Read Northern Rengma Naga 2 KHENICÜKI 19 Bible Online

2 KHENICÜKI 19 - Northern Rengma Naga bible

2 KHENICÜKI 19

¹Judah Kadimi Jehoshafat na kemehai sa sen ma kadijjen Jerusalem wi ghoneng.

²Hanani tsa Jehu atusenjüh-kechü kesü na wa kadimiwa metu nu ma wi khi, “No kemeshen gheshighenathu kiqa nu Apvüwa nanmeghü ketenthu wiwa kesa tsü meshon le ben kwe? No mangwa sa khe tsüna Apvüwa leben keminu sengho nmiwi chidha.

³Isalela ciwi no wi kemehai pahan ben. No acenpvü nzawa Asherah tsikezhü anyithu na kinyi keten tsüdila khupia, nu no Anyiza kemeshenwa tsü sale sa.”

⁴Kadimi Jehoshafat na Jerusalem wi hang lela ma keshüthangla acülawa Beersheba wina wa aghawa Efraim yyishiphon diyyiwa katen kecu anyithu jawi kijünyi wawa sa, tsüna ma anyithu ci neng pi Apvüwa mathu bamyithu Nyiza wiwa chiyale kesalina.

⁵Ma pendhethu pi Judah nyunutithu khwetivü ketheng kesüsü wi ben thsü

⁶nu mathu kecükegwe cü: “Nthu na ajühkependhe wi kiden-kesha yalo; nthu na anyi kekhang wi nyela Apvüwa kekhang wina sa ben, nu nthu na ajühkependhe witsü ma nthu ssiden.

⁷Apvüwa kinyikü nu kiden-keshala kulilo, kepaghenanye Apvüwa ithu Nyiza na kemeshonwa kemilikesa nyelela nankepapa kesa nyelela alaa khukeya tsü ghangpvü benya nten.”

⁸Jehoshafat na Levi nyithu, keqhaikedithu, nu atheghithu wi accülikesathu pahan pi Jerusalem wi pendhethu sa thsü nu Apvüwa Yenwa kepakhhi ghena nyelela anyi anyunutiwa wi kahangthu jüwi ayenwa kicennali ghena ajühkaghaten thsüa.

⁹Ma kecükegwe hathu pi mathu cü; “Nthu na Apvüwa kinyikü wina kekuli sa, nthu kekuli tsüdi wi tsentsa sa ma jühkina nu nsathu yishü.

¹⁰Khathansha wi nthu nyi anyunuti kahe wi lela kahangthu na nyu kepathi nyelela ayen kepa wi katsüha nyelela ayenkhukechi kepakhhi ghena kaghatenjüh sen nu nthu tuwi gho khe, mathu na sami pi Apvüwa nshun thsüle kesalina nthu na mathu khati nsathu yishü khe mehaitsü mathu kecükegwe chilo. Nthu na tsüdi nsa lethu, nthu nu nthu nyithu na Apvüwa leben keminu tsü pvüya ben. Isalela keujüla nthu duluwa tsü sa lethu, nthu na sazzi nben.

¹¹Keqhaikedi ntsawa Amariya na keccüna ghena kaghatenjüh tsüdi wi ma wina cen ben, nu Ishmael tsa Zebadiya, Judah wi ahng, na anyi ghutiwa wi kaghatenjüh tsüdi wi ma wina cen ben. Levi nyithu dulu na ajühkaghatenpen wi südhekeyathu tsü sala nye khe ghanben. Kempvüza sala kecükegwe hathu salo, nu Apvüwa ya kemeshon kesawa wiwa salo!”