Read Northern Rengma Naga 2 KHENICÜKI 17 Bible Online

2 KHENICÜKI 17 - Northern Rengma Naga bible

2 KHENICÜKI 17

¹Jehoshafat na ma ba Asa shiwa sa kadimi saya nu Israel keshun ghena ma pen satezüya.

²Ma ma süpahithu pi Judah nyunutithu khwetivü ketheng, Judah nyi yyiwi nu Asa na Efraim yyiwi anyunuti nka keyathu wi tsü ben thsüa.

³Apvüwa na sawegü pi Jehoshafat cü, kepaghenanye ma ma ba hang tegü wi tsütsonca tsü nie nu Baal nkinyi.

⁴Ma ma ba Nyiza kekuli sa, Anyiza yenkhukechithu nie, nu ma Israel kadimithu kekuli ti nsa.

⁵Apvüwa na Jehoshafat ya zükeqhe Judah kadiyyi miwi benya thsü, nu anyi tsüdila aju sengho ma cü, isanu ma ben ntsa nu nyu ma kinyikü ntsawa saya.

⁶Ma Apvüwa kekuli kesa wi kapvüshüsha sa nu Anyiza nkechüthu kekinyipen nu Judah wi acenpvü nzawa Asherah tsikezhüthu tsüdi yasa.

⁷Ma kadikesa kecheng mapi wi ma kedi hathu kesunshi pi Judah nyunutithu wi nyu sansi wa thsü: Benhaili, Obadiya, Zekhariya, Nethanel, nu Mikaiya.

⁸Levi nyithu meshu tugu nu keqhaikedi meshu keni na mathu gweghe wa. Levi nyithu na Shemaiya, Nethaniya, Zebadiya, Asahel, Shemiramoth, Jehonathan, Adonijah, Tobijah, nu Tobanijah; nu keqhaikedi na Elishama nu Jehoram manyi.

⁹Mathu na Apvüwa lesüshen tsü khuya nu Judah nyuti tsüdi wi wa tsüpi anyithu sansi.

¹⁰Apvüwa na ayyi tsü kevü wi kadiyyi tsüdi sapi wala Kadimi Jehoshafat ssinu aghisa messi thsüa.

¹¹Filistinthu pahan na rükatssü nu aju kepa wi kejon sen nu Jehoshafat wi gho, nu Arab nyi pahan na khaghaneni 7,700, nu anenithu 7,700 sen nu ma wi gho.

¹²Tsalina Jehoshafat na khang pfüpfü sa wa. Ma Judah yyi tsüdi wi khwetivü nu anyunutithu sa,

¹³nu ciwi kedsa-kejjüthu kejon pi tsanqai. Ma kedi kemechanthu pi Jerusalem wi ben thsü,

¹⁴tsüna mathu gei kenie wina sa. Judah gei wi Adna na süpahithu benchüwa sa, nu ma kekhu wi süpahi 300,000 na ben.

¹⁵Kedi keniwa na Jehohanan, süpahithu 280,000 na ma gweghe den,

¹⁶nu kedi kechengwa na Zikhri tsa Amasiya, nu süpahi 200,000 na ma gweghe den. (Amasiya na ma ketanla Apvüwa kekuli sa).

¹⁷Benjamin gei wina süpahithu benchüwa na süpahi kemechan kesü Eliada, ma anyi atsonhi pvü nu alamughothu pie keten 200,000 miwi benchüwa sa.

¹⁸Ma benchü keniwa na Jehozabad, ma anyi aghighe mehaitsü kiden pvü ketenthu 180,000 ssiden.

¹⁹Anyi hathu na Jerusalem wi kadimi kekuli sa, nu ma tsü miwi la süpahi kepathu pi Judah nyunutithu khwetivü ketheng kepa wi ben thsüa.