Read Northern Rengma Naga 2 KHENICÜKI 20 Bible Online

2 KHENICÜKI 20 - Northern Rengma Naga bible

2 KHENICÜKI 20

¹Matsü pahan sengwi Moab nu Ammon süpahizithu na Meun nyithu wwaya nu Judah nkagho.

²Nyilothu pahan na gho Kadimi Jehoshafat wi khi, “Edom wi süpahizi kedi kesü na Keshü Tssükedone khhakawa na no ssisale ghodha. Mathu na Hazazon Tamar nkayadha.” (Hana Engedi nyan kepawa).

³Jehoshafat na qhethiketen nu ma Apvüwa lenketsütson khie. Tsaseng wi ma diyyi tsüdi wi kezi kesü sale ahza khuchia.

⁴Judah nyunuti tsüdi wi anyithu na Apvüwa lenketsütson khie le kaghajila Jerusalem wi ghoya,

⁵mathu nu Jerusalem wi anyithu na Kekinyijjen ccühha ketheüwa wi saghuya. Kadimi Jehoshafat na wa mathu tuwi ngan

⁶ma misikhhali kekhie sa, “O Apvüwa ithu bamyithu Nyiza, no tang wina ayyi wi mizzatenti tsüdi miwi kekhang senden. No khang ntsawa nu zü ntsawa, nu thola no matangya nben.

⁷ No ithu Nyiza. Khathansha wi n-nyi Israel na ayyi hawi dugho khe, no anyi hewi hang kebenthu jügüshia nu ayyi hapi npvüshangwa Abraham shicübvüghathu ya pi anuphanla mathu ji sayalo cüa.

⁸Mathu na hewi hang nu no kinyikü wina Kekinyijjen kesü saya,

⁹nu keujüla kededi katsüha aghikesa adhagha, nyelela azeng na mathu metenmesha gho lethu, mathu na gho no kinyi keten Kekinyijjen ha tuwi nganya mehai kesa chüben. Mathu na agükeccü wina no wi kekhie sa, nu no mathu hhai kina chi nu mathu kekasha yaden.

¹⁰“Khili Ammon, Moab, nu Edom nyithu na ithu ssikaghashen ben. Khathansha wi ithu bamyithu na Ejipt wina shhugho khe no mathu ya ayyi tsüthu wi ndu thsüla, tsalina ithu bamyithu na vüla wa nu mathu meyasala.

¹¹Mathu na hatinu ithu kutimen sa neng ben — mathu na no ayyi pi ithu kecü witsü ithu jügüshia le ghoben.

¹²No ithu Nyiza le! Mathu meten cülo, kepaghenanye süpahizi kedi na ithu ssikaghashen keben ha tuwi ithu kekiqa nmiladha. Ithu na khati saten khe nchüladha, isala ithu na no wi kekiqa tsü ghang benle.”

¹³Judah wi npvüzathu na mathu wubvüthu nu atsangathu ssinu ciwi Kekinyijjen tuwi ngan ben.

¹⁴Apvüwa ghamu na anyitenti jawi Levi nyi kesü miwi gho. Ma nyan na Zekhariya tsawa Jahaziel; ma Asaf gei wi kesü nu Asaf shicübvügha Mattaniya, Jeiel, nu Benaniya wina kegho nyi.

¹⁵ Jahaziel na khi, “Njenkebenwa nu Judah nu Jerusalem nyithu tsüdi, Apvüwa na nthu ya süpahizi kedi ha metu messi nyelela accükwenshü nsa lalo khiben. Agi kesa hawaha na nthu miwi nyela Anyiza miwi ben.

¹⁶Dhitsü wi mathu na Ziz wi keshhugho wi wa mathu ssikaghashenlo. Nthu na yyiketijü kenten wi Jeruel ghansha wi kewalen kete witsü mathu metu yaben.

¹⁷ Nthu na aghi ha sa nben. Wa nthu pen kidenya nu hie benla; Apvüwa na khangkeya pi nthu kecü muya ben. Judah nu Jerusalem nyithu, kesütu nyelela nmessi lalo. Aghi wi walo, Apvüwa na nthu ssiten le!”

¹⁸Tsaseng wi Kadimi Jehoshafat na kukedu ma mmi pi ayyi kidhen, nu anyi tsüdi ma gweghe kukedu nu Apvüwa kinyi.

¹⁹Kohath nu Kora gei wi Levi nyithu na shagha nu misikhhali magha pi Apvüwa Israel Nyiza seng.

²⁰Dhitsüwa wi mitu anyithu na Tekoa ghansha kete wi wa. Mathu na wa keten wi Jehoshafat na ajüh hathu pi mathu kiza: “Judah nu Jerusalem nyithu! Nthu kenondi pi Apvüwa nthu Nyiza miwi chiya isathu nthu na ngan benya benna. Ma tusenjüh-kechüthu na nthu kekiza tsü nondiya, isathu nthu na haicen yaben.”

²¹Anyithu ssinu kecenkinali keya sengwi kadimiwa na akhwi kechüthu pahan ya mathu matsü kemetha wi pvüketen agwomejuwa kaghazuthu tsü pvüya nu “Apvüwa Sengle! Ma kaghali na anuphan benden!” kesa khwisa sen süpahizi tuwi walo ahza khuchia.

²²Mathu na akhwisa keshagha wi Apvüwa na kemessi kesü pi Judah nyi ssisale aghiceng keben süpahizithu jawi cüchi cüa.

²³Ammon nu Moab nyithu na Edom nyi süpahizi ssikaghashen nu tsü yasatha sa, nu tsaseng wi mathu khokho ssikesali ntsa sa.

²⁴Judah nyi süpahizi na wa ayyikeshü wi aducü kemisi kesü cukeya wi mathu na aghinyi wiwa ghangchi nan mathu na tsüdila ayyi wi qancadu shü kebenla muya, anyi kesüla bvü meya.

²⁵Jehoshafat nu ma süpahithu na wa atsanqai shuya, nu mathu na amesüsi, kedsakejjü, athsümeni, nu atsanqai menkedhu kejonla muya. Mathu na ghanan kecheng atsanqaithu shu, isala tsüna sha ntsa sa nu mathu na tsüdila shukhi meyala.

²⁶Mejü ghanan wi mathu na Berakah [2] Yyiketijü wi saghu nu Apvüwa na kuli kechi tsüdi ghena ma seng. Tsalina yyiketijüwa tsüpi “Berakah” le cia.

²⁷Jehoshafat na khangkeya wina ma süpahithu ssisen Jerusalem wi wha neng, kepaghenanye Apvüwa na mathu ghinyithu chayadha.

²⁸Mathu na anyunutiwa cukeya wi harp nu tutuwathu khou sen Kekinyijjen wi wa.

²⁹Apvüwa na khatinu Israel ghinyithu chaya khe tsü zakeya mizzatenti tsüdila qhethiketen sa;

³⁰tsalina Jehoshafat na cca nu kekhang senya, nu Anyiza na apen tsüdi wi keyazi pi ma cüa.

³¹Jehoshafat na ma kahang mapi changha nu manga wi Judah kadimiwa saya nu ma Jerusalem wi amapi ngwe nu manga kekhang sen. Ma jja na Shilhi ngawa Azuba.

³²Kheni ma ba Asa ti ma Apvüwa tuwi kemeshonwa tsü sa;

³³isala Anyiza nkechüthu kekinyipenthu tsü meyasa. Anyithu na khilila mathu leben tsüdi khapeghe sen nu mathu bamyithu Nyiza nkinyi.

³⁴Jehoshafat kadikesa aghatsan na wa asakhen kecu kekuli cüki tsüdi pi Hanani tsa Jehu cükikezhü wi tsü zhütheng, tsüna Israel Kadimithu cükikezhü gishü pahan.

³⁵Matsü kesü wi Judah Kadimi Jehoshafat na gheshighena kekuli kejon kesawa Israel Kadimi Ahaziya ssinu apfüwa sa.

³⁶Manyi na Eziongeber ahunjjen kengan- pen wi atssükedone wi kewaji ahunjjenthu sa.

³⁷Isala Maresha nyuti wina kegho Dodavahu tsa Eliezer na Jehoshafat kitsanchi, “No Ahaziya ssinu apfüwa kesa ghena Apvüwa na no sa ketheng tsü yasa tendha.” Nu ahunjjenthu tsüna yasa nu khila nwala.