Read Northern Rengma Naga 2 KHENICÜKI 15 Bible Online

2 KHENICÜKI 15 - Northern Rengma Naga bible

2 KHENICÜKI 15

¹Anyiza ghamu na Obed tsa Azariya miwi gho,

²nu ma wa Kadimi Asa metu. Ma magha nu khi, “Kadimi Asa, nu Judah nyi nu Benjamin nyithu tsüdi ijühkina chilo! Nthu na Apvüwa wi keben chu ma nthu ssiden. Keujüla nthu na ma bha lethu, ma nthu ya ma muya thsüden, isala keujüla nthu na khapeghe bvü lethu ma nthu teshiaben.

³Matsü kesiela Israel na Anyiza tsentsawa tsü nsenla, keqhaikedithu na mathu nsansi, nu ayenwa nsenla hang wadha.

⁴Isala khathansha wi agükeccü na gho khe mathu na Apvüwa, Israel Nyiza wi kheneng gho. Mathu na ma bha wa nu ma muya.

⁵Tsü tsüwi anyi kesüla yazishu nu hha wa meya, kepaghenanye ayyi tsüdi wi agükeccü nu kekivvü na pong.

⁶Mizzatenti kesü na mizzatenti kepawa pasha, nu anyunuti kesü na anyunuti kepawa pasha, kepaghenanye Anyiza na agükeccü nu ketizenkesa sengho mathu miwi chia.

⁷Isala nthu tsü accükwen nshüla zükeqhe benyalo. Nthu kekuli kutimen sapi nthu cüben na.”

⁸Asa na Oded tsa Azariya tusenjüh-kekhi tsü zakeya wi ma kempvüza saya. Ma Judah nu Benjamin yyi tsüdi wi atsikezhüthu khupia nu ma nkakeya Efraim yyishiphon diyyiwa wi atsikezhüthu tsüdila khupia. Ma Apvüwa Kekinyijjen ccühha wi kekinyipenwa tsüla sapfüya.

⁹Efraim, Manasseh, nu Simeon mizza wina anyi kejon Asa wiwa gho nu ma kadiyyi wi hang, kepaghenanye Apvüwa na ma ssiten kesa mathu na muya. Asa na mathu tsüdi nu Judah nu Benjamin nyithu cichi.

¹⁰Mathu na Asa na kadimi sakeya mapi taghamangawa asha kechengwa wi Jerusalem wi saghuya.

¹¹Tsü ghanan mathu na nyu ji shu sen kegho wi amesüsi meza tagü nu khaghaneni hazar tagü pi ahhansha sapi Apvüwa kinyi.

¹²Mathu na cenkethenjüh kesü sa, ciwi mathu na mathu leben nu kahang tsüdi sen nu Apvüwa mathu bamyithu Nyizawa tsü kinyi tenle cenya.

¹³Anyi kesüle kesü lela, keqhai keghanyi, nza le npvüza sa lela thowa na ma nkinyi khe pi shü thsüaden.

¹⁴Mathu na ahhai misikhhali magha nu Apvüwa nyan wina cenkethenjühwa tsü nieten kesa kekishen kesü sa, isanu mathu na magha nu tutuwathu khou.

¹⁵Judah nyithu tsüdila anonkeghe sa kepaghenanye mathu leben tsentsa sa nu cenkethenjühwa ha saya. Mathu na Apvüwa kekinyi wi mathu nen, nu ma mathu yaya nu mathu kevü tsüdi wila kecca pi mathu cü.

¹⁶Kadimi Asa na kadijja pen wina ma jjaqhai Maaka khupia, kepaghenanye ma acenpvü nzawa Asherah tsikezhü nankiqanan kesü zhü. Asa na atsikezhüwa tsü whengshi nu tsü ketsenthi pia nu ma qan tsüpi Kidron Yyiketijü wi mecang.

¹⁷Asa na ayyiwa wi Anyiza nkechü kekinyipenthu tsüdi meyasala lela ma kahang chu Apvüwa wi jühtsentsa sa.

¹⁸Ma ma ba Abijah na satemetha pi Anyiza wi chi kesathu nu ma khupi satemethachi kesa suna nu rükatssü tsanqaithu tsüdi pi Kekinyijjen wi chia.

¹⁹Ma kadikesa amapi changha nu mangawa npi kecu chu ciwi aghikesa nmila.