechanthu, nu mathu gei wi nyu mathu kechü alikesa kemehaithu ketan.

²⁵Isala anyithu na mathu bamyithu Nyiza tuwi jühtsentsa nsala ma teshi nu Anyiza na ayyi ciwi jügüshi kesa mizzatenti cenpvüthu tsü kinyi wa.

²⁶ Tsalina Anyiza na Assiriya kadimi Pul (Tiglath Pileser lela khiden) kechü-kunong pi mathu diyyiwa tsü nkaya thsüa. Ma Reuben, Gad, nu Nishuwa Manasseh mizzathu pi kushinyithu sa wa thsüa, nu mathu pi anuphanla Hala, Habor, nu Hara, nu Gizan Ghaku kete wi ben wa thsüa.