Read Northern Rengma Naga 2 KHENICÜKI 22 Bible Online

2 KHENICÜKI 22 - Northern Rengma Naga bible

2 KHENICÜKI 22

¹Arab nyi pahan na yilakeshu kesü sa nu Kadimi Jehoram tsa Ahaziya, abvükhenwa tsü ketan khe kepa tsüdila pathia. Tsalina Jerusalem nyithu na khili Ahaziya pi ma ba mithon sala kadimi sa thsüa.

²Ahaziya na ma kahang mapi ngwe nu keni wi kadimi saya nu ma Jerusalem wi amapi kesü kekhang sen. Ahaziya la Kadimi Ahab theghi tsütsonca tsü nie, kepaghenanye ma jja Athaliya — Israel Kadimi Omri ngawa nga nu Ahab nga—na ma sansi pi nkemehai wi chia.

⁴Ma sami pi Apvüwa shun, kepaghenanye ma ba keshü sengwi Kadimi Ahab theghi kepathu na ma kesansithu sa nu mathu na ma ssi wa qanca thsüa.

⁵Mathu kesansi kenie wina ma Israel Kadimi Joram gwegheya nu Siriya Kadimi Hazael ssinu aghisa. Süpahizithu na Gilead yyiwi Ramoth wi kesali, nu Joram na aghi wi mesa-mena.

⁶Jezreel nyunuti wi ma kinaa yisü tsü mehaiyale gho neng, nu Ahaziya na ciwi wa ma metu.

⁷Anyiza na Joram hhainan kegho ha ghena Ahaziya qanca thsüa. Ahaziya na ciwi keben wi anyi kesü Nimshi tsa ma nyan Jehu, Apvüwa na ma wina Ahab kadishi tsü yasale kessiya kesawa na gho Joram manyi metu.

⁸Jehu na kadishi tsüwa miwi Anyiza na kekhi tsü satu keben wi Judah nyi ccülikesathu nu Ahaziya cünyuthu Ahaziya gweghe ma hhainan keghothu tsü metuya. Jehu na mathu tsüdi pathia.

⁹Ahaziya bha wa thsü nan ma Samaria wi kuthi keben muya. Mathu na ma ssinu Jehu wi wha nu ma pi shü thsüa. Isala mathu na ma baqhai Kadimi Jehoshafat, ma saya kemehai chu Apvüwa kekuli kesawa tsü ghena ma kamang pi kinyikü nu vhüa. Ahaziya theghi wi anyi kesüla kadiyyi wi kekhang senkeya nmila.

¹⁰Kadimi Ahaziya jja Athaliya na nyu ma tsa pathidha le kesa zaya meyi ma Judah kadimi theghithu tsüdi pathilo ahza khuchia.

¹¹Ahaziya tssüggü kesü Jehosheba na keqhaikedi kesü Jehoiada wi n-nuwa ben. Ma wala kadi theghithu pathiale keben jawi Ahaziya tsa kesü Joash tsü ssiya nu kuthila ssi wa Kekinyijjen wi kejenben keshondhi wina ma noncca. Athaliya kwen wi nshü thsüle kesalina Jehosheba na ma pi kuthia.

¹²Athaliya na kekhang sen keben jüwi ma amapi tugho ciwi kuthi ben wa.