Read Northern Rengma Naga 2 KHENICÜKI 16 Bible Online

2 KHENICÜKI 16 - Northern Rengma Naga bible

2 KHENICÜKI 16

¹Kadimi Asa na Judah wi kadikesen mapi changha nu tughowa wi Israel Kadimi Baasha na Judah nkagho nu Judah wi kedu-keshhu tsüdila khenle kesalina Rama tsü khwetivü shagha.

²Tsalina Asa na Kekinyijjen nu kadijjen keben-keyeng wi suna nu rükatssü khupi Damaska wi Siriya nyi Kadimi Benhadad wi ketsijüh ha gweghe kesunchi:

³“Ithu bathu na kesa ti ithu apfüwa sa na. Suna nu rükatssü ha hi aju sapi no kecüle. Khili Israel Kadimi Baasha nshinyi apfüwa sa keben tsü pakhhilo, isanu ma iyyi wi ma süpahithu zanshiya thsülo.”

⁴Benhadad na Asa kekhi tsü anlo sa, nu ma süpahizi nu ma kedithu kesun pi Israel nyunutithu ssikaghashen thsüa. Mathu na Ijon, Dan, Abel Beth Maaka, nu Naftali nyunutithu wi kedsa-kejjü pi saghu kethengthu tsüdi nkaya.

⁵Kadimi Baasha na mangwa khati sadha khe zakeya wi ma Rama tsü nkhwetivüla nu kekuli tsü teshia.

⁶Tsaseng wi Kadimi Asa na Judah yyi tsüdi wi anyithu saghuya nu mathu ya Baasha na Rama wi kesen alon nu kahachanthu tsü pvü wa Geba nu Mizpah nyunutithu khwetikevü wi tsü sen.

⁷Tsü tsüwi atusenjüh-kechüwa Hanani na Kadimi Asa wi wa khi, “No Apvüwa n-Nyiza miwi nyela no kenondi pi Siriya Kadimiwa miwi kechi ghena Israel kadimi süpahizi na ntubvü yadha.

⁸Sudan nyi nu Libia nyithu süpahizithu na ji ntsawa nu gorugarithu nu goru kessi nyithu kejon gweghe nten kwe? Isala no Apvüwa kenondi ghena ma mathu miwi khangkeya pi no cü.

⁹Apvüwa na ayyi maben wi ghangki benden, nu anyi thowa na ma wi leben tsentsa saten khe ma kezü pi tsüthu cüle saden. No kejüphon kekuli sadha, tsalina khili nten na no aghisa ben tendha.”

¹⁰Hawa ha ghena Asa na atusenjüh-kechüwa miwi aghepvü ntsa sa nu amighe ssüle pi ma bhen. Ha tsü ha wi Asa na anyi pahan tuwi daggü ntsa sa shagha.

¹¹Asa na kadikesa kekulithu aghatsan na wa asakhen kecu tsüdila Judah nu Israel Kadimithu cükikezhü wi zhütheng.

¹²Asa na kadimi sakeya mapi changha nu tuguwa wi accü wi kekhuma ghei nkemehai ghena ma ccü shü; isala ma Apvüwa wi nyela dawa kechüthu wi kekiqa bha wa.

¹³Amapi keni sengwi ma shü

¹⁴nu ma pi David Nyunutiwa wi ma ketanla alon wi ma shüjjen ho ketheng wi tsü vhüa. Mathu na ma kamang pi kevhü ghena hankedemvu nu deli hankedemvu kidenya, nu mathu na ma keshü ghena anonkegü wi annibhon di ntsa sa.