Read Northern Rengma Naga 2 KHENICÜKI 13 Bible Online

2 KHENICÜKI 13 - Northern Rengma Naga bible

2 KHENICÜKI 13

¹Israel Kadimi Jeroboam na kadikesa mapi tagha nu tazen wi Abijah na Judah kadimi saya,

²nu ma amapi kecheng Jerusalem wi kekhang sen. Ma jja na Gibea nyunutiwa wina kegho Uriel nga Mikaiya. Abijah nu Jeroboam manyi jüwi aghisa shhugho.

³Abijah na ma süpahizi 400,000 piekiya, nu Jeroboam na ma süpahizi 800,000 ssinu ma ssisa.

⁴Süpahizithu na yyishiphon diyyiwa Efraim wi kemetuli. Kadimi Abijah na Zemaraim Yikha miwi ki nu magha pi Jeroboam nu Israel nyithu ci nu khi, “Ijüh kina chilo.

⁵Apvüwa Israel Nyiza na David ssinu pakhhi nkeya cenkethenjüh kesü sa nu anuphanla Israel miwi kadishi pi ma nu ma shicübvüghathu cü ketheng tsü nthu na nchü kwe?

⁶Nebat tsa Jeroboam na ma kadimiwa Solomon matang.

⁷Tsaseng wi ma anyi ketesüthu akhang kesü saghuya, nu mathu na wala Solomon tsa Rehoboam, tsü tsüwi ghanyi mtsü nu mangla npi kulikinan nu mathu kaghanineng nkeyawa tsü meten.

⁸Khili nthu na Apvüwa na pi David nu ma shicübvüghathu kecü kekhang kesenwa tsü ssisale saben. Nthu na süpahizi ji ntsa nu Jeroboam na pi nthu cenpvüthu sa kethsü suna pi amesü süponthu kesa tsü ben.

⁹Nthu na Apvüwa keqhaikedithu, Aaron shicübvüghathu, nu Levi nyithu jügüshia. Mathu mithon wi nthu na mizatenti kepathu na sa keten ti anyi kepa pi keqhaikedithu sa thsü theng. Anyi kesüle kesü lela amesü süpon kesü nyelela khaghaneni tagü sengho ma satemetha chithu nthu cenpvüthu keqhaikediwa sayaden.

¹⁰Isala ithu na Apvüwa ithu Nyiza kekuli sa nu ma npi teshile. Aaron shicübvügha keqhaikedithu na mathu kekuli sathu Levi nyithu na mathu kiqaden.

¹¹Aghanen nu minulen kaghapenla mathu na hankedemvu nu asahangthu pi ahhansha sa nu maben mecang pi Apvüwa kinyi. Mathu na keccüna wi kemetha mesa tsüpi miz miwi chipi ma kinyi, nu minulen kaghapenla suna pi kesa ahula ketonpen miwi ahulathu tsü cangkiden. Ithu na Apvüwa yenkhukechi tsü saden, isala nthu tsü ma teshidha.

¹²Anyiza na ma ketanla ithu kessiwa nu ma keqhaikedithu na hewi tutuwa sen nu khou chile ithu cipi aghi wi nthu ssisa thsüle kidenben. Israel nyithu, Apvüwa nthu bamyithu Nyizawa tsü ssikaghashenle nsa lalo! Nthu na khangya nbenle!”

¹³Tsü tsüwi Jeroboam na ma süpahithu pahan kesun pi asengwa na Judah süpahizi ghiceng wa thsüa, nu pahan na atuwa na mathu ghangtan ben.

¹⁴Judah nyithu na ghangkevüli chi nan nyu na mathu vüya benla. Mathu na maghala Apvüwa wi kekiqa khie nu keqhaikedithu na tutuwa khou.

¹⁵Judah nyithu na misikhhali magha, nu Abijah na mathu ssisen kaghashen; Anyiza na Jeroboam nu Israel nyi süpahizi chaya.

¹⁶Israel nyithu na Judah nyithu wina bvüa, nu Anyiza na Judah nyithu ya mathu miwi khangya thsüa.

¹⁷Abijah nu ma süpahizi na Israel nyithu pacha nu khangya — Israel süpahithu kemehai ntsa hazar meza manga pathia.

¹⁸Tsalina Judah nyithu na Israel miwi khangya, kepaghenanye mathu na Apvüwa mathu bamyithu Nyiza miwi ben kesalina.

¹⁹Abijah na Jeroboam süpahizi jügü wa nu ma anyunutithu pahan nkaya: Bethel, Jeshana, nu Efron, nu anyunuti hathu kete wi anyuthu.

²⁰Jeroboam na Abijah kadikesa tsüwi khiela ma kekhang mu neng meyala. Asakhen wi Apvüwa na ma kihhe cü nu ma shüa.

²¹Isala Abijah na khang pfü shagha. Ma awubvü taghamejü ben nu ma atsa ngwe nu keni nu anga tagha nu tugho ba sa.

²²Abijah cüki kepa wi ma mangwa khi nu mangwa sa khe tsüna atusenjüh-kechüwa Iddo cükikezhü wi zhütheng.