Read Northern Rengma Naga 2 KHENICÜKI 21 Bible Online

2 KHENICÜKI 21 - Northern Rengma Naga bible

2 KHENICÜKI 21

¹Jehoshafat na shü nu pi David Nyunutiwa wi kadi shüjjenthu wi vhüa nu ma tsa Jehoram na ma shiwa sa kadimi saya.

²Judah Kadimi Jehoshafat tsa Jehoram na ma cünyu meshu tugho na ben: Azariya, Jehiel, Zekhariya, Azariya, Mikhaei, nu Shefatiya.

³Mathu ba na suna, rükatssü, nu pala menkedhu kejon pi mathu cü, nu mathu kesüsü pi Judah nyunutithu khwetivü ketheng kesüsü wi ben thsüa. Isala Jehoram na keqhaiwa ghena Jehoshafat na ma pi ma mithon kesawa sa thsüa.

⁴Khathansha wi Jehoram na zükeqhe kadiyyiwa senya khe, ma ma cünyuthu tsüdi nu Israel kedithu pahan la pathia.

⁵Jehoram na ma kahang mapi changha nu keni wi kadimi saya nu ma amapi tazen Jerusalem wi kekhang sen.

⁶Ma Kadimi Ahab nu Israel kadimi kepathu gheshighena tsütsonca tsü nie, kepaghenanye ma Ahab nga kesü yaya. Ma sami pi Apvüwa shun,

⁷ isala Apvüwa na David kadishi tsü yasa nsa mvu, kepaghenanye ma David ssinu cenkethenjüh kesü satheng nu ma wi ma shicübvüghathu na keshüthangla kekhang sen benle khishütheng.

⁸Jehoram na kadikesa tsüwi Edom na Judah shun shagha nu ma ketanla kekhang kesen kadiyyi kesü saya.

⁹Tsalina Jehoram nu ma kekhu wi kedithu na gorugarithu ssiya nu Edom nka wa. Ciwi Edom nyi süpahizi na gho mathu vüya, isala mathu na aghaja wina bvüshhuya.

¹⁰Edom na tsü nten Judah wina ma kekhangsen saya. Ha tsüwi ha Libnah nyunuti la kivvü shagha, kepaghenanye Jehoram na ma bamyithu Nyiza Apvüwa tsü teshi kesalina.

¹¹Ma Judah yyishiphon diyyithu wi lela Anyiza nkechü kekinyipenthu sa nu Judah nu Jerusalem nyithu yala sami pi Apvüwa shun thsüa.

¹²Atusenjüh-kechüwa Elijah na lesükezhü pi Jehoram kecü na hati siya: “Apvüwa, nbaqhai David Nyizawa na no meshensa ben, kepaghenanye no nba Kadimi Jehoshafat nyelela nbaqhai Kadimi Asa tsütsonca tsü n-niela.

¹³Tsüti kesawa nyela no Israel kadimithu tsütsonca nie, Ahab nu ma mithon kesathu na Israel ssi wa jühtsentsa nkesa wi chi kesa ti no Judah nu Jerusalem nyithu ssi wa jühtsentsa nkesa wi chidha. No ncünyu nmiwi kemehaikithu lela pathidha.

¹⁴Tsüghena Apvüwa na n-nyithu, ntsangathu, nu nwubvüthu meten ntsa sa nu no kebenthu yasaden.

¹⁵No nkughung wi khumakhujü pvü nu naa ntsa sa, nu tsüna nmehai pfüpfü sa ben.”

¹⁶Filistin nu Arab nyithu pahan na Sudan nyithu pahan ayikha ccü niela kahang pen kete wi tsü hang ben. Apvüwa na mathu sapi wala Jehoram ssinu aghisa thsü.

¹⁷Mathu na Judah nkaya, kadijjen shuya, nu kadimi wubvüthu nu ma tsa bvükhenwa Ahaziya ketan khe kepa wi tsüdi ssinu atssüzüthu sa bvüa.

¹⁸Hathu ha tsüdi sengwi Apvüwa na akoghung wi khumakhujü pvü nu naa ntsa kesa kesü sengho kadimiwa miwi chia.

¹⁹Tsüna amapi keni-u nmehai pfüpfü sa wa asakhen wi kadimiwa na agüccü ntsa nu shü. Ma kekhang kekhu wi keben anyithu na ma bamyithu ghena sa kegho ti mathu na ma keshü ghena anonkegü wi annibhon di ntsa nsala.

²⁰Jehoram na ma kahang mapi changha nu keni wi kadimi saya nu Jerusalem wi amapi tazen kekhang sen, anyi thola ma keshü ghena ahathana nsa. Mathu na ma pi David Nyunutiwa wi vhüa, isala pi kadi shüjjenthu wi nvhü.