Read Northern Rengma Naga 2 KHENICÜKI 14 Bible Online

2 KHENICÜKI 14 - Northern Rengma Naga bible

2 KHENICÜKI 14

¹Kadimi Abijah na shü nu pi David Nyunutiwa wi kadi shüjjenthu wi vhüa. Ma tsa Asa na ma shiwa sa kadimi saya, nu Asa cakhu wi ayyiwa na amapi tagha cca nonkwenya.

²Asa na mangwa meshon nu mehai khe tsü sa nu Apvüwa ma Nyiza kenen sa.

³Ma asang kekinyipenthu nu Anyiza nkechü kekinyipenthu khupia, kemetha lonkeshengthu whengsha, nu acenpvü nzawa Asherah tsiketonthu tsü pakhia.

⁴Ma Judah nyithu na Apvüwa mathu bamyithu Nyiza kenenwa tsü sa, nu ma yenkhukechi nu kesansijühthu tsü nieyalo kesa ahza khuchi.

⁵Ma Anyiza nkechüthu kekinyipenthu nu Judah nyunuti tsüdi wi hankedemvu mecang pi kekinyipenthu yasakhi kesalina ma kekhang kesen cakhu wi kadiyyiwa wi kecca na benya.

⁶Ma hatsü wi Judah nyunutithu tsü khwetivüya, nu Apvüwa na kecca pi ma cü kesa ghena ciwi amapi kecheng mejü aghikesa nmi.

⁷Ma Judah nyithu wi kiza, “Ithu aducü kemisi nu wikeshonthu sapi anyunutithu khwetivü, nu ajjenkhen sapi kaghapeng-jenkathu khenya na. Ithu na ayyiwa miwi kekhang senyadha kepaghenanye ithu na Apvüwa ithu Nyiza kenenwa tsü sadha. Ma ithu khweya nu apen tsüdi wila keyazi pi ithu cüdha.” Tsalina mathu na tsüti sa nu mehai kayi sa.

⁸Kadimi Asa na Judah wi anyi süpahizi 300,000 atsonhi pvü nu apiethu sen, nu Benjamin wi anyi 280,000 atsonhi pvü nu alamugho kepiethu na ben. Mathu tsüdila kempvüza, nu sansi kemehai sa kethengthu.

⁹Sudan nyi kesü ma nyan Zera na süpahizi nkila kesü nu gorugarithu meza kecheng ssinu Maresha kecu wi Judah nka ghoa.

¹⁰Asa na shhula ma ssisa wa, nu azi keni qho Maresha kete Zefatha Yyiketijü wi mathu pen kiden ya.

¹¹Asa na Apvüwa ma Nyiza wi kekhie sa, “O Apvüwa, no lekete nu süpahizi nkekhang kesü kiqa pi kekhang ntsa sa cüya mehai. O Apvüwa ithu Nyiza, khili ithu kiqa cülo, kepaghenanye ithu na no nondi nu n-nyan wina süpahizi keti ha shunla ssisale shhughodha. Apvüwa, no ithu Nyiza; anyi kesüla no chaya nben.”

¹²Khathansha wi Asa nu Judah nyithu na Sudan nyi süpahizi ssisa wa khe Apvüwa na mathu chaya. Mathu na bvü zighe,

¹³nu Asa nu ma süpahithu na Gerar kecu wi mathu jügü wa chia. Sudan nyithu ji ntsa pathi kesalina süpahizi na ngan nu kaghashen meyala. Apvüwa nu ma süpahizi na mathu miwi khangya, nu süpahiziwa na atsanqai kejon shuya.

¹⁴Tsaseng wi mathu na Gerar kevü wi anyunutithu yasa ya, kepaghenanye ciwi anyithu na Apvüwa ghena qhethiketen sa. süpahiziwa na anyunuti tsüthu tsüdi yasa nu atsanqaithu kejon shuya.

¹⁵Mathu na wa anenikehiethu kemnanpen la yasa nu khaghaneni nu sunsiesathu kejon ghanya. Isanu mathu na Jerusalem wi wha neng.