Read Northern Rengma Naga 2 KHENICÜKI 2 Bible Online

2 KHENICÜKI 2 - Northern Rengma Naga bible

2 KHENICÜKI 2

¹Kadimi Solomon na Apvüwa kinyile kesa ghena Kekinyijjen kesü, nu ma ghena kadijjen kesü la sale südheya.

²Ma anyi 80,000 pi alon hah, nu anyi 70,000 pi atsanqaithu tsü pvü thsü. Ciwi anyi 3,600 pi kekulithu tsü ghang thsü.

³Solomon na ketsijüh kesü kesun pi Tur wi Kadimi Hiram wi chi: “No sedar chan kedhithu pi iba David Kadimiwa wi jeü cü nu ma kadipen sakeya thsü tsüti hi la ssinu asen salo.

⁴Hi Apvüwa iNyiza kinyikü wina Kekinyijjen kesü sa ben. Tsüwa tsüna inyithu nu hi hankedemvu mecang pi ma kinyi, ithu na keshüthangla kemetha amesa pi ma kinyi nu ithu na aghanen nu aghaja kaghapen nu Sabbath tsathang wi la mecang pi kekinyi, Asha ketheü Kho, nu atsathang kemetha kepathu wi Apvüwa ithu Nyiza kekinyikü ghena apen kemetha kesü sa ben. Israel na anuphanla ha salo kesa ma ajüh khuchi cüdha.

⁵Hi Kekinyijjen keti kesü sale ben, kepaghenanye ithu Nyiza tsüna acenpvü tsüdi miwi dikile.

⁶ Isala anyi kesüla ntsakhiwa Anyiza ghena Kekinyijjen saya nben, kepaghenanye atssan keti ha maben lela ma ben qo nben. Isalethu, hi mecang pi Anyiza kekinyi benwa tsü nyelethu khatinu Kekinyijjen kesü sapi ma ben thsüya mehai nu?

⁷Tsalina khili anyi kesü kejenkichü, suna, rükatssü, lezza, nu amighe sen nu kekuli, nu athsümeni atsena, nmiepheü, nu kenmie kede wi sapichü kesun chilo. Ma iba David na Judah nu Jerusalem wi kepachüthu kessi kethengthu gweghe kuliden.

⁸Hi n-nyithu na sapichü ntsale kesa chüben, tsalina Lebanon wi sedar, sipress, nu juniper chan kedhithu kesun pi hi wi chilo. Hi inyithu kesun pi n-nyithu kiqa thsüle ben,

⁹nu kaha chan kejon kidenya thsü, kepaghenanye hi Kekinyijjen sale kebenwa hana tisie nu mehai ntsawa sale ben.

¹⁰N-nyithu kedsakejjü ghena hi awhengsu metric ton hazar keni, achentha metric ton keni, kisengtssü liter hazar meza mejü, nu oliv deli liter hazar meza mejü pi no wi kesun chicüden.”

¹¹Kadimi Hiram na lesü kesü zhüpi Solomon wi kiza neng. Ma hati zhü, “Apvüwa na ma nyithu nanketizen ghena no pi mathu kadimiwa sa thsüdha.

¹²Apvüwa, Israel Nyiza sengle, ma atssan nu ayyi Sahangkechiwa! Ma atsa kemetsa kesü chüshikeya nu sapichü na pong kebenwa pi Kadimi David cüdha, nu ma khili Apvüwa ghena Kekinyijjen kesü nu ma ketanla ma ghena kadijjen kesü sale kidenben.

¹³Hi kepachü nyi kesü ma nyan Huram na metsa nu sapichü ntsa nyu kesansiwa kesun pi no wi chiben.

¹⁴Ma jja na Dan mizza nyi kesü nu ma ba na Tur wi ahvu kesü. Ma khatinu suna, rükatssü, lezza, amighe, alon, nu achan pi atsanqaithu saya ten khe chüben. Ma athsümeni atsena, nmiepheü, kenmie, nu linen la sen nu kuliya mehai. Ma kejenki katsüha lela ma wi kekiza tsü nie nu matsi saya mehai. Ma yala n-nyi kepachüthu nu nba Kadimi David ghena kekulithu gweghe kuli thsülo.

¹⁵Tsalina khili no khishi kesa ti awhengsu, achentha, kisengtssü, nu oliv deli kesun pi ithu wi chilo.

¹⁶Lebanon yikhathu wi ithu na no nsenthu keyishü tsüdila shüchi nu kedhithu tsü bhenghu pi atssükedone miwi na pvü nu Joppa kecu wi dugho thsüaden. No ciwi tsüthu sen nu Jerusalem wi waya mehai.”

¹⁷Kadimi Solomon na ma ba David na kheni nyanzhüghu kesa ti ma la asangthu Israel yyiwi hang kebenthu tsüdi nyanzhüghu. Ciwi asangthu 153600 na hangben.

¹⁸Ma anyi 70,000 pi atsanqaithu pvü, nu 80,000 pi ayikhathu wi alon hah, nu 3,600 pi kekulithu tsü sacen thsüale ghang thsüa.