Read Northern Rengma Naga 2 KHENICÜKI 1 Bible Online

2 KHENICÜKI 1 - Northern Rengma Naga bible

2 KHENICÜKI 1

¹Kadimi David tsawa Solomon na Israel kadiyyiwa tsü zükeqhe senya nu Apvüwa ma Nyiza na sawegü pi ma cü nu ma sapi khang ntsa saya thsüa.

²Kadimi Solomon na ahza pi anyi hazar nu meza miwi kedithu, kidhan wi kedithu, atheghithu wi alikesathu, nu anyi kepathu tsüdila cü,

³nu mathu na ma gweghe Gibeon wi kekinyi pen wi walo khi. Mathu na ciwi wa kepaghenanye Apvüwa maghawa Mosa na aghansha wi Apvüwa ketenpen Nithsüjjen kesa tsüna ciwi ben.

⁴ (Isala Apvüwa Cenkethenjüh Khitsonwa tsü Kadimi David na ma Kiriath Jearim wina Akhitson tsü sengho Jerusalem wi nithsüjjen kesü sa ketheng witsü chi theng.)

⁵ Hur tsa Uri tsawa Bezalel na lezza pi kesa kekinyipenwa tsü la Gibeon wi Apvüwa ketenpen Nithsüjjen tuwi ben. Kadimi Solomon nu anyithu tsüdila ciwi Apvüwa kinyi.

⁶Nithsüjjen tuwi kadimiwa na lezza pi kesa kekinyijjen pen sa ketheng miwi ahhansha sapi Apvüwa kinyi; ma asahang hazar kesü pathi nu maben pi tsü miwi mecang.

⁷Tsü ghaja Anyiza na Solomon tuwi ghonu ma keü, “No hi mangwa pi no cü thsü mvu ben nu?”

⁸Solomon na luneng, “No keshüthangla nanketizen keti pi iba David ccüca, nu no khili hi ya ma shiwa sa kadimi sa thsüdha.”

⁹“O Apvüwa, no iba wi njüh khishi kechi tsü sacen cülo. No hi pi anyi ji ntsa nu si nkeyakhi miwi kadimi sa thsüdha,

¹⁰tsalina hi mathu miwi kekhang senle kesa kemetsa nu palakechü pi hi cülo. Nyelethu, hi khatinu n-nyi keji hathu miwi kekhang senya nu?”

¹¹Anyiza na Solomon wi khineng, “No kemeshonwa kessiyadha. No keben-keyeng, keben, nyankemechan, nyelela nghinyithu keshü, nyelela no ghena kesie kahang kekhiewa nyela hi no pi mathu miwi kadimi sa thsü ketheng inyithu miwi kekhang senle kesa ghena no kemetsa nu palakechü khiedha.

¹²Hi kemetsa nu palakechü pi no cüden. Tsü miwi hi kheni nyelela haseng wi lela kadimi kesüla ben nkegho nu benya nkeben keben-keyeng, keben, nyankemechan jikayi pi no cüaden.”

¹³Tsalina Solomon na Gibeon wi kekinyipen wi Apvüwa ketenpen Nithsüjjenwa tsü teshi nu Jerusalem wi wha neng. Ciwi ma Israel miwi kekhang sen.

¹⁴Ma gorugari meza taghamejü nu goru kessithu hazar taghakeni saghuya. Ma tsüthu pahan pi Jerusalem wi theng, nu kepathu pi anyunuti kepapa kesa wi ben thsüa.

¹⁵Ma kekhang kesen tsü wi Jerusalem wi rükatssü nu suna na ghameme sapi alon ti sa, nu Judah yyishiphon thu ccü wi sedar chan na ji ntsa sapi achan jümu amba chan ti sa.

¹⁶Kadimi nyi asen kesathu na Musri nu Silisia wi goruthu kepvügho tsü noncca,

¹⁷Mathu na Ejipt wi gorugari nu goruthu shü pvügho kheneng tsüthu pi Hitti nu Siriya nyi kadimithu wi gorugari kesü na rükatssü meza tugho nu goru kesü na rükatssü meza nu deni jeü chicü.