Read Northern Rengma Naga 2 KHENICÜKI 11 Bible Online

2 KHENICÜKI 11 - Northern Rengma Naga bible

2 KHENICÜKI 11

¹Khathansha wi Kadimi Rehoboam na gho Jerusalem cuya khe ma Judah nu Benjamin mizzathu wi süpahi kemehai ntsathu 180,000 cighuya. Ma aghi wi wa nu aghawa Israel mizzathu miwi tsü kekhang sen neng yale sa.

²Isala Apvüwa na atusenjüh-kechüwa Shemaiya wi kiza nu

³ketsijüh hapi Kadimi Rehoboam nu Judah nu Benjamin mizza nyithu tsüdi cü thsü:

⁴“Nthu cünyu Israel nyithu tsü nssikaghashen la. Nthu tsüdila ajjen whalo. Mangwa khati sadha khe tsüna hi kemeshenle.” Mathu na Apvüwa jühkhukechi tsü kina nu wala Jeroboam nssisa la.

⁵Rehoboam na Jerusalem wi ben nu Judah nu Benjamin nyunuti hathu ha khwetivüya:

⁶Bethlehem, Etam, Tekoa,

⁷Bethzur, Soko, Adullam,

⁸Gath, Maresha, Zif,

⁹Adoraim, Lakhish, Azekah,

¹⁰Zorah, Aiojalon, nu Hebron,

¹¹Ma hathu khwetivü pi zü ntsa nu benchüwa pi tsüthu kesüsü hie thsüa, nu ma apen tsüdi wi kedsakejjü, oliv deli, nu kisengtssü,

¹²atsonhi nu apiethu la pi chi. Hatinu ma Judah nu Benjamin pi ma kekhang kekhu wi chia.

¹³Israel yyi tsüdi wi keqhaikedithu nu Levi nyithu na acülawa Judah wi gho.

¹⁴Levi nyithu na mathu amou nu ayyi kepathu teshi nu Judah nu Jerusalem wi gho, kepaghenanye Israel Kadimi Jeroboam nu ma tsathu na mathu yala Apvüwa keqhaikedithu kekuli nsa thsüla.

¹⁵ Jeroboam na ma ketanla ma keqhaikedithu kessiya nu pi Anyiza nkechüthu kekinyi pen wi atsaghangthu nu ma amesü zza süpon tsi ti kesa tsikezhüthu tsü kekuli sa thsüa.

¹⁶Israel mizzathu tsüdi wi anyi mathu leben tsentsa sa nu Israel Nyiza Apvüwa kinyi mvu ketenthu na Levi nyithu nie sen nu Jerusalem wi wa, isanu mathu ahhanshathu sapi Apvüwa mathu bamyithu Nyiza kinyiyale kesalina.

¹⁷Ha ghena Judah kadiyyiwa tsü satezüya, nu mathu na amapi kecheng Solomon tsa Rehoboam kiqa nu mathu na kheni wi Kadimi David nu Kadimi Solomon kekhu wi kahang ti hang.

¹⁸Rehoboam na Mahalath yaya, ma ba na David tsa Jerimoth, nu ma jja na Jesse ngawa nga Eliab nga Abihail.

¹⁹Manyi na atsa kecheng ben; Jeush, Shemariya, nu Zaham.

²⁰Tsaseng wi ma Absalom nga Maaka yaya, nu manyi na atsa mejü ben; Abijah, Attai, Ziza, nu Shelomith.

²¹Tsüdi wi Rehoboam na awubvü tagha nu tazen nu meshibvüthu achentugho na ben, nu ma atsa ngwe nu tazen nu anga achentugho ba sa. Ma wubvüthu nu meshibvüthu tsüdi jawi ma Maaka wa nen ntsa.

²²Nu ma tsangathu jawi Maaka tsa Abijahwa ma nen kesalina ma pi ma shiwa sa kadimi sa thsüle kessiya.

²³Rehoboam na metsashhu kekuli khhithu pi ma tsathu then chhia nu mathu pi Judah nu Benjamin yyi tsüdi wi anyunutithu khwetivü kethengthu wi ben thsü shan. Ma meshumena ntsa pi mathu cü nu mathu ghena awubvüthu la kejon yapi cü.