Read Northern Rengma Naga 2 KHENICÜKI 23 Bible Online

2 KHENICÜKI 23 - Northern Rengma Naga bible

2 KHENICÜKI 23

¹Amapi tugho kehie sengwi keqhaikediwa Jehoiada na kuli shhule kesa südheya. Ma süpahizi kedithu manga satezüya: Jeroham tsa Azariya, Jehohanan tsa Ishmael, Obed tsa Azariya, Adajah tsa Maaseiya, nu Zikhri tsa Elishafat.

²Mathu na Judah nyunutithu tsüdi wi wa nu Levi nyithu nu agei wi accülikesathu tsüdi ssinu mathu gweghe Jerusalem wi gho.

³ Mathu tsüdi wa Kekinyijjen wi saghu nu ciwi mathu kadimi tsa Joash ssinu cenkethenjüh kesü sa. Keqhaikediwa Jehoiada na mathu wi khi, “Kadimi shü kesawa tsa na hewi ben. Ma khili kadimiwa sa den, tsüna Apvüwa na David shicübvüghathu na sa benle khishi ketheng ti saben.

⁴Ithu na hati sa den. Sabbath ghanan wi keqhaikedithu nu Levi nyithu na kekuli sagho lethu, mathu gishü kecheng wi kesü na Kekinyijjen kaghapeng-jenka hieben,

⁵kepawa gishü kecheng wi kesü na kadijjen hie, nu kepathu pi Ketegüpen Kaghapeng-jenka wi ben thsüben. Anyithu tsüdi gho Kekinyijjen ccühha wi saghuya.

⁶Keqhaikedi nu Levi nyi kekuli sa kebenthu ketan khe anyi thola Kekinyijjen non wi du nben. Mathu satemethadha ghena mathu na duya mehai, isala anyi kepathu tsü Apvüwa kecükegwethu tsü nie nu akhemi wi nbenthu yishü.

⁷Levi nyithu na mathu njünnu hanshi sen kadimiwa ghihie, nu mathu kadimiwa na khiewa wa khe ma gweghe ben. Anyi thowa na Kekinyijjen wi dule sa khe pathiaben.”

⁸Levi nyi nu Judah nyithu na Jehoiada na kecükegwe kechi tsüti sa. Sabbath ghanan wi anyithu na mathu kekuli cen lela teshi pi nbvü thsü, tsalina kekuli sacen nu bvü ketenthu nu sale gho ketenthu benchü keni qho ciwi ben.

⁹Jehoiada na Kadimi David ji pi Kekinyijjen wi theng ketheng apie nu atsonhithu tsü pi kedithu cü.

¹⁰Ma anyi njünnu hanshi sen nu kebenthu pi Kekinyijjen tuwa vü nu kadimiwa khwe thsü.

¹¹Tsaseng wi Jehoiada na Joash ssishhula kadiliwen pi ma pvü thsü, nu kadishi ghena ayenthu lesüshen kesü pi ma cü. Nu Joash pi kadimiwa sa thsüa. Keqhaikediwa Jehoiada nu ma tsathu na adeli pi Joash nyen, nu anyi tsüdila maghala khi, “Kadimiwa kesie kahangwa salo.”

¹²Athaliya na anyithu na kadimiwa ghena anonghe keben tsü zaya, tsalina ma kaghaji sen nu anyithu na saghu keben Kekinyijjen witsü wa.

¹³Ciwi ma kadimi ketheüwa na Kekinyijjen kedulen wi kadimithu ghena apen kiden ketheng ketonthu kete wi ngan nu süpahizi kedithu nu tutuwa kekhouthu na ma vüsen keben muya. Anyithu tsüdila anonghe ntsa nu magha nu tutuwa khou, nu Kekinyijjen wi akhwi kechüthu na mathu chünongthu khou sen nu kemini witsü atuwa sa. Athaliya na ma hathakina wina ma thsümeni mezüqhe nu magha, “Nyu kematsa! Kematsa!”

¹⁴Jehoiada na Kekinyijjen kevü wi Athaliya tsü npathi mvu, tsalina ma süpahi kedithu cishi chi nu khi, “Aghikehiethu jüwi na ma zanshiya, nu anyi thowa na ma kekashale sa khe tsü pathilo.”

¹⁵Mathu na wa ma zanya nu ssisen kadijjen wi wa, nu ciwi Goru Kaghapeng-jenka wi ma pathia.

¹⁶Keqhaikediwa Jehoiada na Kadimi Joash nu anyithu yala ma gweghe nu mathu na Apvüwa nyithu sa tenle kesa cenkethenjüh kesü sa.

¹⁷Tsaseng wi mathu tsüdila Baal kekinyijjen wi wa nu tsü pashapia. Mathu na ciwi kekinyipen nu atsikezhüthu tsü whengcha nu kekinyipen tuwi Baal keqhaikediwa Mattan pathia.

¹⁸Jehoiada na keqhaikedithu nu Levi nyithu pi Kekinyijjen wi kekuli tsü ghang thsü. Mathu na Kadimi David na pi mathu dhen kechi kekulithu tsü sa, nu Mosa Yenwa kenie wina ahhanshathu mecang pi Apvüwa kinyi. Mathu na akhwi- kesa nu kemini kesathu tsü la ghang.

¹⁹Jehoiada na anyithu pi Kekinyijjen kaghapeng-jenka tsü la hie thsü nu anyi keccüna wi nkemethathu ciwi kegho khen thsü.

²⁰Süpahizi kedithu, accülikesathu, kedithu, nu anyi kepathu tsüdila Jehoiada gweghe kesenniela Kekinyijjen wina kadimiwa ssinu kadijjen wi wa. Mathu kaghapeng-jenka ghutiwa wina du, nu kadimiwa na kadipen miwi tonkiya.

²¹Anyithu tsüdila anonkeghe sa, nu anyunutiwa na ceen sa, khili tsüwi ha Athaliya pathidha.