Read Northern Rengma Naga 2 KHENICÜKI 18 Bible Online

2 KHENICÜKI 18 - Northern Rengma Naga bible

2 KHENICÜKI 18

¹Khathansha wi Judah Kadimi Jehoshafat na keban sa nu anyi kemechan saya khe ma theghi nu Israel Kadimi Ahab theghi jüwi keyali kesa kesü sa.

²Amapi kejon sengwi Jehoshafat na Samaria nyunuti wi Ahab hhainan wa. Jehoshafat nu ma gweghe ketenthu kinyikü wina Ahab na khaghaneni nu amesüsi kejon pathi pi kemishu kesü sa. Ma Jehoshafat jupi ma gweghe Gilead wi Ramoth nyunutiwa tsü ssisale sa.

³Ma keü, “No hi gweghe wa Ramoth ssikaghashen ma?” Jehoshafat na luneng, “Hi nu isüpahizi na no khathansha wi wale khi khe kidenben. Ithu na no gweghe waben”

⁴Tsaseng wi ma khi, “Isala ithu atuwa sala Apvüwa keü nan na.”

⁵Tsalina Ahab na atusenjüh- kechüthu meza mejüu ci chi nu ma mathu wi keü, “Hi wala Ramoth ssisala nye nu?” Mathu na luneng, “Wala ssisalo, Apvüwa na khangkeya pi no cüben.”

⁶Isala Jehoshafat na keü, “Ciwila ithu na atusenjüh-kechü kepa wina Apvüwa ccünengya kemehai nmi kwe?”

⁷Ahab na luneng, “Ciwila kesü Imla tsa Mikaiya benle. Isala hi ma nanmeghüten kepaghenanye ma khiela ighena kemehai atusenjüh-khi nten; tsüna keshüthangla nkemehai ketan.” Jehoshafat na luneng, “No tsüti kekhiu nyele!”

⁸Tsalina Kadimi Ahab na kedi kesü ci chi nu shishi wala Mikaiya ssigholo kiza.

⁹Kadimi keni na manyi kadithsümeni pvüya nu Samaria kaghapeng-jenka na ameiwa aniegi wi manyi kadipen miwi donki nu atusenjüh-kechüthu tsüdila manyi tuwi atusenjüh-khiben.

¹⁰Mathu meshu kesü Khenaanah tsa Zedekiya na amighe ghacüthu saya nu Ahab wi khi, “Apvüwa na hati khiben, ‘No hathu ha sen nu Siriya nyithu ssisaten nu mathu pashatha sa ben.’ ”

¹¹Atusenjüh-kechüthu kepa tsüdila tsü makesü khia. Mathu na khi, “Wala Ramoth ssikaghashenlo, no khangya ben na. Apvüwa na khangkeya pi no cüben.”

¹²Tsü tsüwi kedi kesü Mikaiya ssighole kewawa na ma wi khi, “Atusenjüh-kechü kepathu tsüdila kadimiwa ghena haicenkeya tusenjüh-khidha, no la makesü khi kesawa mehaiben.”

¹³Isala Mikaiya na khi, “Hangkebenwa Apvüwa nyan wina iNyiza na hi mangwa khilo kiza khe hi tsü khiben.”

¹⁴Ma Kadimi Ahab tuwi kegho wi kadimiwa na ma keü, “Mikaiya, Kadimi Jehoshafat ishinyi wala Ramoth ssisala nye nu?” Mikaiya na luneng, “Wala ssisalo no khangya ben, Apvüwa na khangkeya pi no cüben.”

¹⁵Isala Ahab na luneng, “No Apvüwa nyan wina hi wi kekhi wi atsentsawa khilo! Hi khaju tughu tsüti no kiza nu?”

¹⁶Mikaiya na luneng, “Hi Israel süpahizi na yyishiphon thu miwi khaghanenithu na mathu kehiewa nmila bvü zighe keben ti muben. Nu Apvüwa na khi, ‘Anyi hathu na mathu ccülikesawa nmi; mathu ya cca ajjen wi wha thsülo.’”

¹⁷Ahab na Jehoshafat wi khi, “Hi no wi ma khiela ighena kemehai atusenjüh-khi ntenle no kizadha; tsüna keshüthangla nkemehai ketanle!”

¹⁸Mikaiya na khiwa, “Khili Apvüwa na mangwale khiben khe kina yalo! Hi Apvüwa na tangwi ma kadipen wi tangnyilothu tsüdi ma vüla donki keben mu.

¹⁹Apvüwa na keü, ‘Thowa na Ahab mechu pi wa thsü nu ma ya Ramoth wi pathi thsüa nu?’ tsüti npi kekhi chu. Tangnyilothu pahan na kesü khi, nu kepathu na kepawa khi,

²⁰tsaseng wi aghamu kesü na gho Apvüwa tuwi ngan nu ‘Hi wa ma mechu tenle’. Apvüwa na keü, ‘No khati sa ben?’

²¹Aghamuwa na khi, ‘Hi wala Ahab tusenjüh-kechüthu tsüdila ya milikemesa khi thsüben.’ Apvüwa na khi, ‘Wala ma mechulo. No haicenya ben na.’ ”

²²Nu Mikaiya na khi, “Hati sadha, Apvüwa na ntusenjüh — kechüthu hathu na no wi milimesa thsüa. Isala ma nghena tsü kedediwa tsü metu benle khidha le!”

²³Tsaseng wi atusenjüh-kechüwa Zedekiya na Mikaiya wi shula ma mmi ceng cü nu keü, “Kusi Apvüwa ghamu na hi teshi nu no wi kiza nu?”

²⁴Mikaiya na luneng, “No ajjen keshondhi nonwa wi kuthi kedu ghanan wi tsü muya ben.”

²⁵Tsaseng wi Kadimi Ahab na ma kekhu wi kedi kesü wi khi, “Mikaiya ghanya nu ma ssi wa Amon nyunutiwa wi ahng nu Kaditsa Joash manyi cülo.

²⁶Manyi wi ma pi atssüzüjjen wi chi nu hi kemehai sa npi keghoneng chu amesa nu atssü kivü ketan pi ma cülo kizalo.”

²⁷Mikaiya na khi, “Keujüla no kemehai sa ghoneng lethu, Apvüwa na hi wina nkhile!”

²⁸Tsaseng wi Israel Kadimi Ahab nu Judah Kadimi Jehoshafat manyi na Gilead Ramoth nyunutiwa tsü ssisa wa.

²⁹Ahab na Jehoshafat wi khi, “Ishinyi aghi wi wa lethu, hi itsisa kemili pvüya na no no kadithsümeni pvülo.” Tsalina Israel kadimiwa na ma tsisa kemili pvü nu aghi wi wa.

³⁰Siriya kadimiwa na Israel kadimiwa ketan khe kepa wi nssikaghashen lalo kesa ahza pi ma gorugari benchüthu cü theng.

³¹Tsalina mathu na Kadimi Jehoshafat mukeya wi mathu tsüdi kemeshen na ma Israel Kadimi le nu mathu na ma ssikaghashen wa. Isala Jehoshafat na magha chi, nu Apvüwa Anyiza na ma kekashaya nu ma wina ma ssikaghashen kebenwa jügü neng pia.

³²Gorugari benchüthu na ma Israel kadimiwa nye le kesa chüya, tsalina mathu ma jügü nwala.

³³Isala Siriya nyi süpahi kesü na alakusü pi ga chi nu tsüna Kadimi Ahab ghighe jüwi na du ma ghonya. Ma ma gorugari keculawa wi magha nu khi, “Hi mesa-menadha le! Khapegheya nu aghi wina hi zanshi yalo!”

³⁴Aghisa ntsa sa keben wi Kadimi Ahab na Siriya nyithu wiwa ghangla ma gorugari miwi maghaki wa. Aghani duketen pang wi ma shü.