Read Northern Rengma Naga 2 KHENICÜKI 10 Bible Online

2 KHENICÜKI 10 - Northern Rengma Naga bible

2 KHENICÜKI 10

¹Rehoboam na aghawa mizzathu tsüdi Shekhem wi saghu nu ma pi kadimi sa thsüle keben ciwi wa.

²Khathansha wi Kadimi Solomon tubvü sen nu Ejipt wi wa kesawa Nebat tsa Jeroboam na jühtheü ha zaya khe ma kheneng ajjen wi gho.

³Aghawa mizza nyithu na nyu kesun pi ma cichi, nu mathu tsüdi gweghe wa Rehoboam wi khi,

⁴“Nba na akhhi kekiyan pi ithu miwi chile. Keujüla no akhhi hathu ha sapi mbhi thsüa nu ithu ccakayi yathsü lethu, ithu na njüh keyanyithu sa den.”

⁵Rehoboam na luneng, “Ghanan kecheng pi hi cü nu hi ya ha jjügi meshen nan thsülo. Tsaseng wi kheneng gholo.” Tsalina anyithu na bvüa.

⁶Kadimi Rehoboam na anyi keqhaithu ma ba Solomon kesansi nyi sa keghothu wi kecenkinali. Ma keü, “Nthu na hi khatile anyi hathu ha lunenglo khiten nu?”

⁷Mathu na luneng, “Keujüla no anyi hathu tuwi ccatssü nu keluneng kemehai pi mathu kenen sacü lethu, mathu na keshüthangla jühkeya wi ben nu no kekuli sa ben.”

⁸Isala ma anyi keqhaithu kesansijüh tsü teshi theng nu ma shüsha wi wa tsüthu pi ma kesansithu sa wa.

⁹Ma mathu wi keü, “Nthu na hi khati salo khiten nu? Hi anyithu na mathu khhi sapi mbhi cülo hi wi khie kebenthu wi ha mangwa le khi nu?”

¹⁰Mathu na luneng, “No hawa ha pi mathu nkizathu yishü, ‘Ikwen zanzza kizzawa hana iba geshi miwi shakile!

¹¹Iba na akhhi kekiyan pi nthu miwi chi; hi tsü sapi kiyanki thsüaden. Iba na kekihhele pi nthu kihhe; hi ajüssi ghanu ti kesa pi nthu kihhe cüden,’ tsüti mathu kizalo.”

¹²Ghanan kecheng sengwi Jeroboam nu anyithu tsüdila Kadimi Rehoboam na mathu kecükegwe kechi ti kheneng gho.

¹³Kadimiwa na keqhaithu kesansijüh tsü teshi theng nu ajüh khang ntsa khipi anyithu kiza,

¹⁴anyi kepvünyithu na khipi ma kekiza ti sa. Ma khi, “Iba na akhhi kekiyan pi nthu miwi chi; hi tsü sapi kiyanki thsüaden. Iba na kekihhele pi nthu kihhe; hi ajüssi ghanu ti kesa pi nthu kihhe cü tenle!”

¹⁵Hawa ha Apvüwa kemeshen, ma Shilo wina kegho atusenjüh-kechüwa Ahijah wina Nebat tsa Jeroboam cüki khi ketheng tsü sacenle kesalina. Tsalina kadimiwa na anyithu jüh nkina la.

¹⁶Khathansha wi anyithu na kadimiwa na mathu jüh nkinala kesa muya khe mathu na jisha, “David nu ma theghi teshilo! Mathu na ithu ghena mangwa sa cü theng nu? Israel nyithu, ithu na papa jjen wi wha na! Rehoboam ya ma ketanla ma ghangya thsülo!” Tsalina Israel nyithu na matang shagha,

¹⁷Rehoboam teshi pi Judah yyi wi hang kebenthu nyithu miwi ketan kadimi sa thsüa.

¹⁸Tsaseng wi Kadimi Rehoboam na kekuli kesathu miwi kediwa Adoniram kesun pi Israel nyithu wi chi, isala mathu na alon pi ma kecenthia. Hati kesa wi Rehoboam na kaghajila ma gorugari wi dunya nu Jerusalem wi bvüa.

¹⁹Tsü nten na Israel kadiyyi aghawa nyithu na David kadishi tsü matang nu shun wa.