Read Northern Rengma Naga 2 KHENICÜKI 12 Bible Online

2 KHENICÜKI 12 - Northern Rengma Naga bible

2 KHENICÜKI 12

¹Rehoboam na ma kadiyyi wi kadimiwa saya meyi, ma nu ma nyithu tsüdila Apvüwa Yenwa tsü teshia.

²Rehoboam na kadikesa manga mapi wi Apvüwa jüh meyala kesa ghena kemeten muya. Ejipt Kadimi Shishak na gho Jerusalem ssikaghashen,

³ma süpahizi gorugari meza taghakeni, goru kessithu hazar achentugho, nu Libia, Sukki, nu Sudan nyithu wi süpahithu sikhi nkeya pi saghu ssisen gho.

⁴Ma Judah nyunutithu khwetivü kethengthu tsü yaya nu atujügü sen Jerusalem kecu wi wa.

⁵Atusenjüh-kechüwa Shemaiya na Kadimi Rehoboam nu Judah nyi ccülikesathu na Shishak tubvüa le Jerusalem wi saghu keben ciwi wa. Ma mathu wi khi, “Hawa ha Apvüwa ketsijüh pi nthu kecü: ‘Nthu na hi teshidha, tsalina hi nthu teshi pi Shishak cüdha.’ ”

⁶Kadimiwa nu ccülikesathu na mathu samidhale sa, nu mathu khi, “Apvüwa na sa keben ha meshonle.”

⁷Khathansha wi Apvüwa na ha mu khe ma kheneng Shemaiya ccüneng nu ma wi khi, “Mathu na mathu kesami chüya kesa ghena hi mathu meyasadha. Isala khathansha wi Shishak na ssikaghashen gho khe mathu pahan na hangyaben. Jerusalem na ileben keminu mabenla pvü nben,

⁸isala Shishak na mathu miwi khangya, nu mathu na hi kekuli kesa nu ayyi kekhang kesenthu kekuli kesa na khatila kepapa khe chüyaben.”

⁹ Kadimi Shishak na Jerusalem wi gho no Kekinyijjen wi nu kadijjen wi keben-keyeng tsü khuya. Ma ciwi keben tsüdila pi Kadimi Solomon na suna tsonhi kesathu tsü saghu khuya.

¹⁰Pi tsüthu mithon sale kesalina Rehoboam na lezza tsonhithu saya nu pi kadijjen jenka kehie wi kedithu dhenchi cüa.

¹¹Kadimi na Kekinyijjen wi kewa kaghapeng aghikehiethu na atsonhithu tsü pvü nu tsüthu pi aghikehie jjenkeshondhi wi chi nengden.

¹²Ma ketanla ma pi Apvüwa kwen wi chi kesalina Apvüwa leben keminu na ma yasatha sa nsa, nu Judah wi mehaitsü sawaya.

¹³Rehoboam na Jerusalem wi kekhang sen, nu ma kadimi kekhang na ji kayiya. Ma kahang mapi jügha nu kesü wi kadimi saya, nu ma Jerusalem wi amapi tagha nu tagü kekhang sen, anyunutiwa tsüna Apvüwa na Irael yyi tsüdi jawi na kessi pi ma kekinyi benwa sa keya. Rehoboam jja na Ammon yyi wina kegho Naamah.

¹⁴Rehoboam na mangwa nmehai khe tsü sa, kepaghenanye ma Apvüwa kemeshenwa tsü chüyale nsa.

¹⁵Rehoboam kekuli aghatsan na wa asakhen kecu nu ma theghi cüki zhükethengthu na atusenjüh- kechüwa Shemaiya nu Iddo manyi cükikezhü wi muyaben. Rehoboam nu Jeroboam manyi na keshüthangla aghisa.

¹⁶Rehoboam na shü nu pi David Nyunutiwa wi kadi shüjjenthu wi vhüa nu ma tsa Abijah na mashiwa sa kadimi saya.